جمعتنا القرابة *الجزء الثاني* (أنت قدري)

Partie 21

دخلت لبيتها بعد يوم كامل وهيا فالخدمة ، نحات مونطوها وصباطها ، وكملت تنحي فحوايجها ، ودخلت للدوش ، بعد مدة خرجت وهياا لاوية الفوطة عليها وتنشف فشعرهاا راحت جيهت لاكوافوز وبقات ترطب فلحمها ، جات لعندها الخدامة جابتلها كاس شاي البابونج باش تسترخي ، ناضت جبدت حوايجها ولبستهم وراحت تنشف شعرها بالدايسون ، غير كملت ، هزت كتابها وبقات تقراا فيه
فاتت تقريباا ساعة ، هزت راسها شافت الحالة بدات تظلام ، حطت كتابها وهبطت لتحت ، شافتها الخدامة
لينا: مادموازال لونار نحطلك تتعشاي
لونار: ايه وبلا مادموازال تعيشي
لينا: حاضر ، راحت لونار قعدت فال salle à manger ، حتى جات لينا وفيدها العشاء ، حطتولها ، وبقات واقفة ، بدات تاكل وخزرت معاها
لونار: كشماا كاين ؟
لينا: مقبيل جا هاداك اللي جا لبارح وراح لشمبرتك وغير خرج دا معاه النونوس تاعك لكبير ، بقات تخمم شكون جا البارح ممبعد تفكرت آرام
لونار: دا النونوس ؟
لينا: ايه ، بقات متعجبة علاش دا النونوس وجا بلا ميقولها ، مهتمتش بزااف من الجوع كملت تاكل وقالت كي نتلاقاه نسقسيه وخلاص

