صباح جديد :
دق فالباب ، دخل بعد ما سمع الإذن ، هاز فيدو كاس قهوة ، تبسم معاها وهيا بادلاتو الإبتسامة
مروان: صباح الخير
آيلا: صباح النور
مروان: راكي مليحة
آيلا: ايه متخممش ، من اللي خرجت مع ينيس وهيا حاسة بفرحة داخلها ومورالها طالع ، يمكن لقات امل فلحياة يخليها تحب تزيد تعيش وهاد الأمل هو ينيس
بقا يشوف معاها بانتلو احسن معنويا وهادا الشيء طمنو لانو الجانب النفسي يلعب دور كبير قبل العملية وفهم انو الخرجة مع ينيس كان عندها دور كبير
خرجت إيلصا من الدوش ، بعد ما كانت تغسل فوجهها ، شافتو صبحت عليه
إيلصا: صباح الخير
مروان: صباح النور ، مدلها القهوة ، وهيا شدتها
إيلصا: صحاا ، راحت قعدت فالفوثاي ... مع شحال تدخل للبلوك ، شاف لعندها
مروان: مع ال 10 ، ما جا يكمل هدرتو تفتحت الباب ودخلو كامل العايلة عندها دفعة وحدة حتى تعمرت البيت ، صبحو عليها كامل وسلمو عليها ، إيلصا لقاتها فرصة خرجت وهبطت تتنفس برا ، ومروان حتى هو خرج وراها لقا صهيب وراسم وزاكو وصرب قاعدين برا فالكراسة راح لعندهم ، قعدت قدامها ماريا وهيا تسلكلها على راسها
ماريا: مورالك راهو مليح ؟ ، تبسمت
آيلا: ايه .. مخلوعة شوية بصح ماشي كيما البارح
آزار: الحمدلله ياربي
كامي: متخمميش راح يكون كلش مليح
وجدان: يما كانت حابة تجي بصح قعدت مع يما حسينة وراهي تسلم عليك وقاتلك غدوة اني نجي نشوفك
آيلا: نشاله .. براكة نتوما هنا معايا ، اندق الباب ودخل ينيس ، تعجب منهم كامل جاو
ينيس: صباح الخير .. بصح يضهرلي تخالطلكم صبيطار مع الدار
ماريا: لالا متخالطناش جينا نشوفو هاد القميمرة قبل متدخل للعملية
ينيس: تقول راح تدخل للحرب ماشي لعملية .. فهموني علاش تكبرو الأمور
كامي: ارواح نتا وفهمهم يماك من لبارح وهيا تبكي وقريب تغاشاتلنا ، شافت معاها آيلا وحكمتلها يديها
آيلا: علاش تمرضي فعمرك ، باستها من يديها الزوج .. ربي يخليك يا أحسن ام عوضني بيها ربي ، ماريا دمعو عينيها من كلمة أحسن أم وجبدتها حضنتها ، وهوما مشاعرهم تحركت وغرغرو عينيهم معاهم بالدموع ، ينيس بقا يشوف معاهم متبسم فرحان ، أمو والطفلة اللي اختارها قلبو يحبو بعضاهم لهاد الدرجة ...
فطوم: ايا خلاص براكة من الدموع ... نتي تاني ، شافت مع ماريا ... ولادك نهار ختنو ومدرتيش هكاا ، ينيس دور راسو يعرف قوالب فطوم
آزار: يما واش جاب لجاب
فطوم: كيفاش واش لجاب ياك الموس فيها فيها هادي برك فقلبها ، عوجت فمها ... وولادها فالرايس سيدي ، آيلا طلعت حمرة وجاها الضحك وينيس شد راسو وهوما يضحكو
ينيس: حسبي الله عليك يا فطوم ، وخرج
كامي: ههههه يما بهدلتيه قدام الطفلة
فطوم: ياك قلنا طهّر هادي حاجة مليحة مشي قطعوه
وجدان: لالا هنا خلاص
ماريا: والله يا يما عندك وحد القوالب ، قاطعم صوت الباب اللي اندقت ، ودخلت الفرملية متبسمة
الفرملية: صباح الخير عليكم
آزار: صباح النور
الفرملية: تقدرو تسمحولنا نلبسوها لحوايج تاع العملية
كامي: ايه ايه يالله نخرجو نخلوهم وحدهم
الفرملية: تقدر تبقا وحدة معايا باش تعاوني
ماريا: انا نقعد ، خرجو وخلاوهم
أنت تقرأ
جمعتنا القرابة *الجزء الثاني* (أنت قدري)
Romanceالجزء الثاني من حكاية جمعتنا القرابة (باللهجة الجزائرية) راح يكون أكثر مركز على الأولاد يعني ولادهم بعد ما كبرو وتاني راح نرجع للقطات فالماضي ، نشاله يعجبكم كيما الأول 🤍🤍
