جمعتنا القرابة *الجزء الثاني* (أنت قدري)

Partie 119

...
‎يوم جديد وأحداث جديدة ، فاقت كيما العادة على صوت الراڤاي اللي موالف ينوضها هاد الوقت باش تروح تخدم ، شافت مع الحالة كانت تبان مضلمة وصوت الشتاء تصب والريح داير حالة
‎لمار: والله منروح بالناقص فالشتاء هادي والتمرميد .. زيد بالزيادة شكون هوا باش نسمعلو ، غمت على راسها بلوسادة وكملت ترقد ، شوية ويصوني تيليفونها هزتو تشوف لقاتو سمير ، كوپات وردتو صيلونس .. روح تزمر فهاد الصميطري اني جاية نخدم ..

...
‎اما هو اللي كان فحومتها لتحت قاعد فالطونوبيل يصونيلها باش تحبط يوصلها معاه للخدمة عارفها مراحش تجي وهو صامط كتر منها
‎سمير: تكوپي عليا .. متسمعيش لكلام .. هانا جايك نوريلك .. نتي حبيتي لكشايف وأنا موسمنيش سمير السمير في باطل ، جبد parapluie وحبط طالع لدارها كان لابس سروال كحل demie classique مع بوط كحل ومن فوق تريكو تاع الصوف بيض ومونطو قصير كحل زايد معاه كاشني بين الباج والماغون ولابس ساعة جلدية ماغون وريحتو تتشم من طرف الدنيا ..
‎وصل للإيطاج وين تسكن ودق الباب ، مرة وزوج ، ايا لقاها مفتحتش زاد فالوتيرة تاع الدقان يخبط بكفو ، حتى فتحت الباب فوجهو بالفور ، بقا جامد كي الحيط يشوف معاها ، كان شعرها طالع فالسما مخبل لابسة پيجامة تاع النعاس غووز دافية لاصقة على لحمها ورجليها حفيانين
‎لمار: طيخ فراسك نشاله .. هكا يطبطبو النااس .. كسرها خير ، نحات شعرها اللي كان مغطي وجهها تافاف ، اشرتلو باش يفيق .. اااي .. ااايووو .. راني نهدر معاك اسي محمد .. واش خصك
‎سمير: شكون نتي ؟ ، تنهدت
‎لمار: سي سمير واش جابك صباح ربي
‎سمير: هادي نتي صح
‎لمار: لالا خيالي
‎سمير: ياصاحبي تباني هادوك المهابيل اللي يدورو فالزنق ، عوجت فمها
‎لمار: هاهاهااا .. اني ضحكت .. علاش جيت دوك ؟ ، سچم وقفتو وحنحن
‎سمير: جيت نفكرك بلي لازم تجي تخدمي
‎لمار: قلتلك لبارح منجيش جابلي ربي
‎سمير: وانا نفكرك واش قلتلك ولا مكالاه ؟؟ ، تنهدت وهدرت بجدية
‎لمار: شوف ماشي بالساهل ننسا كلامك تاع البارح وكي حاوزتني ونرجع عادي كيلي مكان والوو
‎سمير: جابلي ربي جيت طلبت السماح وقلتلك اطلبي اي حاجة نديرهالك ايا واش نزيدلك ؟ .. نركع هنا قدامك ولا كيفاش !
‎لمار: اايه بصح .. ، قاطعها
‎سمير: روحي تلبسي روحي راني نستنا فيك ربع ساعة كون تزيدي من فوقها دقيقة هاكي علابالك
‎لمار: ليوم خليني منخدمش غدوة نجي ، شاف لساعتو
‎سمير: خمسطاش دقيقة راهي بدات ونعرفكم نتوما البنات شحال طولو معناها غير ديري حسابك .. منزيدش عليهم ، طلع حاجبو فيها .. يالله ، غلقت الباب فوجهو بالفوور زعما مقلقة تلعب فيها وهيا فالصح دخلت طالقة الريح لرجليها تبدل خلعها بنبرة صوتو هاديك

...
‎فاتت ربع ساعة ومحبطتش ، كلاكصونا عليها بالطونوبيل من تحت باش تفهم روحها وتحبط ووالو ، ايا فتح الباب طالع لعندها حتى يلقاها جاية تجري ، جاتو الضحكة بصح غمها لداخل ، حك حاجبو ونطق
‎سمير: طولتي ، شاف لساعتو .. زدتي عشر دقايق كاملين .. مي سترك ربي مزدتيش من فوقهم خاطر كنت طالع ، نطقت وهيا تلهت
‎لمار: امشي يرحم باباك مفهمتش دعوة الشر اللي جابتني نخدم عندك ، اشرلها تطلع للطونوبيل ، ركبت معاه وديمارا رايح للخدمة ، مامپا زوج دقايق وصلو خاطر كانت قريبة حبطت وخبطت الباب من وراها وهو طلعلو الدم
‎سمير: كسريها خير .. غولة متعرفيش للسياسة ، حبط حتى هوا طلع ديراكت للبيرو ديالو يخدم