جمعتنا القرابة *الجزء الثاني* (أنت قدري)

Partie 57

بدات تفتح عينيها بالشوية وتشوف مع السقف تاع البيت اللي راهي فيها تستوعب وين راهي ، هزت روحها تتقعد والدوخة غالبة عليها ، شافت مع السيروم اللي معلق قدامها وتنهدت ، قاطعها صوت من شرودها ، حتى قفزت معاه
ينيس: راكي مليحة ؟ ، بقات تشوف معاه شوية تزيد تستوعب ، كان واقف مقابل فيها لابس طابلية بيضة مفتوحة وفالجيب العلوي معلق كارت 🪪 فيها اسمو ومعلوماتو ومعلق ستيلو فالجمب ، كان حاط يديه فجيوب السروال ويشوف معاها
آيلا: خلعتني ، كان يخزر معاها بملامح ماشي مفهومين ومكشرين فنفس الوقت ، قرب عندها وحنا بجسمو متكي يديه على الحافة تاع الفراش ، وهدر بنبرة حادة ، جامي شافتو هكاك حتى خوفها
ينيس: دوكا تهدري ولا لالا !
آيلا: اه وواش نن.هدر ؟ ، عيط عليها
ينيس: واش مرضك ؟ حابة تخرجيني من عقلي عمبالك عما منشوفش !
آيلا: م.ماعندي والو ، غمض عينيه
ينيس: آيلاااا ، دورت راسها للجمب وعينيها غرغرو بالدموع ، تنهد وقرب عندها .... شوفي هادا شحال وانا نروماركي فيك من الخطبة تاع آرام ولونار وأنا شاك بلي راكي مريضة ، بصح بواش مقدرتش نعرف وكنت قادر مقبيل نديرلك les analyses وكلش ونهني راسي ونعرف بصح محبيتش نتعدا على خصوصياتك وفضلت نسمع منك malgré منيش راح نزيد نصبر عليك كتر كون متهدريش وراح نديك بسيف ديريهم قدامي ، تنهد وحكملها يديها بين زوج وانحنى على ركبتو يشوف مع عينيها الدامعين .... آيلا متبكيش راني نهدر معاك على مصلاحتك صدقيني راح نوقف معاك للدقيقة التالية ، قوليلي على الأقل باش مريضة يمكن نلقاو حل دوك قبل ماتطور الحالة كتر ، جبدت يديها منو ومسحت دموعها تخرج فالهدرة بالسيف
آيلا: ااا أنا عندي ، كان يستنا فيها تنطق
ينيس: ايه ؟
آيلا:..... ، تفتحت الباب بالقوة ودخلت إيلصا هاجمة مخلوعة عندها ، وهو غمض عينيه مزير عليهم ، ووقف شاف معاها مخسر وجهو كتر كي قاطعتهم ، راحت عندها
إيلصا: راكي مليحة ؟ واش صرالك ! ، سقسيتهم عليك لتحت قالولي بلي دختي ، شافت معاه وشافت معاها
آيلا: ايه دخت اصلا قتلك اني عيانة
إيلصا: صح سمحيلي جرجرتك معايا ، تخلص القرعة ونروحو للدار
آيلا: معليش ، شافت مع ينيس اللي كان مقلق ويخزر فيهم
ينيس: بالشفا عليك انا نروح نشوف les patients تاعي راهم يستناو ، خرج وخلاهم ، وإيلصا دارت تسقسي فيها
إيلصا: هوا جابك ؟
آيلا: معلاباليش فطنت لقيت روحي هنا وهوا مقابلني
إيلصا: اممم ، راحت قعدت قدامها فوحد الكرسي قريب وآيلا حطت راسها على الكوسانة متكية تشوف مع السقف وتتفكر كي كان يهدر معاها ، زعما هادا كامل خوف عليها ؟ علاش بصح !

فات الوقت وجات الفرملية نحاتلها القرعة وخرجت مع إيلصا ، راحو ركبو فالطونوبيل ، كان لفوق واقف فالبالكون تاع بيروه يطل على الپاركينغ شاد كاس قهوة ويشوف معاهم
ينيس: دوكا وحدي راح نعرف ، متخمميش راح تبراي وغير نتي اللي تكوني تاعي

وصلو للدار ڤارات ، دارت شافت معاها
إيلصا: روحي ريحي دوك نقولهم يبعتولك حاجة تاكليها
آيلا: لالا راني شبعانة ، نريح برك
إيلصا: كيما تحبي ، تبسمتلها وجات هابطة ، ممبعد عاودت دارت عندها
آيلا: متقوليلهمش واش صراا ياك ، باش ميتخلعوش فباطل !
إيلصا: اوكي ، بصح راكي سور غير دوخة !
آيلا: اممم مالا واش راح يكون ؟
إيلصا: منعرف ، لانيمي ولا ماشي مليحة
آيلا: لالا متخمميش مكان والو ، تبسمتلها وهيا هبطت داخلة وإيلصا راحت تڤاري الطونوبيل
راحت طول لبيتها غلقت عليها الباب وتكسلت على الفراش تخمم ، لكن التعب كان كتر منها غفات