جمعتنا القرابة *الجزء الثاني* (أنت قدري)

Partie 69

لحق وقت العشاء وجات مليكة خبرتهم ، ناضو رايحين ، حتى نطق صرب
صرب: ولورين وين ؟ ، غير سمع اسمها شاف مع حسام (حسام وأديم the bluetooth is connected ) ، هبط راسو وراح يقعد
وجدان: فبيتها بالاك رقدت
صرب: مليكة عيطيلها تهبط تتعشا ... وتجي تتلاقا أديم
اللي كانو تما عارفين الحكاية وتقريبا كامل ما عداه هو ، بقاو يشوفو مع بعض ، ومليكة طلعت تعيطلها ، وهيا هبطت بخطوات تقال وحدة للقدام وعشرة للور ، شافها صرب ، تبسم ... روحي سلمي عليه راكم هادا شحال متلاقيتوش
قدمت عندو وهيا مهبطة راسها ، وقف ومدلها يدو وهيا مكانتش من العاكسين
أديم: راكي مليحة ؟ ، طلعت راسها على صوتو وتلاقاو عينيهم ، كان يخزر فيها تايه تبدلت بزاف كبرت وزادت زيانت ، خدودها اللي كانو حمرين بالحشمة ، بقا تايه فيها ، هادي هيا الإنسانة اللي كان معجب بيها  وحاسب اعجابو طفا من جيهتها ، بصح فلحظة اكتشف بلي كان غالط
اما هيا فكدبت يطلق يدها لانو مشي قادرة تزيد تصبر ومتسوطيش عليه تحضنو خاطر توحشتو بزااف ، شوقها ليه فهاد الأربع سنين كان كبير ومخلط بالخوف تاع انو ميسمحلهاش

قعد كل واحد فيهم فبلاصتو وبداو ياكلو وكل مرة يحكيو فحاجة ، وهو عينيه كانو يهربو غير ليها ، شافو آرام ، قدم عندو

آرام: احكم عينيك راك كليت الطفلة ، دار شاف معاه ورجع دور عينيه ... زيانت اه !
أديم:  تبدلت وكبرت .. مكونتش متخايلها ترجع هكاا
آرام: منسيتهاش راك تبانلي ، شاف معاه
أديم: منعرف .. مي راهي تبان هكاك ، زاد رما عينو ليها يشوف معاها
آرام: متقعدش مبوه فيها هكا حتى يفيقلك باباها
أديم: عينيا راهم يهربو لعندها لا ارادي
آرام: مالا اتكل على الله وخطبها ياك كبرت دوك وماخصك والو وزيد راهي تعجبك ونتا عاجبها ، بقا ساكت

كملو العشاء وخرجو للحديقة اللي كانت مجهزة بقعدة تاع آتاي فاللرض وبوفي فالشط ، ومع شطو قالب كيك ، راحو قعدو ولورين ، راحت تقعد فالجيهة نفسها اللي قاعد فيها باش ميكونش مقابلها 

هدرة تجيب هدرة ، حتى وصلو لمروان ، الموضوع اللي خلا إيلصا تركز معاهم فيه ، مع أنها غضبانة هادا عامين متفكرهاش فعيد ميلادها وهدا الثالث ، يالوكان بميساج بصح غير سيرتو تنسيها فكلش

