فات النهار بالچصرة مع ينيس وآيلا ، وحسينة هبطت عندهم وكملو جمعتهم ، أما لمار فقضات شوية ورجعت للدار ، تلاقات بوزيد اللي خبرها بلي تفاهم مع الپانتر وغدوة يبدالها فالسبيغة
وهكدا جاز نهار جديد وأحداث جديدة
ناضو الصباح فطرو فرحبة وهوما ورا آيلا اللي كانت مشي قادرة تاكل وهوما يسيفو عليها ، مفششينها ولونار كانت تخزر معاهم وتعاود تخزر مع آرام اللي كان عينيه على خوه كيفاش فرحان ، هبطت راسها وحطت يدها على يدو وهو شاف معاها وعاود دور وجهو ، غير كملو هزو رواحتيهم وركبو رايحين للفيرمة
جاز النهار كيف كيف ، عادي چصرو واللي خرج يلعب فالحصونة ، اللي هبط للبحر ، وفالأخير سهرو كيف كيف مجموعين مع حسينة شوية اللي كانت حالتها تدهور يوم بعد يوم وهوما يحاولو ميبينوش حزنهم ، ممبعد طلعت لبيتها وهوما بقاو لتحت
كانت معاها فالبيت قاعدة حاطة يدها على خدها وتشوف معاها ، هيا اللي كانت تضفر فشعرها كعادتها ، تخمم بلي تقدر على يامات هاد المنظر متزيدش تشوفو حياتها كامل ، قلبها كان يتعصر عليها ، مستحيل تقدر تصبر ، حسينة بالنسبة لإيلصا حاجة كبيرة مشي غير مجرد جدة 👵 ، تعرف سرارها ، توجهها ، قاطع شرودها كي هدرت معاها
حسينة: علاش راكي دابلة .. توحشتيه ، تنهدت من أعماق قلبها ، زادت فكرتها فجرح آخر تناساتو هاد اليامات
إيلصا: منكدبش .. توحشتو بصح قطعت أملي فيه
حسينة: يعني صبرتي .. صبرتي .. كي جاي ديسيديتي تقطعي الأمل
إيلصا: مجايش علاجالي ماني .. زيد فقت بلي راني نعلق روحي بأمل زائف .. راح نشوف حياتي خلاص .. وهو ربي يسهل عليه
حسينة: مع من ؟
إيلصا: أشرف .. مسكين شحفتو معاايا وهو صابر عليا .. ياك كنتي تقوليلي شوفي اللي يحبك ماشي اللي تحبيه .. هانا رايحين نديرو برايك
حسينة: صح .. قلتهالك .. مي راكي متأكدة ؟ يعني تقدري تغمي هاداك الحب فصدرك .. ومتضلميش بن الناس معاك .. خممي مليح ، حطت يديها على راسها
إيلصا: معارفاش واش ندير حايرة .. بصح اللي قررتو هو راح نمد فرصة لأشرف وخلاص .. و ندير جهدي باش نحبو .. خاطر يستاهل صح
حسينة: الله يكتبلك اللي فيه لخير هادا مانقول .. مي انا ليا متتسرعيش
إيلصا: آمين .. معليش نسيي ، خزرت فيها بعيون مدمعين 🥹 .. ماني نقدر نرقد فحجرك وتفليلي شعري كيما بكري ؟
حيسنة: ارواحي لهنا .. ماتكبريش ، تبسمت وقدمت عندها حطت راسها على حجرها وهيا تفليلها متبسمة ، وإيلصا حيلها مهدود والدموع حابساهم بالسيف مالقات منين تشدها
لتحت كانو قاعدين هوما الثلاثة لونار اللي كانت حاطة رجل على رجل وتچصر معاهم و لورين مربعة يديها وتسمع ليهم يحكيو على حياتهم الزوجية اللي شجعتها نوعا ما تخمم تتزوج ، وآيلا اللي حتى هيا كانت طالقة رجليها على وحد الطابلة وفحجرها طبسي معمر بالدلاع وتاكل ، دارت ليها لورين نحاتولها
لورين: براكة عليك .. مشي مليح كليتي بزاف قريب دلاعة وحدك ، نحاتلها الطبسي وكملت تاكل
آيلا: حاسبيني الله ، قلبت شواربها .. تشهيتو بزاااف وكل ماناكل قلبي يقولي زيد
لونار: بصح دوك تخلصيها مال .. يا تحكمك كرشك .. يا ترديه كامل
آيلا: معليش لمهم نبرد قلبي دوك ، شافو ينيس وأديم جايين بجيهتهم وخصوصا ينيس اللي جا كيف البرق نحالها الطبسي وهيا هبطت راسها
ينيس: راح تهبليني نتي .. مفيهاش .. مشي قلتلك متزيديش على زوج مورصوات
آيلا: قلبي زاغ ليه مشبعتش .. حرام عليكم خلوني ناكل ، لحق أديم خطفلو الطبسي وعاود مدولها
أديم: كولي متبعيهش .. هادا قرا شوية ميدسين ولا يزيد عليها
ينيس: يا ودي مشي مليح ليها بزاف
أديم: بصح راهي تتواحم .. ستخايل متخليهاش تاكلو ووليدك تخرج عندو قلبوزة حمرة ولا دلاعة مصورة فوجهو
آيلا: صح ؟ ، قعد يدور راسو بلا حول ولا قوة وهيا غير تاكل ومركزة مع أديم
ينيس: ومعرفتي تتواحمي غير على الدلاع
لورين: اي حاجة كون dépassez les limites تاعها تولي تضر مشي غير الدلاع
لونار: احمد ربي تواحمتلك على حاجة تنتكل .. انا صحبتي توحمت على الرملة تاع البحر
آيلا: اويلي وكيفاش لقات le goût تاعها ؟
ينيس: هاكدك نتي زيدي مديلها فالأفكار .. هداك ماخص ، خزر فيها أديم
أديم: بنين بنين .. يشبه للڤوفريط برك مرحي
آيلا: صح ! ، شافت مع ينيس وبدات تدمع .. تشهيتها ، شد راسو وأديم جاه الضحك
ينيس: حسبي الله عليكم نتوما الزوج
أنت تقرأ
جمعتنا القرابة *الجزء الثاني* (أنت قدري)
Romanceالجزء الثاني من حكاية جمعتنا القرابة (باللهجة الجزائرية) راح يكون أكثر مركز على الأولاد يعني ولادهم بعد ما كبرو وتاني راح نرجع للقطات فالماضي ، نشاله يعجبكم كيما الأول 🤍🤍
