جمعتنا القرابة *الجزء الثاني* (أنت قدري)

Partie 51

دخلو لعندها ، كانو تماك والديها و صهيب وينيس ، لونار راحت حضنتها
لونار: يا روحي راكي مليحة ، تبسمتلها
إيلصا: إيه ، شافت مع مروان وآرام اللي دخلو ، قرب عندها
آرام: المكراشة تاعنا ، حكمها من نيفها بالشوية .... نيفك تعوج منا بانلي
إيلصا: صح ! ، شافت مع لونار تسقسي بعينيها ، خبطتو لكتفو
لونار: أو يكذب تأمني هادا ! نيفك راه كيما بكري برك زرق شوية ، قرب ينيس لوجها يشوف مع نيفها
ينيس: هيا راهو يبانلي رايح à gauche شوية مبقاش فالوسط ، خزر مع آرام ، صح ياك ! ، آرام طلع راسو وهبطو بمعنى إيه ، وهيا دمعو عينيها
آرام: خلاص متبكيش نطمولك شوية ونبعتوك تريپاريه
كامي: عند الميكانيسيان مالا
ينيس: وياربي
صهيب: الناس تزورو المريض باش تخفف عليه نتوما لالا تزيدو تكملو عليه
زاكو: معليش بنتي شابة فكل أحوالها حتى وكان معندهاش نيفها ، شافت معاه تاع منيتك پاپا ، وهو طلع راسو وشاف مع مروان اللي بقا واقف بعيد شوية حاط يديه فجيوبو ويشوف معاهم متبسم ....  زاكو: مروان ارواح لهنا علاش واقف تما ، قرب عندهم وشاف معاها وهيا هبطت وجهها حشمانة
مروان: كيفاش راكي حاسة روحك دوكا ؟ ، نطقت بالسيف ، محبتش يشوفها هكا
إيلصا: ممليحة ، غمض عينيه وفتحهم متبسم معاها
زاكو: إيلصا لازم تشكريه هو اللي جابك لهنا ، شافت مع باباها وشافت مع مروان متعجبة
إيلصا: صح ! ، حك شعرو وعوج راسو بمعنا يعني ، بقات ساكتة تشوف معاه والدموع بداو يتراكمو فعينيها ، وطاخت تبكي
مروان: لالا 🤦‍♂️
آرام: أرواح نتا وسكتها دوك
زاكو: إيلصا بنتي علاش راكي تبكي ؟
ينيس: وقيلة سمعتي بالمقلوب هوا اللي جابك لهنا ماشي اللي وصلك لهنا ، خزر فيه صهيب تاع بلع فمك
كامي: إيلصا أششش خلاص بنتي نورمالمون تشكريه ، لونار فهمت انو حشمت منو ، قربت عندها
لونار: معليش إيلصا مروان مننا ماتحشميش منو عادي ، بقات تتنخسس وهوما يسكتو فيها وهو فضل يخرج باش ميزيدش يحرجها

