جمعتنا القرابة *الجزء الثاني* (أنت قدري)

Partie 39

داخل جاري للصبيطار ، طلع فالأصنصير وهو مخلوع ، غير تفتحت لباب تاع الأصنصير قابلوه كامل واقفين لبرا يستناو ، مشا بالشوية جيهتهم ، راحت عندو لونار
آرام: كاش ما قالولكم ، كيفاش راهي ؟
لونار: معلابالناش مزال مخرجش الطبيب ، طلع راسو وهبطو يمعنى ايه ، وراح تكا على الحيط بعيد عليهم مربع يديه ومطلع راسو لفوق ، مدة وخرج الطبيب ، قدم جيهتو شوية باش يسمع واش راح يقول
صهيب: docteur كيفاش راهي ؟ ، واش صرالها !
الطبيب: طلعتلها l'attention بزاف وهادي حاجة متفرحش يعني قادرة كون تصرالها مرة وحدوخرة تتعوق لا قدر الله ، آزار وكامي شدو فوامهم مخلوعين وصهيب مسح وجهو وينيس شد راسو أما آرام فكان واقف كالصنم مادار حتى ردة فعل
آزار: ودوكا كيفاش راهي ؟
الطبيب: راهي راقدة ضربنالها إبرة مهدئة ، وراح نمدولها des médicaments تولي تشربهم باش يقللو من ارتفاع الضغط تاعها ، ومن الأحسن نتوما تاني تبعدوها على اي حاجة تقلقها وتخلعها
صهيب: حاضر docteurs ، يعطيك الصحة ، نقدرو نشوفوها ؟
الطبيب: بلا مزية واجبي ، ايه بصح متدخلوش كامل في بعض باش تخلوها ترتاح ، وبالشفاء عليها ، راح الطبيب وصهيب دخل وزادت من موراه فطوم وينيس ، والباقي محبوش يدخلو ، قالو هوما بزاف ،
اما هوا فبقا واقف برا ، محبش يدخل ، راح عندو زاكو
زاكو: آرام ادخل عند يماك ملبارح وهيا محيرة عليك
آرام: خلي حتى يخرجو و ندخل وحدي ، جاوبو وراح قعد فوق الكرسي يخزر مقابل فيه وساكت ، بقاو يشوفو معاه عرفوه ماشي فحوالو فمحبوش يزيدو عليه
شوية وخرجت فطوم وبقا غير ينيس وصهيب معاها لداخل ، راحت عندو ووقفت فوق راسو
فطوم: ادخل تشوف يماك
آرام: كي يخرجو ندخل ، قدمت عندو
فطوم: راني زعفانة منك ، شاف معاها ... مانيش زعفانة كي ضربتو ، هو دار علاش يتضرب يستاهل
آرام: علاش مالا
فطوم: زعفانة كي رحت من الدار هكاك بلا متفهمنا وخليت يماك محيرة عليك
آرام: كيشغل جديدة عليكم ياك مالف كي نضارب معاه (يقصد باباه) نخرج من الدار ، وزيد راني غير فداري
فطوم: ماشي كيف كيف آرام ، شاف معاها
آرام: فطوم ياك صح مزعفتيش كي ضربتو
فطوم: لالا كان علابالي مراحش تضربو هكاك اصلا انا هاداك غاسلة يدي منو نحشم نقول حفيدي ، ونتا اتحرك تشوف يماك ازرب ماتنفعش معاكم السياسة ، شدتو من يدو ودخلتو
شاف ينيس قاعد عند راسها يمسحلها على شعرها وصهيب قاعد قدامها فالكرسي وغير شافوه دارو عندو ، خرجت فطوم وخلاتهم ، وهو تكتا مع الحيط وبقا ساكت ، شاف معاه صهيب وتنهد

صهيب: علابالك بلي راح يشكي بيك
آرام: يدير اللي يقدر عليه
صهيب: في بالك ساهلة ، راك كصرتلو نيفو والفك تاعو
آرام: قليل عليه
صهيب: علاش راك تهدر معايا هكا مفهمتش
آرام: راك غالط هاي مرتك قولها هكا ماشي انا
صهيب: راك تهدر مع باباك علابالك ؟
آرام: على واش راك تحوس ؟ تضارب ! ماشي وقتو
صهيب: مانيش نحوس بصح علابالك بلي انا وياك هدرة مسgمة كيما الناس موليناش نهدروها
آرام: مزيا فقت ، خاصك دوك تفيق علاش ماناش نهدرو كيما الناس وشكون السبة !
صهيب: نتا ، نتا هو السبة معرفتش نربيك الله غالب
آرام: حبيت تقول نتا السبة معرفتش تربيني
صهيب: لا حول ولا قوة لمن خرجت ؟ اه ، كون جبتك فالحرام كون مخرجتش هكدا
آرام: جرب وشوف بوخير ، ناض صهيب ليه رايح يسفقلو قانون (بصوت نوال) ، حتى سمع صوتها
ماريا: حتى والواحد يموت متخلوهش كيما الناس ، دارو ليها وآرام قرب عندها
صهيب: ماريا راكي مليحة ؟ نعيط للطبيب ، حوست تتقعد وينيس يعاون فيها
ماريا: اني مليحة كون تخرجو عليا بيك بابنك نولي خير وخير
ينيس: راسك مراهش يوجع فيك ؟ ، دارتلو براسها تاع لالا وشافت مع آرام
ماريا: كون ستنيت حتى يهزوني فالصندوق وجيت علاش شقيت روحك دوك ، قرب عندها وقعد ، شدها من حنكها
آرام: الزين راهو زعفان منا
ماريا: يعجبكم الحال كي توصلوني لهنا
صهيب: ماريا واش راكي تقولي ، شافت معاه
ماريا: كنت تقولو لمن خرجت ، لشكون بغيتو يخرج ؟ عندكم نفس الطبايع معلابالكش ! واللي خليتو نتا كملو هوا ، حابين تمرضوني ياك ، دايما تضاربو مكانش نقاش كيما العباد
آرام: يما ميهمكش بيني وبينو نتي اتولهي بصحتك برك
ماريا: ميهمنيش قولتلي ؟ ، اخرج ، اخرججج علياا ، شاف معاها آرام وناض ، باسلها راسها وخرج ، شافت مع صهيب ... ونتا الحق بيه يالله ، طلع حاجبو ومحبش يزيد يخليها تتقلق وخرج ، تنهدت وشافت مع ينيس اللي باقي ساكت
ينيس: انا مادرتلك والو ياك ! معندك علاش تخرجيني ، تبسمت وحضنتو
ماريا: غير نتا اللي فيك شوية الضو ما هادوك المشومين فقعولي مرارتي ، كاش نهار نطg ونخليهم
ينيس: وانا لمن تخليني
ماريا: نديك معايا