كان يسيي يشعل فالgارو ، محبش يشعلو ، بقا ينفظ فالبريكي وزاد سيا يشعل محبش يشعل ، نحا الدخان من فمو وتنهد ...
خلاهم لداخل وخارج للجنان يتكيف كالعادة بعد العشاء ، شافو راح عندو ، شعل دخانو ومدلو يشعل ...
شاف مع اليد اللي انمدتلو فيها بريكي وخزر معاه ، شدها عليه وشعل الgارو وردهالو ، حطو ففمو ونفث منو شوية
آرام: يعطيك الصحة ، دار عندو مروان
مروان: على واش ؟
آرام: آخر واحد كنت نتوقعو هوا نتا يخرجني
مروان: علابالي
آرام: مكانت كاينة حتى حاجة تخليني نربطها بيك يعني مكان حتى صلة وهادا اللي خلاني حاير
مروان: معندي حتى صلة معاه ومكنتش راح نعرفو كون ما هاداك النهار وكان استغرابي كبر كي شفت واحد كيما هاداك يقربلكم
آرام: واش تحب الواحد يقدر يخير كلش غير عايلتو لالا ، تنهد مروان خاطر ضربلو على الجرح
مروان: عندك الحق
آرام: علاش مشتكيتش بيه النهار هاداك
مروان: كون ميكونش عندك لكتاف متقضي والو واصلا يماه تعرف بزاف ناس طالعين ، وزيد انا مانقربش للضحية حتى اسمها منعرفوش ، الحاجة الوحيدة اللي قدرت نديرها هو جبت les video من كاميرات المراقبة قبل مايفاصوهم ، خاطر باش يغطيو عليه قالو بلي الكاميرات معطلين الدليل الوحيد
آرام: هادا كامل يماه !
مروان: هكدا سمعت ، اصلا حكاية الطفلة كانت قضية الرأي العام هادوك اليامات وباش يكالميوها دخلو واحد خاطاه فلوسط
آرام: والله صح ! ، طلع راسو مروان وهبطو بمعنى ايه .... ياخويا ، هاد الناس تخاف منهم
مروان: قادرين على كلش
آرام: بصح نتا واش داك لهاديك البلاصة !
مروان: تما تسكن المراة اللي جابتني للدنيا ، ورحت نديلها دراهم تحتاجهم و كي جيت مروح سمعت العياط رحت نشوف لقيتو هارب ، دخلت لقيت الطفلة مقتولة
آرام: علاش مجيتش تقولي بلي تعرف عليه هاد الشيء كامل ؟
مروان: ماشي ساهلة ليا وانا فدارك نجي نقولك بلي فاميلتك فيه وعليه ، مهما نكون انا ضيف
آرام: نتا حاط روحك ضيف بصح كل واحد من هاد الدار حاسبك خوه او وليدو وانا واحد منهم ، تبسم مروان
مروان: سمحولي على الأقل صلحت غلطة فاللخر كنت قادر نتفاداها من اللول
آرام: ماشي غلطتك اصلا ، بصح دير فبالك راك واحد من هاد العايلة يعني اذا تقبل عايلتك تضرر هاديك حاجة وحدوخرة
مروان: لالا ، معليش متتعاودش
كملو يكميو وهوما ساكتين ، حتى زاد نطق آرام
آرام: راح نخطب لونار ، شاف معاه مروان وتبسم
مروان: بالبركة عليكم نشاله
آرام: مستغربتش كان علابالك !
مروان: كنت فايقلكم بلي راكم تحبو بعض
آرام: يعني متقدرش تقول عليه حب فلول كان اعجاب برك
مروان: وتحول لحب ولا مزال ؟
آرام: تقدر تقول ، بالنسبة ليا الحب الحقيقي يجي بعد الزواج
مروان: صح ، المهم راح نوصيك حاجة ، اتفكر دايما بلي لونار عندها خوها اللي ما جابتوش يماها كون تزعفها أنا أول واحد راح تلقاني فوجهك
آرام: علابالي
مروان: وراح نزيد نقولك حاجة واعتبرها من اخ ينصح فنسيبو ، تبسم آرام على هاد الكلمة ، واومألو يكمل .... لونار تستاهل كل خير ومن بكري كنت نتمنالها تلقا بنادم يصونها ويخليها ترتاح من المسؤولية خاطر صح عيات فحياتها خصوصا فهادوك الربع سنين ، راهي محتاجة لإنسان يهز عليها المسؤولية و ميخليهاش تخمم ، راجل توثق فيه وفي شخصيتو وفي عقلو ، راجل تقدر تغمض عينيها ولا ترقد وهيا مطمنة 💯 بلي قادر على شقاه ، راجل بخزرة يفهمها واشبيها ، يعني اذا كنت قادر على هاد الشيء كامل اتكل على ربي واذا لالا غير خليها خاطر الحب وحدو ميكفيش معاها ،
تقعد آرام وشاف فيه بجدية
آرام: وعلاش كيفاش بانتلك انا !
مروان: ميهمش انا كيفاش تبانلي خاطر العلاقة بيناتكم واحد مراح يدخل فيها وراح تكون مختلفة على علاقاتك مع عايلتك ، انا راني نوله فيك خاطر هادو الحوايج هيا مراحش تقولهوملك
آرام: انا من طبعي نكون قائد يعني عايلتي انا المسؤول ونتوله ونخمم ونسهر على راحتهم يعني مراحش تجيني صعيبة نكون هكا مع مرتي ، صح علاقتنا راح تكون مختلفة عليهم كيما قلت بصح كاين قاسم مشترك بيناتهم انهم مسؤوليتي
مروان: مادابينا
آرام: تاع الصح ربي نعمها بأخ ، تبسملو مروان وحك شعرو
أنت تقرأ
جمعتنا القرابة *الجزء الثاني* (أنت قدري)
Romanceالجزء الثاني من حكاية جمعتنا القرابة (باللهجة الجزائرية) راح يكون أكثر مركز على الأولاد يعني ولادهم بعد ما كبرو وتاني راح نرجع للقطات فالماضي ، نشاله يعجبكم كيما الأول 🤍🤍
