جمعتنا القرابة *الجزء الثاني* (أنت قدري)

Partie 116

بعد خمسة أشهر :

نحكيلكم واش صرا فيه باختصرا ، نبداو بآيلا وينيس اللي وليدهم رجع فعمرو خمس شهور ، دارولو السبوع مع الختانة فنهار واحد بعد شهر من زيادتو وداروها فصالة كبيرة وعرضو الناس كامل وآيلا تصدرت مع وليدها وكلش بالطبع ، ودوكا رجعو لندن لحياتهم العادية خاطر كيما علابالكم ينيس وآيلا قعدو فالدزاير على خاطر كانت enceinte وباش متبقاش وحدها

قبل شهرين ونص من زيادة نزيم وليد ينيس وآيلا .. آرام ولونار رزقهم ربي بوليد شباب اسمو سراج ، فرحو بيه بزاف surtout آرام اللي كان متشوق وقتاش يولي أب ، دارو السبوع تاع وليدهم برك خفيف فالدار (دارهم باش تقدر تروح عندهم وجدان وصرب) بعد سمانتين من زيادة وليدهم

العايلة كامل عرفت بلي حسام ومصعب خوت وفرحولو بزاف كي لقا عايلتو ، وحسام دا يماه وخوه وراحو طلبو يد ميرال من والديها ودارو فاتحة ، يعني راهم مخطوبين رسميا ومتزوجين فالإسلام ، دار هكا باش يكون متهني كي يخرج معاها والديها عارفين

نروحو لورين ومصعب علاقتهم اللي مبان فيها حتى طريق .. ومتوترة من هاداك النهار وسوء التفاهم اللي صرا (هو من جيهتو مكان والو اصلا نسا واش صرا كامل هداك النهار وكان مقلق مشي مركز واش تقال كامل ) ، اما لورين راهي صايبتها سبة ومشي حابة تعترف بلي راهي تحبو malgré غيرتها عليه فالخدمة كاشفتها مرات كي تسمع الموضفات لي يخدمو يتغزلو بيه ولا حتى كي يجيو يعقدو كاش صفقة مع شركاء أجنبيين ينجذبو ليه ويتغزلو بيه قدامها (تعرفو الأجنبيات ميحشموش) وهو يتبسم معاهم تما تزيد تهبل ، ولات تهدر معاه قساس قساس ومتخليلوش المجال ، تتشنف عليه مرات ، فنفس الوقت غايضتها علاش بارد معاها وماجاش يحللها (ارواح نتا وافهمنا حنا لبنات) ، اما مصعب كي لقاها دارت مسافة بيناتهم وحتى طبايعها مرات تستفزو بيهم جبد روحو وولات بيناتهم غير الخدمة والسلام عليكم ..

أديم ولمار .. لمار حتى هيا بعدت على أديم مرة وحدة بعد واش صرا بيناتهم ، تلهات بالخدمة وتعرفت ودارت صحبة مع رقية ، نجحت فخدمتها خاطر كي يمدولها خدمة تتقنها وهذا خلاها فضرف قصير دير بلاصتها ، تقربت من المدير في إطار الصداقة والخدمة ، باعت دارهم القديمة وشرات appartement صغيرة ليها قريبة لخدمتها .. أما أديم غاب على الدار كان يجي غير كي تكون مناسبة ولا كي يعيطولو وخلاص ، مولاش يتلاقا بلمار بحكم هيا جابدة روحها وزادت رحلت محوسش كامل يعرف وين ساكنة وحتى أخبارها مولاش يحوس يعرفهم ، بصح باقية شاغلة بالو وكلامو لي نهار قالولها ندم عليه (تعرفو طبعو يهدر ممبعد كي تبرد الضربة يندم) ...

يوم الأحد (بداية الأسبوع) الساعة 12:30
فصالة الإجتماعات :
قاعدين قدام بعض هو فالمقدمة وهيا بجمبو مقابلين فيهم العملاء ، يقراو فالشروط قدامهم وكل واحد ملامحو كيفاش ، كاين اللي عجبوه كاين لي رافضهم وكاين لي نص نص ، لورين كانت تماصي فرقبتها من الصطر الليل كامل وهيا خدامة حتى رقدت على الكرسي بلا ماتفيق تعوجت رقبتها ، اما هو حاكم الستيلو فيدو يدور فيه عين مع الشروط مع العملاء وعين معاها ، ركز مع العميل اللي كان يدور فراسو راح يهدر
العميل: حنا نتافقو على كلش من غير النسبة اللي راح نديوها .. جاتني قليلة شوية ، خزر مع شريكو اللي جا معاه حركلو راسو بايه بمعنى راني مأيدو فكلامو ، حنحن مصعب ونطق
مصعب: راني متفهمك .. بصح خمم معايا شوية .. نتا راح تدخل شريك باسمك وتزيد تدي من فوق نسبة 35% .. وحنا نركبو les pièces اللي تبعتوهملنا ونومباليوهم ونزيدو نسوقوهم هنا ، شبك يديه فبعض .. يعني نحسبو الخدمة تاع التركاب مع التريسيتي وتاع لومبالاج ونزيدولها الإشهاار .. ممبعد باش نرجعو للفايدة تاعنا حنا ، نطقت لورين
لورين: وي .. وكون نحسبو الخدمة هاديك كامل شحال تجي والفايدة تاعنا شحال .. مراحش نجيو متعادلين معاكم نتوما ، شافو فبعض العملاء
عميل: كلامك صح .. مي النسبة هادي حنا مترضيناش كشركة ناجحة وعندها أسهم كبيرة فأوروبا وآسيا وحتى أمريكا وحبينا الجزائر تكون الباب لإفريقيا وتكون أول شريك نتعاقدو معاه .. بصح النسبة مرضاتناش .. يمكن هادي أقل نسبة يعرضوها علينا
لورين: رانا متفهمينك .. بصح متنساش انو العملة تاعنا يا موسيو هابطة والمبيعات لازم تكون في متناول الفئة المتوسطة وهادا راح يخلينا ندخلو فمشكل وحدوخر .. يعني حنا كي مدينا هاد النسبة رانا دارسين السوق ودارسين الأصول والخصوم
مصعب: ايه .. خصوصا فالبدايات .. وإنشاء الله منبعد كي تمشي وتتسوق راح ندرسو الوضع ونقدرو نزيدو فالنسبة ، شافو في بعض العملاء وبقاو يتناقشو بلعقل ، ممبعد حركو راسهم بايه
عميل: قبلنا العرض وراح نسينييو الصفقة .. بصح نحطو بنود بلي كون نلقاو نجاحات مع الوقت النسبة راح تزيد ب 5% ، خزرو فبعض لورين ومصعب مشي عاجبتهم 5% كامل ، بصح معندهم حتى حل آخر من فوق الإقناع لي قنعوهم بيه ، وخممو يشوفو يمكن منا يجي هاداك النهار لي يحوسو يزيدو هاد النسبة يقدرو يسويو معاهم
مصعب: إيه معليش ..