أديم: الله يبارك دار اسمو ومنكدبش قبل منخدمو كيف كيف معلاباليش بلي هواا مولاها ... كامل شكرولي فيه
آرام: إيه ... يعني عيا هادو العيمان والله يستاهل
صهيب: الصفقة الجاية قالي راح يديرها مع BMW
زاكو: باش توصل نتا لشركة كيما هادي لازم تكون خدمتك professionnel واسمك سابقك
آرام: صح ... المهم ربي يعينو يوصل وين راه حاب ... هوا تعب فحياتو ودوكا راهو ينال
ماريا: خاصو غير يستبيت دوك
راسم: اوهوه
آزار: واشن ؟ واش خصو راه ولا business man كبير مشاء الله .. حقق حلمو .. ختو اللي كان مسؤول عليها تزوجت يعني تهنا عليها .. واش بقا ؟ .. باقيلو يدير الدار كيما مطايريه
لونار: منعرف مروان من بكري الزواج مراهش يخمم فيه ... بصح كون يلقا وحدة توالمو مشكيتش يقول لالا
أديم: ياسبحان الله ونتوما شفتوه الا عندو ولا لالا ؟ ، خزرت فخوها بصدمة
كامي: وواش راه يستنا مالا ؟
آرام: بالاك هيا مواجداش .. متعرفي سوق النساء
فطوم: اصبرو اماتكون من هادوك الچاوريات المخزوقات (مثقوبات) ، بقاو يدورو فراسهم ، وحسام جاه الضحك ، اما إيلصا فبقات تخمم تاع بصح يعني من نهار راح من ثلث سنين ميكونش لقا وحدة حبها ؟ ، ومال علاش قطع علاقتو بيها كامل وكل متعيطلو مغلوق ومخلالها حتى وسيلة باش تكونطاكطيه ، تنهدت من أعماق قلبها
...
أديم: يا فطوم ياك هوا اللي راح يتزوح هنا واش دخلنا فيها چاورية ولا عربية ... ياو تكون حتى هندية تعبد البقر
فطوم: الله لا يخطيه يجيبلي أنا وحدة چاورية تبركك عليا هنا ... واش خلاو بنات بلادو .. الزين .. بنات الأصل .. الضرافة .. الشطارة
أديم: فالشطارة نحبسك .. نمدلك مثال برك .. دوك هادو ، أشار لإيلصا ولونار ... مكصرات اليدين شاطرات ؟
آرام: ااااا اوقف عند حدك أنا مرتي تخرج من يديها العسل ، حكم يدها وباسها ، شاف مع ماريا
أديم: ماريا ماتكون عروستك معقرتلو ونتي لاخبر . ضحكت ولونار طلعت حاجبها
لونار: نهار تاكل ماكلتي تعرف على واش راه يهدر
أديم: ياسيدي بصحتو ، شاف مع إيلصا ... نتي معندك كيفاش تكدبي مزية جيتي ختي ونعرفك بلي تدخلي لچاع لبلايص غير الكوزينة متدخليهاش
إيلصا: معليش نجيبو خدامة
كامي: وكون تديه قساسو قساس عمرو
إيلصا: نجيبها أنا
فطوم: اوخدتي تديه مزلوط .. علاش قطاو الرجال .. من المعارف تاع والديك كامل تدي واحد معندوش
إيلصا: لا حول ولاقوة .. شحال نمرة نقولكم .. أنا ميهمونيش هاد الحوايج .. منيش مخصوصة دراهم .. انا حابة نبني عايلة صغيرة مبينية على الحب والتفاهم وخلاص .. اصلا اغلب اللي جاو يخطبو مشي محبتهم فيا أنا كإيلصا .. حابين اسمي وعايلتي يتناسبو معاهم .. هادا مكان
كامي: نتي واش عرفك .. علاش مديتي فرصة لكاش واحد فيهم ؟ .. ولا راكي تهدري من تخيلاتك !
إيلصا: معينيش
كامي: قولي معينيش ومتبقايش تتاهمي فولاد الناس
آزار: مزال مجاش اللي يوالمها خلوها بغرضها
كامي: علاش راكي تشوفي فيا ديتها بغير رضايتها وزوجتها .. انا راني نهضر كيفاش تقدر ترفض واحد ما خصو والو حتى بلا متتعرف عليه .. كون شافتو وهدرت معاه .. تما تقدر تقول مساعدنيش فالعقلية معلاباليش واش
ماريا: نهار يجي اللي ينبض قلبها ليه راح تختارو بلا متخمم .. كونو هانيين
أديم: داك الساع هاداك ولد الناس نطلبولو الرحمة والمغفرة كي راح يديها
إيلصا: پاپا
زاكو: اهدر على روحك نتا متهدرش على بنتي .. انا بنتي اللي داها ربح وسعد ، تبسمتلو وراحت حضنتو
إيلصا: ربي يخليك ليا يا روحي ، بقات تعوج كامي ففمها معاجبهاش الحال ، وحسام كان يشوف معاهم داير يدو على خدو مبتسم ، فرحان لي راه وسط عائلة متفاهمين ويحبو بعض قد هكدا