جمعتنا القرابة *الجزء الثاني* (أنت قدري)

Partie 55

فكافي قدام البحر ، كانو قاعدين ، الطابلة معمرة قدامهم وهوما يفطرو ، مسح فمو وشاف معاها كانت تاكل والإبتسامة على وجها ، دار يدو على فمو وبقا يشوف معاها حتى كملت ، غير شبعت حكمت الطرشونة (سربيتة) ومسحت فمها وخزرت فيه بتعجب
لونار: كنت تشوف فيا ؟
آرام: اممم ، تبسمت .... كنت نشوف إذا عرفت نخير مليح ولا لالا !
لونار: هكداا ! ، وهادا وين ضهرتلك تعرف إدا خيرت مليح !
آرام: مزال الحال ، فتح التلفون وورالها la date ، شافت معاه وشافت مع التلفون وطلعت حاجبها معجبهاش كلامو حتى ولو بالڤصرة ، سكتت وربعت يديها وخزرت لبعيد ، وعينيها بداو يتغرغرو بالدموع ، وهو فهم بلي زعفت ، قرب للطابلة
آرام: يضهرلي بليك مزال معرفتينيش مليح لالا ! ، خزرت فيه مطلعة حاجب 🤨.... إيه خاطر أمنتي ديراكت واش قلتلك دوك ، كون جيتي تعرفيني ، علابالك مام كون تبقا 100سنة ونعيش معاك غير نهار فحياتي مراحش نتخلا عليك
لونار: انا علابالي بلي تحبني ودايرة فيك الثقة بصح ساعات نحسك العكس ، سورثو غير تريكلامي عليا
آرام: علاواش نريكلامي ؟
لونار: كلش لبستي ، تخمامي ، حياتي
آرام: مليح كي جبدتي هاد السوجي نتي ، خاطر راني حاب نحطو النقاط على الحروف هنا بالذات
لونار: يعني كنت تستنا فيا أنا نهدر !
آرام: إيه كنت حابك نتي تجبدي السوجي
لونار: علاش !
آرام: خاطر أنا علابالي نجبدو بطريقة متعجبكش ونولو فالمدابزات
لونار: هيا رانا مدابزين مدابزين
آرام: نسييو نإيڤيثيوهم قد منقدرو ونشوفو ، ضرب بصبعيه على الطابلة تاع راح يبدا يهدر .... المهم شوفي لونار كاين حوايج خط أحمر فحياتي ، اللي هوما عايلتي والحرمة ، ونتي من ضمنهم للزوج ، يعني عايلتي وحرمتي ، منحبش اللي يدنا ليك ومنحبش اللي يشوف معاك بخزرة عيانة ولا إعجاب خاطر نعميه ، نتي مرتي أنا فدارك معايا البسي كيما تحبي ، فأي بلاصة نكونو وحدنا ، نحط سطر على وحدنا لونار ، البسي كيما تحبي ، بصح باش انا نكون معاك كيما دوك هنا وتلبسيلي شليقة متغطيلكش حتى الربع فالفخد هادي متمشيش معايا مانيش ديوث ، ويضهرلي اي مرأة فعقلها متقبلش راجل ميغيرش عليها ويعرض فلحمها للرجال برا ، شافت معاه
لونار: نكدب عليك كون نقولك مراهش عاجبني الحال كي تقولي هاد اللبسة بدليها نحس بإحساس هكا معلاباليش علاش يمكن تملك وعاجبني بصح تاني نتقلق ساعات الفيمينيسم اللي فيا تغلب ، قلب عينيه
آرام: هاد المصطلح تاع الخرا بدات نكرهو ، مكانش منها كامل ، المرأة كرمها ربي والدين قبل مايخرجو هاد المنظمات تاع الزمر ومين كرمها خلاها عزيزة بعيدة على الرجال وعينين الضبوعة وتستر لحمها ، وشوفي متدخليليش كينقولك هكاا بلي راني نأيد فالتحرش نعرف الجنس اللي كيفك ، ضحكت .... تقوليلي تلبس كيما تحب وميتحرش بيها ، ايه التحرش ماعندو حتى مبرر ، صح ، مي مع الوحوش اللي معانا اللي يخمم من السبتة لتحت مراحش تبدليهم كامل ، تنهد بقلة حيلة .... ومانيش نقولك ديري حجاب هاداك قناعتك وديريه لربي ماشي ليا ، راح تفرحيني كي ديريه بصح يقعد لربي ولازم ترضاي بيه ، بصح اللباس انساي تلبسي عريان وهنا فرات ، عوجت فمها