فالعشية هبطو سياراتهم ورا بعض ، راحت لونار فتحتلها الباب ، معاونتها تهبط وكامي معاهم ودخلو للصالون اللي كانو يستناوهم فيه كامل ، شافت معاهم بعينيها ملقاتهاش ، أصلا مكانتش حابة تشوفها ومن الأحسن أنها مهبطتش ، سلمت على حسينة اللي حكاولها قبل ماتلحق إيلصا بشوية باش ماتبقاش تخمم عليها ، باستها من راسها وقعدت قدامها
حسينة: ياوخدي عليك يابنتي الله يعطيه كصرة نشاله ، الله لاتربحو لبس السريول هاداك خلاص رجع يتفاحل على ختو ، إيلصا هبطت راسها
إيلصا: ماشي جديدة ماني
زاكو: خلاص هادي آخر مرة راح نتلها بيه يا يصوب يا يطير عليا منسحقوش هناا
ماريا: بلعقل تاني ماتجيبوهالوش هكا يزيد يخرج الطريق كتر
كامي: واش يزيد ؟ هدرنا معاه بالسياسة مفهمش ، بالقباحة مفهمش ، كنت نوقف معاه كي كان يضارب معاه باباه ونسايسو ومام يغلط نقولو معليش راك تكبر وتعرف ، بصح لالا ميفهمش ميعرفش للحدود ، خلاص انا هزيت يدي منو الناس ربات الولاد الله الله وأنا ربيت الخلا هاد المرة يا يتسڤم يا يطير عليا كيما قال باباه ، شافو مع بعضاهم ساكتين ، عارفين مدام كامي هدرت هكا يعني راهو خاربها ، نطقت فطوم
فطوم: انا حبيت نعرف علاش ضربها برك ؟
آزار: واش تعرفي يما ! ، مهما يكون ملازمش يشير يدو لختو
فطوم: مانيش نعطيلو فالحق حبيت نفهم برك ، شافت مع إيلصا .... قوليليي علاش ضاربتو ؟ ، شافو كامل مع إيلصا اللي ملقات منقول
إيلصا: أنا نطلع ني عيانة ، راحت مخليتهم وفطوم طلعت حاجبها
فطوم: هادي كاش ماراهي مخبية ، زعما ميكونش شدها مع كاش واحد ، وجدان تنبزت وماريا قلبت عينيها
وجدان: آه يا يما واش هاد الهدرة الطفلة خاطيها هاد الصوالح
فطوم: بصح فايتة دارتها ، شافت معاها كامي
كامي: هيا ادا غلطت كانت صغيرة ومتعرفش صلاحها حتى منو هوا باش يعيدلها ويفهمها الصح من الغالط كان ميشبعهاش حتى الهدرة كي شغل ماشي خوها ، بصح هوا العملة اللي دارها متتغفرش ، وكي زادت راحت تهدر معاه ناض يضرب فيها ، عقد حواجبوآرام لأنو كان ساكت برك وكلش يجوز بين عينيه هو ومروان
آرام: علاش واش دار باش واجهتو إيلصا ؟ ، شاف زاكو مع صهيب اللي علابالهم ماتجوزش عليه ، نطق ينيس مخبي الموضوع لأنو كان معاهم فالصبيطار وتفاهمو يبقا الموضوع بيناتهم
ينيس: شكاتها وحد الطفلة عليه تمسخر بيها وهيا راحت تضارب معاه قاتلو وقتاش تبدل طبايعك وهو كيما شفناه مفوعيوش ايا خلطها عليها
آرام: حبيت تقول إيلصا كي كانو يجيو يشكيوها من قبل مكانتش تواجهو والبارح ضهرتلها تضارب معاه ؟ ماشي بيزار لالا
ينيس: هيا كي شغل تاع هاد المرة الحكاية كبر
آرام: مالا آفار تاع كاش بيبي
ينيس: هاكدك ، شاف معاههم صهيب تاع بلعوه مراكمش فالقهوة
فطوم: علاش تزوج ؟
زاكو: هادا راه قريب يدير السبوع تاع وليدو قبل الزواج
فطوم: أخلايااا
ماريا: صح واش راكم تهدرو ولا ؟
كامي: ياختي وحنا ريناه ؟ ، بالاك راهو عندو كاش ولد وحنا لاخبر من قوة التخلاط ، الله يسترنا ماطلق حتى وحدة ، حتى من الدار ، هيا هدرت هكا وصهيب غطا وجهو وزاكو غمض عينيه ، ينيس ناض يكح ، والباقي شي مفهمش شي جاتو تخلط فالهدرة برك ، عكس آرام وصهيب اللي كانو يدققو مع كل كلمة تخرج منهم وشافو فبعض
آزار: ياودي مزال الهوا فراسو الله يهديه خلوه مع الوقت يتبدل ، تقعد آرام
آرام: هاد المرة خلوه عليا
زاكو: راهو ليك ، دبر راسك معاه انا عييت منو شيبني
آرام: انا ندبر راسي معاه متخممش
فطوم: غير افتحلو الباب اللي غلقتها عليه ومبعد ساهل
صهيب: انا عجبتني كي غلق عليه الباب خير ما لوكان هز روحو وطg لكاش بلاصة
ماريا: ايد فيه نتا ايد
آرام: الباب مراحش تتفتح عليه حتى يفوتو 3 jours ، الماكلة توصلو للباب كي المحابسية وتتغلق ، وكون نلقاه مزال ياكل فروحو ومعاجبوش الحال وماشي مستعرف بواش دار وراح طلب السماح من ختو يزيد 3jours ، و attention وحدة فيكم تخمم تفتحلو الباب ولا ، راني نوصي فيكم قدامهم باش متقولوش مقلتش ، سمعتوني وشاف مع فطوم
فطوم: حتى انا
آرام: حتى نتي فطوم ، ولا خلينا نقولو خصوصا نتي نعرفو شحال عزيز عندك بصح لازم منيش نضلم فيه راه فصلاحو كون يقعد هكا يزيد يروح فيها كتر ، وزيد باش يحس هوا ختو دارلها هكاك ومتأثرش قاعد يصحح فوجهو كيشغل مضلوم ، دونك يبقا فبيتو ياكلوه الحيوط بالاك يخدم هاداك الحجرة اللي عندو قبل ماتطفر فيه
لونار: وكون ميحسش ؟ تبقا حابسو تما ! ماشي حل
آرام: راح يحس ، خليه برك لليامات
كامي: أنا الله يساهل مدابيا منشوفش خليقتو قدامي اصلا
زاكو: وأنا تان
بدلو السوجي وبقاو يهدرو ، جات مليكة تخبرهم بلي الطابلة واجدة ، ناضو رايحين ، ماريا شافت مع مليكة
ماريا: طلعي لإيلصا ماكلتها لبيتها باش تشرب دواها
مليكة: حاضر
وجدان: وعيطي للورين فطريقك
مليكة: اوكي
راحت تدير واش قالولها وهوما كل واحد حكم بلاصتو ، بعد شوية هبطت مليكة
مليكة: مدام وجدان لورين قاتلك راني شبعانة
وجدان: كيفاش شبعانة واش كلات هادي ؟
فطوم: خليها الوجه لمقزدر ماراحت للصبيطار ، ما هبطت تشوفها ، تحوسي تجي تاكل
تنهدت وجدان مشي فاهمة واشبيها بنتها وكامي قلبت عينيها لانو صهيب حكالها كلش حتى المضاربة اللي صرات بين إيلصا ولورين
تعشاو الكل في هدوء وراح كل واحد لبيتو يرقد