راحت عندها كامي
كامي: هدرتي معاه ؟ راهم فالطريق ، حركت راسها ب لالا
إيلصا: بطلو ماما
كامي: وشن ؟
إيلصا: بطلو..
كامي من قوة الصدمة شدتها الفشلة وراحت قعدت وإيلصا بقات تشوف فيهم من واحد لواحد والخيبة بادية على وجوههم من غيرو هوا اللي كان فرحان ، قدم عندها أديم
أديم: علاش بطل ؟ ضاربتو ! ، حركت راسها ب لالا
إيلصا: معلاباليش قالي كل واحد فطريق وخلاص
أديم: هههه هادا حاسب روحو او يلعب ! ، ناض آرام
آرام: دوك نعيطلو نفهم واش خداه
أديم: متعيطلوش امشي نروحو ليه نوريلو انا اللي يتمسخر بختي ، جا رايح حكمو باباه
زاكو: ريح بلاصتك .. التبهديلة هادي تكفي وتوفي .. مخصناش تبهدايل كتر ، مسح على وجهو
أديم: وتجوزلو هكاك
صرب: الله يسهل عليه ربي هناها منو .. باين فيه معندوش كلمة
وجدان: علاش راكو تزربو .. بالاك مقدرش يجي ليوم برك وهيا مفهماتوش .. يديسيديو نهار وحداخر
ينيس: مشي هدة كامل
ماريا: الله لايردو ياسيدي .. تلافو يجيب خلافو
شافت عندو هو اللي كان يخزر معاها بخزرة تاع شتي راني وفيت بكلامي ، قلبت عينيها منو وبقات تسمع لكلامهم
فطوم: الله يهديكم يهديكم هاداك بنادم وديرو عليه هاد الحالة
كامي: يا يما ماشي بينا هوا .. بينا الشمتة
فطوم: نهار كنتي تغني أشرف أشرف مخممتيش فالشمتة
كامي: وين شفتو أنا بلي مايسواش يا يما
آزار: يايما ماتلوميهاش .. يهف والله .. حنا وحسبناه دارچاز
فطوم: بوووه على هاداك ادا كان دارچاز وليد ماماه
هيا اللي هزت روحها وطلعت لبيتها ، اما هوما فبقاو يشوفو معاها في بالهم راهي زعفانة وغايضتها عمرها ، بصح هيا مراهوش هامها وجاتها عادي جدا ، وصلت لبيتها نحات الطالون اللي كانت لابستو وراحت للبالكون تتنفس ، قاعدة غير تخمم ، علاش خيّر اليوم بدات ؟ وواش السبة اللي خلاتو يبطل ياك كان هابل عليها ، زعما حب يردلها التار تاع هادا شحال وهيا ترفض فيه ؟ ، ومروان علاش جا ليوم بالدات ؟ تفكرت هدرتو ✨ مبروك ايلصا .. لعقوبة للزواج .. هادا ادا جاو وكملت الخطبة ✨ وخزرتو تاع مقبيل تبينلها بلي عندو يد باش مجاش
إيلصا: زعما هو السبة باش ماجاوش ؟ لالا منظنش .. بصح كيفاش علابالو بلي ميجيوش ! وعلاش كان يخزر فيا هكاك ؟ ، بقات دور رايحة جاية ، تخمام يدي فيها وتخمام يجيب
لتحت كانت كامي تندب على زهر بنتها المسود وزاكو خايف تضرر نفسية بنتو ، أما أديم اللي كان يدي فيه ويجيبو حاب يشقا لدارهم يبرد قلبو فيه ، اما لوخرين غير ساكتين وغايضتهم إيلصا ، من غيرو هو اللي راشقتلو وياكل من الحلوة اللي محطوطة فوق الطابلة ويستبن ، دخل آرام بعد ماهدر مع أشرف ، غير شافوه دارو عندو
ماريا: واش قالك ؟
آرام: قاعد يعاودلي غير فالله يساهل عليها وربي يجيبلها ماخير مني .. هيا فطريق وأنا فطريق
أديم: باباه الطحان وي .. هادا وين جاتو هيا فطريق وهو فطريق .. كي كان جاري وراها كي الكلب مخممش فيها
زاكو: خلاص خلينا منو .. يتهرد بعيد
كامي: السلوچي طلع عليه النهار .. نورمالمون يحمد ربي صباح وعشية كي خليتها تقبل بيه ، شاف فيها مروان وتقعد متبسم باش يستفزها
مروان: هاه خالتي ونتي كل دورة أشرف .. أشرف ... كي قلتلك ماشريف مايشرف مأمنتينين .. هاكي تأكدتي دوك ، عض من الحلوة اللي كان هازها وهيا قلبت عينيها
ماريا: خلاص مزيا مطفرتش وسمعت الصحافة .. كون قعدنا على سيرة كل لسان
ينيس: تما هو تاني كون رجع عبرة لمن يعتبر .. للي يخلط فساحتنا
آزار: خلاص قصو علينا الحكاية .. عسا ان تكرهو شيئا وهو خير لكم ، قاطعهم صوت طالونها بعد مابدلت وهبطت متبسمة ، بقاو يشوفو معاها مدهوشين ، لحقت عندهم
إيلصا: غير لخير ؟ حاسبيني راح نبكي عليه ولا على غيرو ؟ .. ههه أنا إيلصا ... دوكا بدلولي هاد الوجوه ومتنساوش بلي كانو كاين زوج خطبات ليوم ... تخربت اللولة منحبش تروح التانية فجرتي .. يمال نوضو نكملوها
لورين: واش نكملو ؟ الخواتم ولبسناهم .. خلاص
كامي: اصلا بقات شي بنة ؟
إيلصا: نوضو نتعشاو مع بعض نهدرو على عرسهم نضحكو نحليو
فطوم: ايه نوضو مقاعدين حازنينلي هنا .. تقول شكون مات .. انا هاداك راس الكسكاس نهار شفتو معجبنيش ، قدمت عندها ايلصا حكمتها من كتافها
إيلصا: هاا الناس اللي تفهمني .. امشي فطوم ، راحو للطابلة تاع العشاء وأول واحد لحق بيهم هو مروان ، قعد فبلاصتو
أنت تقرأ
جمعتنا القرابة *الجزء الثاني* (أنت قدري)
Romanceالجزء الثاني من حكاية جمعتنا القرابة (باللهجة الجزائرية) راح يكون أكثر مركز على الأولاد يعني ولادهم بعد ما كبرو وتاني راح نرجع للقطات فالماضي ، نشاله يعجبكم كيما الأول 🤍🤍
