جمعتنا القرابة *الجزء الثاني* (أنت قدري)

Partie 92

هيا غير شافتو شهقت

لمار: أدييييييم ، دار عندو لقاه موجه الموس ليه ، ردها وراه خايف عليها ، وهيا بدات تبكي وتشهق متفكرة الموقف اللي صرالها مع يماها ، وأديم تقلق وتخلع عليها فنفس الوقت ، توتر ومعارفش واش يدير
أديم: لمار ادخلي للدار أنا ندبر راسي معاه
لمار: لالا .. راح يقتلك كيما دار لماما
أديم: نوو مراح يصرالي والو غير كوني نتي مليحة .. روحي متخافيش قلتلك قادر على شقايا .. لماااار ، بقات تحرك راسها بلا ، وهشام يقرب بجيهتهم
هشام: اوه قتلتوني بالحب .. لاعبهالي راجل .. دوك نوريلك

هبطت للپاركينچ ، كانت راح تركب طونوبيلتها ، حبسها
مصعب: راح نديرو كورثاج ؟ .. اركبي ، ممبعد تكاكا مع روحو .. ااا ادا ميحبش le fiancé ديالك عادي ، بقات دور فراسها ، تفكرت les photo تاع لبارح ، راحت بجيهتو وركبت بلا متهدر حتى كلمة ، حرك كتافو وطلع ، ديماراو رايحين

كان يسوق حتى صونا تيليفونو ، شافو لقاه يماه
مصعب: وي يما
مفيدة: مصعب وليدي فوت على la pharmacie جيبلي الدواء .. خلاصلي والصطر راهو داير فيا حالة
مصعب: مشغول يما .. شوفي وحدة من بنات ختك اللي قاعدين تما
مفيدة: منيتك مصعب عندي راجل قدو قد الدنيا ونبعت فالعزبات .. متعرفش الحومة كيفاش دايرة ، تنهد و مسح على وجهو
مصعب: خلاص دوك نجيبولك
مفيدة: صحا وليدي ، كوپا ودار عندها
مصعب: عندي شغل راح نتعطلو شوية .. ياك معليش ، حركت راسها بايه
لورين: خود راحتك ، حرك راسو ومشا جيهة la pharmacie اللي يشري عليه دايما الدواء ، غير لحق هبط شراه وعاود رجع ، راح لدارهم ، حبس قدام باب الدار ودار عندها
مصعب: خمس دقايق ، هبط وخلاها تستنا فيه

دخل للدار وعيط على يماه
مصعب: يماا ، طلت عليه بنت خالتو من الدروج
أنفال: راهي متكية عيانة ، شاف معاها
مصعب: هاكي مديلها دواها ، هبطت عندو شدتو وهيا حشمانة منو ، دار رايح ، وصورية خرجت من الكوزينة تمسح يديها ، مطلعة حاجبها كانت طل على لورين من التاقة
صورية: وين راك رايح ؟ ، دار عندها عاقد حواجبو بأي حق تسقسيه ، يماه ومتدخلش فيه
مصعب: أنعم ؟ ، شافت la façon كيفاش هدر معاها تكاكات مع روحها
صورية: قصدي علاش راك مقلق .. اطلع شوف يماك راهي عيانة ، دار خارج يهدر
مصعب: مزروب لعشية نشوفها ، خرج خابط الباب ويتمتم .. هاداك واش خص غير هادي تزيد تحاسبني وين رايح .. تقول ماعندهمش دار يروحو ليه قاعدينلي هنا

هو خرج وهيا دارت لبنتها
صوراية: علاش يطيح عليك التبهليل كي تشوفيه ؟ .. علابالك معامن جاا ! .. مع طفلة كانت راكبة لقدام
أنفال: متقوليليش ؟ وجابها لهنا معاه ! .. ياربي
صوراية: اممم .. ومشي غريب على يومين يجي يوريها ليماه
أنفال: لالا .. مستحيل مصعب ديالي .. من اللي كنا صغار كنتو تقولو مصعب لأنفال وأنفال لمصعب .. علاش مراهش يخزر فيا دوك .. كل مانهدر معاه يتفاداني .. واش ندير
صوراية: قابليه بالطوماطيشة مشعككة وپيجامة مطاشية وحوسي يشوف فيك .. كون شفتيها لسانك تبلعيه .. واش من زين .. وواش من حطة .. هادا مبانتليش مليح وباينة بلي لبّة فمابالك قدامك .. ، خبطت حنكها بيديها وطاحت فاللرض
أنفال: يا ماما منقدرش بلا بيه .. مستحيل .. حياتي كامل بانيتها عليه .. يا ماما شوفيلي حل دبري راسك ، راحت عندها شدتها
صوراية: اششش .. يا بنتي .. خلاص راح ندير جهدي باش تديه نتي ..