جمعتنا القرابة *الجزء الثاني* (أنت قدري)

Partie 52/53

كان خارج من بيتو ، حط يدو على الپاص باش يفتح الباب ، وهيا تتفتح فوجهو ، طاخت الباب فوجهو ، غلق عينيه مغزل ، وهيا بقات واقفة كي الصنم ، فتح عينيه بالشوية شافها ، غلق الباب ، وجبدها حط يدو على راسها باش ماتتوجعش وخبطها مع الحيط ، ذبلت عينيها غير شافتو هكاك ، وهزت يديها تستعمل تسgملو فالكول تاع الشوميزي ، هدرت بصوت محلون

لونار: آرام وين راك رايح ؟ ، شاف معاها حاب يخبطها بصح راهو صابر
آرام: لونار علاش جيتي ؟ ، حوست تبعد منو بصح كان حاصرها مع الحيط
لونار: شفت الڤيديو تاع أديم ، بعتوهولي وجيت نقلك
آرام: علابالي
لونار: أصلا مفهمتش كيفاش خممت ميكونش علابالك ، خلي نروح ، جات رايحة ، حكمها رادها لبلاصتها
آرام: دوكا خلينا من الڤيديو علابالي ولا معلاباليش ، وقوليلي كيفاش تراضيني
لونار: أنا علاش ؟
آرام: علاااش ؟ ووجهي لي خديتيه بالباب نسيتيه
لونار: اووو ماشي بلعاني
آرام: ميهمش ايا راضيني تشو ، قلبت عينيها
لونار: نقدر نبوسك فخدك برك
آرام: روحي برك ، معليش اني صابر حتى يفرج ربي ، قربت باستو من خدو .... نورمالمون كل ساعة ندي وحدة هكاا نطلع بيه المورال ، تبسمت
لونار: هيا نخرجو
بعدلها ودارلها بيدو تاع اتفضلي ، وخرجو ورا بعض ، هوما بداو يقربو يوصلو لتحت وهوما يسمعو الحس ، شافت معاه .... واش كاين ؟
آرام: اني معاك لالا ! ، اهبطي نشوفو الفلم الجديد

هبطو لتحت لقاو كامي ووجدان متلاسقين وإيلصا حاكمة راسها وساكتة ، لورين واقفة قدام يماها تمسح فالدموع ، وماريا وآزار يسكتو فيهم باش ماتكبرش الحكاية ويسمعو الرجال ، دخل ينيس من برا ومروان لحق على آرام ولونار ، وخزر مع لونار يسقسي فيها بعينيه ، وهيا عوجت راسها تاع معلاباليش ، قرب عندهم آرام مقاطعهم
آرام: واش كاين ليوم تاني ؟ ، شافت معاه ماريا مخلوعة وقاعدة تخزر لفوق باش ميهبطش زاكو ولا صرب ، بقاو ساكتين .... راني نهدر معاكم (بالعياط)
آزار: تحط ڤيديو مانعرف وين تاع أديم ولورين جات تبكي وتقول هوا اللي دخل عندها بالسيف هياا خاطاها حنا مفهمنا والو ، مسح وجهو وشاف مع لورين مقلق ، مكانش حاب اللي فالدار يسمعو وهيا سمعتهم كامل ، شافت معاه وجدان وهدرت بالعياط
وجدان: وليدها ماشي مربي ، حب يتعدا على بنتي ، وانا نقول وشبيها مخزونة فالبيت من نهار الخطبة ، نطق ينيس
ينيس: ماتعدا عليها ما والو ، صح بالاك دخل عندها بصح بنتك تاني عاجبها الحال وكانت قادرة تحبسو ، ضحكت بالفقصة ولورين شافت فيه
وجدان: هههه خلاص ولاد العم دوك يتحاماو مع بعض وبنتي برانية تردو فيها الضلام ، آرام مسح وجهو مقلق وماريا نطقت
ماريا: واش راكي تخلطي ؟ من وكتاش حنا نتحاماو ؟ وشبيكي وجدان !
وجدان: مشفتيش وليدك ؟ كان يحصل فبنتي  ويدافع على وليد عمو !
آزار: متبدايش تفهمي النقص ، راهو يفهم فيك يعني الغلطة منهم للزوج
وجدان: مكانش منها انا بنتي مديرهاش ، هو اللي ميصلحش
كامي: لاحول ولاقوة قلتلك انا وليدي يصلح ؟ الله ينعلو موصيبة كحلة سعيتها ، بصح تاني بنتك كانت قادرة تحبسو هادا واش قصدنا ، راحت عند يماها  تبكي .... هاي زادت ناضت تترهبن
لورين: والله يا ماما هو ماخلاليش الفرصة كان معلابالوش واش راه يدير ، خبطت الفرشيطة فوق الطابلة وكامل شافو معاها
كامي: إيلصا وشبيك ؟ ، شافت مع لورين
إيلصا: علاش تحبي تلعبي دور الضحية ؟ ، وقفت رايحة عندها .... شوفي ، قدمتلها يدها .... راكي تشوفي ، هادا كامل بسبابك ، زادت طلعت يدها لوجها .... وهادا تاني بسبابك ، شافت معاها لورين وهدرت بغل
لورين: ماشي أنا قلتلو يضربك هوا... ، قاطعتها
إيلصا: شتي كي يحصل فيك بنادم حاجة خاطيتك ، علاش نتي متقبلتيها ؟ اه ! ، بصح مشي هاداك النهار نتي مسحتي كلش فيا قلتيلي أنا السبة هممم ، ماشي دعيتي عليا ؟ ماشي شبهتيني باللفعة ؟ ، طاحو دموعها .... هادو كامل قلتيهملي هاداك النهار ، ودوك نتي كي قالولك راكي غلطانة كيفو معجبكش الحال ، مسحت دموعها .... مالا نقلك أديم صح غلط بصح حتى نتي تاني ممنعتيهش ، يعني في زوج غلطانين مكان علاه تحصلي فيه وحدو ، وعلابالي بلي يحبك يمكن غريزتو غلبتو غلط بصح كون كبرت لحكاية قادر يدير كلش علاجالك ويمسح كلش فيه ، شفت الخوف فعينيه عليك ، على عكسك نتي فأول مشكل مسحتي كلش فيه ، قلتهالك ونعاودهالك لورين نتي متحبيهش وكون تبعدو خير ليكم وللدار ، هزت روحها وخرجت لبرا ومروان تبعها بعينيه ومبعد لحق بيها