صباح جديد وأحداث جديدة :
فالدار لكبيرة
هبطو بلواحد بداو يتلمو باش يفطرو على الطابلة مجموعين كالعادة بعد ماروحو فاميلتهم ، دخل أديم آخر واحد ماوبش بالنعاس اما لبقية فكانو يشوفو مع بلايص صرب وعايلتو اللي كانو فارغين حاسين بالصماطة ، جاتهم الشبعة ، اما أديم فكان في خبر كان حتى يفطن بكاش قهوة ، شوية سمعو صوت لباب ، راحت مليكة تفتح شوية وجات عندهم للطابلة
مليكة: صباح الخير عليكم كامل .. مدام ماريا جاو الخدم تاع مسيو صرب يلمولهم حوايجهم ، وقفت ماريا رايحة عندهم وتبعها صهيب وآرام
لقاوهم فلباب 3 بنات و فورچون حابسة واقفين قدامها زوج رجال هازين كراطن فارغين
• صباح الخير .. تسمحولنا نطلعو نلمو قش السي صرب وعايلتو !
صهيب: واش مناويينش يرجعو
•معندنا حتى معلومة مسيو .. حنا جينا نديرو واش آمرونا بيه
آرام: جوزو اخدمو خدمتكم ، تبسمتلو واشرت للبنات اللي معاها يجيبو دوك الكراطن ومشاو مع مليكة باش تعيطلهم بيوتهم
ماريا: تسما خلاص مراحش يزيدو يسكنو معانا
صهيب: كانت باينة من الخرجة تاعهم لبارح
آرام: بصح سمحولي عندهم لحق .. اي واحد يدير النيف .. حتى مرت خوك تقول كانت تصيب غير السبة
ماريا: آرااااااام
آرام: نعرف آسمي .. كيما تعرفيني بلي نقول غير الحق .. ولوستك ولا نوطتك ولا منعرف واش تقولو زادت فيه ، رجع لداخل باش يخرجو هو ولونار وصهيب وماريا بقاو يتغبنو على داك الحوايج اللي كانو يهبطو فيهم ..
...
آرام: يالله نخرجو .. ووجدي روحك لعشية نرجعو لدارنا ، شافو معاه كامل
لونار: علاش مشي قلنا حتى نولد .. نبقا هنا خير
آرام: بدلت رايي .. هاد الدار فيه غير الضبيح والمشاكل وهاد الشي راح يأثر على وليدي ولا بنتي اللي جاي ، دخل صهيب من برا هو وماريا وسمعو
صهيب: آرااااام
آرام: بابا تعمل مزية متدخلش روحك بيني وبين مرتي ، شاف عند لونار اللي قاعدة وتبرقق فعينيها .. نباتو هنا ، ناضت مخطوفة
لونار: معليش لحوايج مزالو فالدار .. كي نحتاج نبعت نجيب ، حركلها راسو بايه وخرجو تابعين بعض
...
لونار: آرام فهمني برك علاش درت هكا قدامهم ، خزر فيها
آرام: واش درت ؟ .. حبيت نرجع لداري .. قلت العيب !
لونار: لالا بصح .. شفت الدار كيفاش مقلب ملازمش نخلوهم هكاك ونروحو لدارنا .. لازم نوقفو معاهم
آرام: علاش نوقفو معاهم ؟ نكاليو لحيوط راح يطيحو !
لونار: اففف .. بلا جياحة .. راني نهدر على الحالة
آرام: إدا عندك شوية عينين وعقل تعرفي تميزي بلي ماعندنا مانوقفو مع بنادم ضالم .. صحاا
لونار: راك تميل لدار عمو صرب يزاف .. روماركيتك شحال من مرة
آرام: نميل للحق ، شاف معاها وتبسم .. ونتي متعييش روحك بالتخمام ، شدلهم يدها وشبكو فيدو وحطو على الڤيثاس وزاد ماشي وهيا دورت راسها وبقات ساكتة ...
بدات تتفاطن بالشوية على صوت الحس والخطوات قدامها ، تقعدت عين فاتحتها وعين غالقتها وهيا تشوف قدامها الخدم كل وحدة واش راهي دير ، دارت لعند ختها ما لقاتها لا هيا لا فراشها وحتى يماها وفطوم مكانش ، ناضت والخدم يصبحو عليها وهيا اكتفات تحرك راسها وخرجت لبرا ، لقاتهم قاعدين والكآبة باينة عليهم ، طلقت روحها على وحد الفوثاي كان تما
ميرال: ياصباح الكآبة
فطوم: وسط التقرقيب هاداك كامل ومفطنتيش
ميرال: نعاسي تقيل
فطوم: هاداك تحشمي تقولي عليه تقيل .. فهميني كيفاش يعطيك قلبك ترقدي وحنا فهاد الحالة ؟
ميرال: مفهمتش واشبيها حالتنا وواش دخل الرقاد فلوسط !
وجدان: لا إله إلا الله .. روحي من قدامي اللي فيا كافيني
لورين: هاد برودة الأعصاب اللي تجيك فالوقت اللي ماشي لازم .. غير خليها عندك
ميرال: حق الله غير نتوما راكم تكبرو فالأمور .. شوفو من منظور آخر .. بلي رجعنا لدارنا .. جاي خونا .. راح نكونو مرتاحينن .. بزاف حوايج
فطوم: متنسايش العايلة تفرقت .. وباباك مراهش يهدر معاكم
ميرال: العايلة .. العايلة .. واش ربحنا منها من غير الهم والصداع والعيب من فوق
وجدان: ميرال متجمعيش .. صرا المشكل مع كامي ماشي معاهم كامل
ميرال: ماما حبة وحدة تفسد الصندوق .. ومتنسايش كيما يكونو هوما دمهم واحد وراجلك اللي هو بابا يبقا صاحبهم برك
فطوم: هاد التخمام تاع الشياطن غير خليه عندك وكملي ترقدي خير
لورين: تكوني مليحة حتى تنطقي ترجعي كي الخرااا
ميرال: تطليهم على وجهك ، شافت مع الحالة .. پاپا مكانش ؟
وجدان: خرج الصباح بكري
ميرال: كون مصباح ونتي تخممي كيفاش تراضيه مشي خير
وجدان: علاش لقيت ولابيت .. زعما متعرفيش زعاف باباك
لورين: انا مانيش متحركة منا .. ومراحش نرجع نخدم حتى يروحلو الزعاف
فطوم: بصح هو من اللي يخرج الصباح حتى يرجع لعشية
وجدان: ايه صح .. روحي تخدمي متضيعيش ليامات هكاك ، شافت عندها ميرال بالشط
ميرال: صبتيها سبة ومكيش حابة تتلاقاي مصعب ياك ! ، دورت راسها عندها
لورين: واش دخلو ؟
ميرال: لا قلت بلاك حشمانة منو
لورين: واش راكي تخرفي .. نوض خير خاطر كون نبقا هنا معاك يا نكصرلك فمك يانبعتك عند ربي تتحاسبي direct ، ميرال جاها الضحك اما هيا فناضت مخليتهم ...
أنت تقرأ
جمعتنا القرابة *الجزء الثاني* (أنت قدري)
Romansaالجزء الثاني من حكاية جمعتنا القرابة (باللهجة الجزائرية) راح يكون أكثر مركز على الأولاد يعني ولادهم بعد ما كبرو وتاني راح نرجع للقطات فالماضي ، نشاله يعجبكم كيما الأول 🤍🤍
