جمعتنا القرابة *الجزء الثاني* (أنت قدري)

Partie 96

بعد يومين :

مطار josep tarradellas barcelona - el prat
رايحة جاية وتشوف مع ساعتها ، مدة بانولها ناس بزاف خارجين جارين فاليزاتهم ، وسطهم كان خارج لابس شورط دجين فاتح مع تريكو دومي مونش فالأبيض جاي مع فورمتو ، بشرتو سمراء تبريي ولابس les lunette de soleil ، شعرو رادو اللور مسچم ولابس ساعة فيدو وهاز فاليزة صغيرة بيدو التانية ، بقات تخزر معاه كيفاش ملاحظتش بلي شباب وعندو هيبة هكا هادا شحال ؟ ، هزت كتافها بعدم اهتمام 

لحق عندها ووقف قدامها ببنيتو حتى حجب عليها الشمس نحا نواظرو
لورين: على السلامة .. طولت
مصعب: الطيارة دارت الروطار
لورين: معليش .. يالله اركب ، جات رايحة جيهة وين تسوق وهو يشدها ، شافت مع يدو وطلعت عينيها ليه
مصعب: نتي تسوقي بيا ؟
لورين: لالا خيالي .. شكون بغيت يسوق بيك ! ، طلقها وراح سابقها
مصعب: حتى واحد أنا نسوق ، بقات تشوف معاه متعجبة وهو طلع ونوض الطونوبيل يستنا فيها تطلع
مصعب: نباتو ؟ ، طلعت وخزرت فيه عاقدة حاجبها
لورين: وشنو هادا ؟ ، ديمارا محرك راسو بوشن ؟ .. علاش طلعت تسوق بيا !
مصعب: معجبكش لحال ؟
لورين: ايه
مصعب: مشي نتي طفلة ! .. معناها أي راجل يكون معاك من باب التقدير ميخليكش ديري des chose masculin يحتارم الأنوثة ديالك .. كيما دوك مخليتكش تسوقي بيا مشي راني نستهان بيك لالا .. شايف روحي انا الراجل هنا انا نسوق .. كي نعرضك انا نخلص .. حتى وكان تربطنا غير خدمة .. مفهمتش نتوما strong independent زعما منين تجيبو هاد التخمام .. الواحد حب يكون gentille تردوه بسيف méchante .. ممبعد قولي عليا حاسب روحي ، بقات ساكتة وتشوف معاه مفهمتش علاش كلامو قنعها وربطلها لسانها ورضالها غرورها و independent women لي داخلها خلاها تتضرب عرض الحائط ، سچمت قعدتها وربعت يديها وبقات تشوف مع الحيط وهو ماشي ..

مدة تولهت للطريق اللي ماشيين فيها
لورين: اااي وين راك رايح !
مصعب: نتغداو
لورين: نتغداو ف l'hôtel
مصعب: راح نديك تاكلي أحسن paella 🥘 ونرجعو حتى أنا نريح
لورين: اصبر .. حبيت تقول جيت déjà لسپانيا ! ، حرك راسو بإيه .. كيفاش .. قصدي علاش ؟
مصعب: قراية
لورين: قريت هنا !
مصعب: بعد ما ديت لباك جيت قريت هنا
لورين: وعلاش رجعت !
مصعب: يما وحدها
لورين: كل مرة تصدمني ، دورت عينيها بتعجب ، جاتو الضحكة كيفاش هدرتها
مصعب: كنتي حاسبتني جاهل ومن حومتي ماخرجتش وزيد عليها شايف روحي ، هدرت من تحت نيفها
لورين: وكنت حاسبة عندك عقلية محجرة وتعيي
مصعب: الله يبارك ماخليتي مالسقتي فيا .. مزيا الواحد جاي شباب من عند ربي كون قلتي لا زين لا ملة ، دورت راسها للزجاج
لورين: حوحو يشكر روحو ، تبسم وكمل يسوق ..

فالجزائر :

جا من salle de sport ، طلع دوش وهبط يوجد واش ياكل ، دخل للكوزينة قابلتو مليكة
مليكة: سي أديم تحتاج كاش حاجة !
أديم: لالا غير كملو شغلكم جيت نوجد ماكلتي ونخرج ، هزت براسها وهو جبد واش يحتاج وبقا يخلط ، خرجت مليكة طالعة تشوف لبيوت ، وهو كان يخلط يميكسي فال jus 🥤ومرة مرة يقلب على الپانكيك ويزفر