بعد مرور أسبوع:
اختصار واش صرا:
نبداو بآرام ولونار مزادوش تلاقاو من بعد الجنازة لأنهم مقعدلهمش من بعدها بزاف يامات ويلحق عرسهم فبعتو آرام لدارو يبقا فيها ، اما آزار فكانت تروح تدير جلسات العناية بالشعر والبشرة وبدلت الستيل...
آيلا جابتها غير مع les consultation وكل مرة دير les analyses و les radio 🩻 وينيس واقف معاها ويقدملها فالدعم المعنوي ، وتفاهمو ثالث يوم بعد زواج آرام ولونار هو يوم العملية ، والدار كامل سمعت طبعا من غير العرسان ، حتى من مروان خلا زعافو منها بجيه وكان يحاول يخفف عليها خوفها وتوترها ويوقف معاها
لورين كالعادة متهدرش بزاف وانعزلت عليهم يعني مبقاتش كيما بكري من القراية للدار علاقتها مع إيلصا مزالت متوترة لكن مع لوخرين تحسنت نوعا ما
إيلصا كانت بدات فالدوكتوراه تاعها وتشغلت بيها شوية وهكداك وبقات واقفة مع لونار للدقيقة اللخرة وكانت تحاول تغطي غياب إيلصا باش متفيقش لونار
مروان كان يروح يخدم مرات ويروح مع آيلا للطبيب مرات تاني ، وبينو وبين إيلصا مكانش كاين لقاء كبير من غير تاع صحا واشراك وخلاص
باقي العائلة كانو لاهيين بالتوجاد للعرس
لمار فات عليها اسبوع سيء مقدرتش تتقبل غياب يماها وحاولت تنتحر شحال من مرة لكن مليكة كانت عاسة عليها مليح وكانت تلحقها فالوقت المناسب ، بصح حالتها راهي رايحة فالأسوء..
أديم كان جايبها غير خدمة والصطاج ، ونسا كامل على شكون عاونو ولا ( مشافش l'ordonnance)
اليوم الموعود:
نهار جديد واليوم هو العقد والفاتحة تاع آرام ولونار ، الفيرمة كانت مقلبة سافيها على عاليها ، من مصممي الديكور للكوافورات للسارڤورات ، ديسيداو يديرو كلش تما لأنو عندها ساحة كبيرة من العشب الطبيعي تمشي مع thème تاع الديكور اللي خيروه
ناض فغرضو فرحان ومقلق فنفس الوقت لأنو اليوم المرأة اللي ختارها قلبو من بين كامل النساء راح تولي مرتو قدام ربي والناس ، راح للدوش جبد الماشينة تاع الحفافة سڤم لحيتو ودخل دوش ، خرج لاوي على روحو سربيثة من تحت ، سمع الدقان فبابو
آرام: ادخل ، دخل مروان عندو هاز زوج كوستيمات فيدو
مروان: منلخر هادا ولا هادا ؟
آرام: انا مرتك ؟
مروان: عاونني نتا راني حاصل ، شاف معاه آرام وشاف مع الكوستيمات
آرام: لزرق
مروان: اوكي نلبس لكحل ، طلع حاجبو آرام
آرام: كيعاد عرفت تخير علاش جاي عندي تدي رايي ؟
مروان: راني نولف فيك طبايع لبنات شوية ، شفت هادي اللقطة بدّات راح تتعاودلك حياتك كامل حتى نهار تموت
آرام: صحاا على السطاج اللي قبل العرس بساعة ، تقدر تخليني نلبس
مروان: راك واجد sur تسمعها كل يوم بلا متمل ؟ ياخويا مزالو عندك شي سوايع سلّك عمرك فيهم خيرلك
آرام: دبر على سروالك انا قانع وقابل وراضي وكلش
مروان: والله حتى قدرت عليك الصعلوكة ، زعما نتا جبل مايهزك ريح وكدا ، عوج فمو ودور راسو .... مضنيتكش هكدا ☹️
آرام: نتا بعدا نهار تلقا اللي تديلك قلبك تولي عندها كي قاش قاش تلعب بيك كيما تحب ، حك شعرو
مروان: غير تجي وتعميني الا حبت
آرام: هاه ونتا طالقها عليا محاضرات صباح عرسي اعيباد الله واش هاد الناس اللي دايرين بيا
مروان: غير لخير خويا انا غير نصحتك
آرام: متنصحنيش اديها ف*** وخلي قسامي tranquille ، عوج راسو
مروان: متعرفش للخير ، وخرج يضحك عليه
أنت تقرأ
جمعتنا القرابة *الجزء الثاني* (أنت قدري)
Romanceالجزء الثاني من حكاية جمعتنا القرابة (باللهجة الجزائرية) راح يكون أكثر مركز على الأولاد يعني ولادهم بعد ما كبرو وتاني راح نرجع للقطات فالماضي ، نشاله يعجبكم كيما الأول 🤍🤍
