جمعتنا القرابة *الجزء الثاني* (أنت قدري)

Partie 118

صباح جديد وأحداث جديدة:
الساعة 10:00 صباحا :
دقدقت فالباب بعد ثواني جاها صوتو
سمير: ادخل ، فتحت الباب دخلت وعاودت غلقتها من وراها ، اشرلها بيدو تقدم عندو
لمار: انعم موسيو سمير عيطتلي ! ، شاف فيها وهو مطلع حاجبو
سمير: ايه ، هز التخطيطات اللي فوق البيرو ورماهم على وجهها ، وهيا حلت عينيها على وسعهم .. وشنو هادا ؟ .. هادي هيا الخدمة اللي تكلت عليك ديريها على چانيتها ! .. وين راه plan de travail اللي عطيتك تتقيدي بيه ولا شلچتي كيما قالك راسك .. علاباك هادو تخطيطات دراري صغار جامي دخلو يقراو ميديروهمش .. مفهمتش واش كنتي تخممي ونتي تخدمي فيهم
لمار: سي سمير احترم روحك هادي واحد .. زوج انا خدمت كلش على الشعرة وكيما طلبت مني زيد فوقت قصير ياربي 24ساعة .. حتى قبل مندفعهم للسوكريثار كنت متأكدة منهم فايت 20 مرة .. مفهمتش وين راهي الغلطة
سمير: وين راهي الغلطة ؟؟ ، هز وحدة من المخططات اللي طاحو فوق البيرو ومدهالها .. هاكي شوفي وقوليلي نتي وين راهم الغلطات ، شدت عليه الورقة وبقات تشوف وحواجبها يتكمشو معاها ، طلعت راسها فيه
لمار: هادو ماشي ديالي ، جاتو الضحكة مخلطة مع الفقسة
سمير: تسما مالقيتي فاش تحصليها رجعتيهم ماشي تاعك !
لمار: صدقني والله ما تاعي ، راح عندها يعيط فوججها
سمير: تاع شكون مالا ؟؟ .. علاش انا مديت لكاش واحد خدمة بخلافك !
لمار: شوف مسيو سمير علابالي بلي راك مقلق ومن حقك ليوم اجتماع très important pour toi بصح هادو ماشي تاع تحب دوك نجيبلك لفلاش ديسك اللي اونريجيسثريت فيه المخططات   راهو فالدار
سمير: على الأقل يكون عندك شوية ضمير واطلبي السماح واستعرفي .. لالا نتي حابة تخشني راسك وترجعي روحك مادرتي والو
لمار: بصح اا ، قاطعها ، هدر بحدة
سمير: الصباح مديتي المخططات للسوكريثار ولا لالا ! ، حركت راسها بايه ، دار بضهرو ليها شاد راسو .. علابالك شحال مهمين هاد الناس ليوم للشركة وليا انا قدام بابا .. بصح درت الثقة فيك نتي .. وياريتني مادرتها .. اخرجي ، بلعت ريقها وخرجتها بالسيف
لمار: سمحلي
سمير: برااا .. منحتاجش نشوف وجهك هنا مليوم ، خرجت منعندو تسيي تلملم شتات كرامتها الشوية اللي بقات ، راحت للبيرو هزت صاكها وخرجت
رقية: لمار .. لمار وييين ، مجاوبتهاش وكملت ماشية حتى لحقت للأصنصور ركبت فيه ...

...
ترن ترررن ترن ترررن (صوت التيليفون) ، رمات يدها لفوق table de nuits هزتو وردت بلا متشوف
مصعب: صباح الخير ، غير سمعت صوتو تبسمت وعينيها مغمضين تجبدو ، هدرت بصوت منغنع بالنعاس
لورين: صباح النور
مصعب: مزالكي راقدة ! ، تقلبت على جمبها
لورين: اممم فيقني التيليفون
مصعب: الأميرة النائمة فيقها الأمير ببوسة وانا فيقتها بالتيليفون .. هادا ماشي عدل هادا ، ضحكت
لورين: امم وين راك دوك ؟
مصعب: فالخدمة
لورين: عجبوهم داركم les cadeaux اللي مديتلهم
مصعب: هيا مبتش فالدار باش نعمرلك القرعة .. بصح يكونو عجبوهم
لورين: وين بتت ؟
مصعب: فدارنا ، ترسمت ابتسامة على وجهها
لورين: صحااا ومتدينيش نشوف دارنا هادي
مصعب: si نديك بصح كي تنوضي وتفطري وتوجدي روحك تخرجي وبيان سور تلبسي مستور ونتغداو كيف كيف ممبعد نديك
لورين: tout de suite ، ضحك
مصعب: يالله نخليك عندي خدمة نكملها
لورين: بالسلامة ، كوپات عليه وناضت طايرة للدوش غسلت وبدلت حبطت لتحت فطرت وچصرت معاهم شوية كانو مزال ماراحوش آزار وماريا من غير لونار راحت هيا وآرام لخدمتهم ، ممبعد طلعت لبيتها خيرت واش تلبس سروال دجين كحل عريض علابالها يريكلامي كون يلقاه لاسق عليها مع بودي بيض سامپل بلا درعين يدخل فالسروال وڤاسث كلاسيك توصل تحت ترمتها فالچري ، بوت طالون چري وصاك نوار ، لبستهم وراحت للمراية تسچم مكياجها وشعرها ، مابيد راهي ترسم فالآلينار عينها جات على خاتمها اللي فصبعها مزينو يلمع مع الضوء .. يوووه مزينتو خاتمي ، كملت توجد فعمرها وهيا تغني .. اياك تلحڤني مخطوبة مخطوبة .. ، والفرحة خارجة من عينيها