لونار: مراحش نلبس كيما كنت يعني نقص من العرا وماعندك حتى كلام وحدوخر ، ردت شعرها ورا ودنها .... والحجاب إنشاء الله ربي يهديني ونديرو
آرام: إنشاء الله ، واللبسة تنقصي وكيما نحب أنا كي نشوفها موالمة تخرجي بيها وكي نشوفها لالا أنساي ومتتغاننيش معايا خيرلك ، أني قلتهالك من دوك
لونار: المهم دوكا نروحو لتخمامي ، نقدرو نقولو النقطة اللولة تفاهمنا عليها ، قاطعها بحدة
آرام: تفاهمنا عليها
لونار: معليش ، نهار الخطبة جبدنا السوجي تاع لولاد وحسيت ولا فهمت بلي راك حابهم على عكسي أنا ، منيش حابة لولاد تمتم
آرام: اوكي فهمت بلي ماشي حابة ، بصح السبة ؟
لونار: شوف آرام ، الأمومة مسؤولية كبيرة وأنا منيش حاسة روحي واجدة ليها ، منكدبش عليك الزواج وجاني حاجة واعرة ، بصح كل منخمم اني ختاريتك نتا نطمن ، ترسمت ابتسامة خفيفة على وجهو .... بصح الولاد منيش مستعدة نولد بكري ونربي ونوكل ونسهر ونقري ، حاسة مزال شوية  وصعيبة عليا تاني مع خدمتي ، حط يدو فوق يدها وهدر بحنية
آرام: نتي شفتي غير الجانب الواعر فالأمومة ، مشفتيش بلي راح يولي عندك قطعة من روحك يمكن بنت تشبهلك ، تدي طبايعك ، وادا كان ولد يقاسمك معايا ويغير عليك مني ، تسمعي صوت ماما ، وعلابالك الأمومة فعمر صغير أحسن ، راح يكبرو معاك كيشغل صحابك تفهميهم ميكونش بزاف هداك التعصب تاع الأجيال شافت معاه بعيون دامعين وهو كمل يهدر .... المسؤولية مراحش تشديها وحدك أنا ونتي راح نتقاسموها وأنا راح نكون أكتر منك كيما درتي فيا الثقة فالزواج ديري فيا الثقة فلولاد
لونار: منعرف مانيش واجدة آرام افهمني وكلامك كامل صحيح و tellement علابالي بلي صحيح منيش قادرة نبرر موقفي
آرام: أهدري لونار باش نفهمك ، يمكن تكون عندك وجهة نضر وحدوخرة ونقتنع ، تنهدت
لونار: حاسة الولاد يفسدو الحياة الزوجية ، يمكن كيما صرات لپاپا وماما كي جيت أنا
آرام: بصح متقدريش تقارني واش عاش باباك مع حياتك ، والديك عاشو ضروف مختلفين وكانت عندهم سبة ، يعني ميضهرليش هادا ماشي سبب مقنع
لونار: صح مي أنا فتخمامي هكاا معلاباليش علاش وعلابالي راني غلطانة أنا حابة نعيش معاك ، نحوس نضحك نلعب ، الولاد يفسدو المتعة
آرام: واش من متعة بالضبط ! ، إدا على المتعة اللي راح نجيبوهم بيها ، هاديك ادا طحت انا فالركنة تفسد هوما مادخلهم فيها
لونار: آرام واش راك تهدر ، أنا نهدرلك على الحياة ونتا تهدرلي على الفراش
آرام: نتي اللي فهمي روحك قالك متعة ، الولاد هوما يزيدو للحياة بنة لونار
لونار: أنا عندي لالا ، خاطر نتوما الرجال تقولو هكا كي تلحق للصح تخليو الدرك على المرأة برك وزيد نفسد le corp تاعي
آرام: متقدريش تحكمي عليا ونتي مجربتيش ، وإدا على le corp نتي نهار تولي مرأة بالملى راح يتبدلو فيك بزاف حوايج من بينهم الفورمة تاعك تزيد ياك راكي طبيبة وبلا منقريك
لونار: آرام نتا راك واجد انا لالا وتعيش احترم قراري خاطر هادا le corps تاعي وأنا اللي راح نرفد ، بقا يشوف معاها ساكت مشي حاب يزيد يهدر لأنو هو تقلق وهيا كيف كيف وكون يكملو يهدرو راح يضاربو قدام الناس ، فضل يسكت ومبعد يزيد يفاتحها فالسوجي
آرام: نوضو ! ، طلعت راسها وهبطتو وناضت راحت سبقتو وهو راح خلص ولحق بيها