صباح جديد ، كالعادة كل واحد راح لشغلو ولبنات لورين راحت تقرا ممبعد تلحق بيهم فالغدا ولوخرين راحو كانو يدورو فالقصبة ، كي لحق وقت الغداء لحقت بيهم لورين تغداو وراحو يشريو شويا حوايج باش يروحو لوهران ، دخلو للمول بداو يدورو ويشريو ممبعد كي كملو راحو للدار
عند آرام
كان غارق فالخدمة ، حتى دقدق الباب ، شاف معاه لقاها حنان جات عندو ، طلع حاجب من الزيارة المفاجئة هادي
حنان: surprise
آرام: غبرتلك الطريق ! ، تنبزت من هدرتو ، وقدمت جيهتو وقعدت
حنان: توحشتك جيت نشوفك
آرام: بيزار
حنان: معجبكش الحال كي جيت ، تحب نروح !
آرام: ادا فهمتيها نتي هكداك هاديك حاجتك
حنان: افف آرام وشبيك مقعدتش كيما اللول ، كان يخدم وطلع راسو يهدر
آرام: وشبيني !
حنان: حسيتك تبدلت من جيهتي وليت ماشي كيما بكري تفرح كي تشوفني معلاباليش
آرام: بكري ودوك تبدلو بزاف حوايج حنان ، حتى انا وتبدلت
حنان: اممم زعما كي مابقيناش كيف كيف
آرام: واش دخل !
حنان: انا قلت... ، قاطعها
آرام: واش جابك ؟
حنان: جبت ماما راح دير وحد ليزاناليز فالابو اللي اونفاص ووحد الساعة باش تكمل قلت نجي نشوفك ومنها نضيع الوقت
آرام: عندي خدمة راهو لهيك الفوثاي اقعدي فيه واستناي الا حبيتي ، مستناهاش تجاوب وكمل يخدم ، راحت قعدت مغزلة ومرة مرة تشوف معاه تتيه فيه
دخلو للدار هازين الحوايج فرحانين دخلو للصالون ، لقاو كامي وآزار وماريا قاعدين يشربو قهوة ويحكيو
لونار: السلام عليكم ، ردولها السلام
آزار: راني نشوف فيكم درتو shopping 🛍️
ايلصا: ايه طاطا قالك لازم نشرو حوايج جداد نروحو بيهم لوهران
كامي: تقول وهران جاية فكاش بلاد راكو غي هنا رايحين
لورين: انا متت رجليا ام يوجعو
ايلصا: وانا حانموت بالجوع حتى دخت ، عيطت للخدامة تجيبلها حاجة تاكلها
ماريا: لبنات حقا نهار الجمعة راي جاية يما فاطمة
لورين: ماني جاية !
ماريا: ايه
لورين: اياي توحشتها
كامي: ايه عندها شحال مجاتش وحبت توصل على جداكم
لونار: مرحبا بيها توحشنا حلاوة لسانها وقمياتها والله تفاجي على الخاطر
آيلا: شكون هادي ؟
ماريا: هادي يمات وجدان وهيا خت يما حسينة (الجدة) من الرضاعة ، بكري ماكانش علابالنا حتى نهار جا يتزوج صرب ووجدان باش تلاقاو وعرفنا بلي خواتات
ايلصا: بصح والله ماتقول خت جدة ، ميتشابهوش كامل
لورين: خواتات من الرضاعة باينة ميتشابهوش
ايلصا: راني نهدر فالعقلية مانو حسينة متهدرش بزاف وتحب تقعد وحدها ، عاقللة ، اما مانو فطوم le contraire كامل تحب كامل ندورو بيها تgصر وقبيحة تاني الله لا طيح مومن فلسانها
لورين: هيا كون تجي آرام تزوجو وتروح 😂
ماريا: خلي ماتقدرلو غير هيا ، هيا تهدر وتيليفونها يصوني جابتهولها الخدامة ، شافتو لقاتو هو
ماريا: عمرو طولية ، الو وي آرام
آرام: يما اطلعي لبيتي تلقاي وحد الدوصي فوق البيرو ابعتيهولي مع الشوفور
ماريا: d'accord
طلعت ماريا لبيت آرام جابت لدوصي وهبطت لتحت تحوس على الشوفور ، ملقاتوش ، دخلت للصالون
ماريا: مشفتوش عزالدين ؟ مكاشو لبرا
كامي: ايه انا بعتو يشريلي وحد الدواء خلاصلي ، علاه !
ماريا: هاد الدوصي يحتاجو آرام وقالي ابعتيه معاه دوكا معلاباليش كيفاش ندير ، واقيل نعيطلو يجي هوا
لونار: خلي طاطا متشقيهش انا نديهولو باينا عندو الخدمة علابيها مقدرش يجي
ماريا: صحيتي لونار ربي يحفظك ، مدتهولها ولونار خرجت رايحة عندو
أنت تقرأ
جمعتنا القرابة *الجزء الثاني* (أنت قدري)
Romanceالجزء الثاني من حكاية جمعتنا القرابة (باللهجة الجزائرية) راح يكون أكثر مركز على الأولاد يعني ولادهم بعد ما كبرو وتاني راح نرجع للقطات فالماضي ، نشاله يعجبكم كيما الأول 🤍🤍
