جمعتنا القرابة *الجزء الثاني* (أنت قدري)

Partie 45/46

الساعة ل 11:00 صباحا :

خرجت من الدوش لابسة sortie de bain ، شعرها ملفوف بفوطة رقبتها عليهم قطرات تاع الماء هبطو من شعرها ، راحت للمراية وبقات تشوف مع روحها مدة ، هزت كريم للجسم miss dior وبدات ترطب فجسمها وهيا ساهية حاكمها شوية خوف وتوتر
كملت وبقات تهدر مع نفسها فالمراية

لونار: ليوم راح نحط خاتم فهاد الصبع ، شافت مع يدها .... راح يولي اسمي مربوط باسمو ، راح نرجع تاعو ، هههههه ✨تاعو✨ ، هادي شحال كنت نكره هاد الكلمة يقولهالي كاش بنادم نحسو طيح من قيمتي ، دوكا راهي عاجبتني ؟ ومادابيا يقولي نتي تاعي ، علاش ؟ ، لهاد الدرجة تبدلت ! ، واش تبدلت علاجالو ؟ ، ولا برك كنت نسمعها من اشخاص غالطين مكانتش تعجبني ودوكا كي هو الشخص المناسب تقبلتها ! ، سكتت وتخسرت ملامحها كي تخالطولها أفكار وحدوخرين .... وزعما نقدر على حياتي الجديدة معاه ؟ ، هو باين راح يحب الأولاد من اللول وأنا ممستعداش ليهم ، راح نقدر على عقليتو ؟ ، سكتت .... ، هزت المشطة وبدات تسلك فشعرها ، علاش مخممتش فهاد الشي فاللول حتى لدوك ! ، ياك غير راح نتخطبو وفهاد الفترة نزيدو نتعرفو كتر تفاهمنا اللهم بارك متفاهمناش كل واحد ربي يسهل عليه
بصح زعما راح نقدر أنا نتخلى عليه ؟ ، افففف واش هاد التخمام السلبي ياربي !!!

دخلت لعندها والبسمة شاقة فمها من الشق للشق ، وموراها الخدامة بسنيوة تاع الفطور حطتها وخرجت ، قدمت عندها شدتها من كتافها وهيا تشوف معاها من المراية
آزار: صباح الخير يا عروس ، تبسمت
لونار: صباح النور
آزار: راني جبتلك فطورك وحد الساعة راح يجي اللي يخدملك شعرك و ال makeup artist
لونار: اوكي
شافت معاها وجبدتلها وجهها عندها بحنية
آزار: وشبيكي لونار ؟
لونار: مقلقة شوية ماما خايفة من الخطوة اللي راح نديرها ليوم ! .... راحت قابلتها
آزار: بسم الله عليك ، واش هاد التخمام اللي جاك ليوم
لونار: معلاباليش والله
آزار: استغفري لونار هادا غير الشيطان راه يوسوسلك هكاا
لونار: أستغفر الله
آزار: هكاك كي يجيك أستغفري ، وحطي شوية قرآن يبعد عليك هاد الطاقة السلبية ، أنا نروح نشوف شغالي
لونار: اوكي ، قدمت عندها وحضنتها ، تمسحلها على ضهرها بالشوية
آزار: لونار راح تدي سيد سيدهم اللي ينحيلك option اسمها التخمام كامل من راسك ، ما تقلقيش روحك وهاد الأفكار يجو اي وحدة فخطبتها من الضغط ، متخليهمش يصيطرو عليك وافرحي ياك بنتي
لونار: ايه راح نسيي نلهي روحي ، تبسمتلها وراحت ، وصلت للباب وضارت عندها شافت معاها وراحت
بقات لونار وحدها حطت قرآن باش متزيدش تخمم ، حست روحها بدات ترتاح نوعا ما ، وقفت شافت مع dress تاعها ، وبقات متبسمة تخمم كيفاش راح يجي عليها

بعد ساعات كانت كل وحدة فبيتها مع مصفف الشعر وال makeup artist تاعها توجد فعمرها للعشية