كان قاعد فبيتو وحاط الpc فحجرو ، ركب فيه الفلاش ديسك بعدما رد كامل الحوايج اللي فالكارط مار ليه ، خرجلو دوصيي مكتوب فبه كاميرا 📷 وهو يدخل يقابلو بزااف تاع لي ڤيديو ، دخل للول لقاها مصورة وهي راقدة ، ودخل للتاني كان البيت فارغ غير الخدامة تسgم فيه ، وبقا يدخل ويشوف اذا كاين كاش ڤيديو فيه كانت تهدر مع هاداك البنادم كاش مايعرف ، حتى طاح فالڤيديو اللي كانت داخلة ممبعد بدات تنحي فحوايجها وبقات بالدوپياس دور، وهنا هو غلق الpc بالزربة ، حتى جاتو لحظة ادراك بلي هاداك الكلب كان يشوف فيهاا هكاا ويمكن اكثر لانو راهي فبيتها اللي تاخد فيه راحتها ، تقلق وحس روحو راهو يفور من داخل حتى نحا التريكو ووقف باقي رايح جااي ، مجرد التفكير انو اي مخلوق شافها هكاك يحس روحو يغلي ويحب يكسر الدنياا
آرام: الطحااان طيح فيدي برك انا نوريلك قاعد ورا ليكران و تهدد فبنات الناس وتتفرج فيهم ، راح للدريسينغ وجبد تريكو جديد ، هز مفاتحو وخرج
شافتو خارج
ماريا: آرام ارواح تتعشا الطابلة اي واجدة
آرام: راني شبعان يماا ، دارت لصهيب تسقسيه بعينيها وشبيه ، عوج فمو تاع معلاباليش
ركب طونوبيلتو رايح لعندها ميقدرش يخليها وحدهاا تماا خايف عليهاا بعد الشي اللي زاد شاف ليوم تاكد بلي راهي en danger ، شوياا ووصل صوناا فتحتلو الباب الخدامة واتبسمت معاه
لينا: مادموازال لونار راهي فالصالون ، اومألها براسو ودخل ، لقاها حاكمة تلفونها وتخلط ، شاف مع الصالون لقاا فيه زوج كاميرات وحدة مقابلة فيها وودة موجهة للجاردان براا ، غمض عينيه كي اتفكر ودخل ، هياا غير سمعت صوت طلعت راسها شافتو قعد فوق الفوثااي مقابلها تعجبت ، حطت التيليفون
لونار: آرام
آرام: اممم
لونار: واش جابك دوك ، حاير واش يقولهاا وزيد ماشي حاب يخلعها ، خبش راسو
آرام: جيت نبات هناا عندك مشكل
لونار: لالا بصح واش من سبة خلاتك تجي تبات عندي
آرام: شحال تسقسي هربت من يما لقيتك نتي هناا ، الواحد يروح خير ، جا نايض وهياا لحقت بيه
لونار: لالا وشبيك سقسيت برك ، خلاص هاه 🤐 سدة نتسد ، تبسم وقعد
لونار: تعشيت ؟
آرام: لالا
لونار: دوق نقولهم يحطولك تتعشا
آرام: ادا تقدري لبراا ، اومأتلو براسها ، وراحت للينا تقولها تجيبلو لعشاء لبراا ، دخلت للصالون ملقاتوش فهمت بلي خرج للجنان ، طلت لقاتو قاعد فالطابلة ويشوف منا ومنا ، ضحكت وراحت عندو
لونار: علاش راك تشوف مع جنابك
آرام: كاين كاميرات هناا ؟
لونار: لالا كاين غير هاديك اللي فالصالون اونفاص
آرام: شكون ركبلك الكاميرات تاع الدار ، رجعت اللور فالكرسي
لونار: معلاباليش مروان تكلف بكلش
آرام: شكون هادا مروان ؟
لونار: l'assistante تاعي
آرام: اممم ودايرة فيه confiance
لونار: نروح معاه لوين يحب بعينيا مغمضين
آرام: هكداا
لونار: امم ، جات لينا فيدها السنيوة حطت الماكلة وراحت ، بدا ياكل وهيا تشوف معاه
لونار: نسقسيك بصح متقوليش كسرتيلي راسي ، كان ياكل مردلهاش ، علاش ديت النونوس اللي كان فبيتي ؟ ، خزر فيها
آرام: وحدة شارفة قدك مازال عندها نونوس
لونار: نحبهم
آرام: الله يهديك واقيلا ملعبتيش فصغرك
لونار: دوكاا اللي عندو نونوس ولا يلعب ؟
آرام: انا نعرف النونوس يجيبوه للدراري الصغار باش يسكتوهم ، ضهرو حتى الكبار يسكتوهم بالنونوس ربحت ، رجعت اللور وبقات تضحك
آرام: اكي تضحكي ، كيفاش راح ديري الدار ونتي شارفة غير فلاطاي ، خزرت فيه
لونار: اسكت اسكت ديجا مازالني صغيرة على الزواج
آرام: اللي قدك ام بولادهم
لونار: ونتا علاش متتزوجش ياك راك كبر مني وزيد ماشي خاطب
آرام: حبست ، خزرت فيه ونطقت بحماس
لونار: حبست 😳 ، خزر فيها ، احمم تشوكيت وعلاش واش السبة
آرام: متفاهمناش
لونار: ونتا معامن تتفاهم ، ارخف روحك شوياا راك قريب تبور
آرام: منبورش كي مانلقا بيها وين نتزوج بيك ، خزرت فيه ودارتلو بيدها تاع اناا
لونار: هاداك ماخصني
آرام: ياك يقولو مايلمك غير دمك ، لميني ونلمك
لونار: انا منستناكش حتا تلمني الف واحد يتمناني
آرام: اديني نرقد اديني كون نقعد معاك تشدني الشقيقة تقول ولدتك ماريا ماشي آزار
لونار: تربية يديها
آرام: باينة سبحان الله
لونار: امشي امشي ، داتو لبيتو وراحت هياا تاني لبيتها ، معلابالهاش علاش فرحانة المهم ، كانت حاسة باحساس جامي حساتو فحياتها