جمعتنا القرابة *الجزء الثاني* (أنت قدري)

Partie 20

خارج من الدوش وفوطة فوق شعرو ينشف فيه ، شاف معاها لقاها واقفة فالبالكون ساهية وخصلات شعرها اللي فيهم شويا الشيب باين تحت الخيمار يدي فيهم الريح ، قرب لعندها ، حط يدو على كتفها حتى خلعها ، دارت ليه
آزار: راسم كملت ، اومألها براسو ، وقرب عندها حطلها راسها على كتفو
راسم: مزلتي تخممي
آزار: كيفاش حبيتني منخممش وانا من نهار راحت نهار معشتوش مليح ولا رقدت رقدة كيما الناس ولا ضحكت كي الناس ، مكانش علابالي وين راهي واش تاكل واش تشرب كيفاش عايشة حتى من دراهم اللي كانو عندها فالكونط ممستهمش ، ممبعد نعرف بلي بنتي راهي بخير وكبرت الماركة تاعها وراهي ناجحة وكامل الناس تعرفها غير حنا وعاجبتها بعيدة علينا وحنا آخر همها ، كيفاش حبيتني منخممش قولي ، دايما نقول بالاك معطيتهاش الحنان الكافي ، بالاك كي عاشت مفرقة ، دايما نلوم روحي ونقول انا السبة باش بنتي راحت وبعدت
راسم: شووووت واش هاد الهدرة ، ماكانش ام كيما نتي بالعكس علابالنا كامل شحال كانت تحبك ، بالاك ملي عرفت بلي هياا السبة حبت تبعد تعرفيها متحبش تآذي حتى بنادم
آزار: وهياا كي بعدت مآداتناش ؟
راسم: متقدريش تفهمي تخمام الولاد تاع دوك ، شوفي متخمميش تعيا وترجع كيما راحت شحال راح تعيا بعيدة على والديها ، متقلقيش روحك برك ، كان يصير فيها وهو اكتر منها مهدود ، تنهد ، يالله نهبطو لتحت ، مسحت دموعها وهبطت وهو موراها

باقية ففراشها ماللي وصلت للدار وهياا في حالة يا تبكي يا تخمم ، قاعدة فالظلمة معنكشة ففراشها شعرها مطلوق على الجهة لوخرا ، هزت تيليفونها تشوف مع النيميرو تاعو مترددة تعيطلو ، خممت خممت ، حتى عيطتت....
مدة وهو يصوني كي جات تتقطع الآپال هز عليها وهياا كانت نحات التلفون من ودنها في بالها مردش ، واطلقت العنان لدموعها مرة وحدوخرة تبكي وتشحق وهو يسمع فيها ، حس قلبو ضرو ، هز روحو وديمارا جاري لعندها يشوف وشبيها وباقي الآپال تمشي وهو يسمع فشهقاتها ، وصل ، فتحتلو الخدامة
آرام: وين جاية بيتها
لينا: اللخرة على اليمين ، طلع جاري لعندها ، فتح الباب لقاها مكمشة فالفراش مغطية وجهها بالغطا وباقية تبكي ، مشا لعندها نحالها الغطاا من على وجهها بشوية ، شافت معاه واتقعدت ، شويااا كي بدات تستوعب بلي هواا حضنتو وشهقاتها كانو غير يزيدو ، هوا مترددش وضمها حشاها فصدرو بيد ، وهز يدو التانية مجوزها على شعرهاا وهياا باقية تبكي ، مخليهاا على هواها تفرغ قلبها وهو غير يسمع ، حتى حس بيها حبست شويا وانفاسها بداو ينتضمو بلعقل ، بعدت عليه وهبطت راسها ، عاود طلعهولها بعدلها شعرها من وجهها ردو ورا ودنيها ومسحلها دموعها ، نطق بصوت حنين
آرام: علاش هاد البكاا كامل لونار ، بقات تخزر معاه ومقادراش تجاوبو مقادراش تفرغ قلبها وتحكيلو خايفة وهادا خوفها اللي معذبها كتر تخسر الناس اللي تحبهم بما فيهم هواا ، زادو تغرغرو عينيها بالدموع ، دارت براسها للجهة لوخرة وبعدت ، جبدها لعندو ، وعاود حطلها راسها فصدرو
آرام: ابكي حتى تشبعي راني هنا ، تحبي حتى للصباح المهم تريحي ، وادا تحبي تهدري اني نسمع فيك تاني
لونار: توحشتهم آرام ، ساكت مخليها تكمل ، توحشتهم وربي عالم شحال نحبهم و مكونتش حابة نروح ونخليهم ونحرقلهم قلبهم معايا بصح مشي غرضي والله
آرام: علابالي بلي حسيتي الذمب عليك ، معليش بصح تقدري تروحي دوك لعندهم وتطلبي السماح ، علابالك بلي ماراحش يردوك و راح يفتحولك يديهم بلا ميخممو ، بعدت عليه
لونار: منقدرش آرام افهموني منقدرررش ، شاف معاها وطلع حاجب ، مسحت دموعها ووقفت تهدر بيديها ، كيشغل انا ماشي حابة كيشغل انا عاجبني الحال بعيدة عليهم يااك ، مكفانيش عشت مفرقة بيناتهم ودوكاا مبعدة عليهم للزوج ، راني نتحرق من داخل آرام كل يوم نخمم كون تصرا لكاش واحد فيهم حاجة وانا منكونش قلبي يتقطع ، راني عايشة فالعذاب واحد ماراهو حاس بيا ، كانت تشد فقلبها وتهدر، وقف راح لعندها ، حكمها من كتافها
آرام: علاش متقدريش ، كشما كاين ؟ اهدري لونار ، شوفي فيااا ، شافت فيه ، تقابلو عينيهم ، راكي مخبية كاش حاجة ؟ ، بقات ساكتة وتشوف معاه ، قوليلي برك واش كاين ومتخافيش ، نوقف معاك للدقيقة اللخرة نتي غير ديري فياا confiance ، معلابالهاش علاش حست بلي عندها سند فحياتها لأول مرة تقدر تتكل عليه ، تقدر تحكيلو بلا متخاف ، تنهدت
لونار: آرام انا باش روحت من الدار مكانش بسباب.....
صونا تيليفونها ، بعدت منو لقات نيميرو متعرفوش موراها وصل ميساج من نفس النيميرو