جمعتنا القرابة *الجزء الثاني* (أنت قدري)

Partie 88

دخل للدار بعد نهار كامل وهو من اجتماع لخوه ، طلع لبيتو دوش وبدل ، لبس شورت ومن فوق بقا عريا وراح لبيتها ، دق الباب ، مسمعش لا رد ولا حس ، فتح الباب وطل ، لقا فراشها مرتب وكل فمكانو ، يعني بعد ماناضت ماعاودتش رجعت لهنا ، راح جبد تريكو وخرج يلبس فيه ، وصل لتحت لقا فايزة
مروان: إيلصا وين ؟
فايزة: علاش مطلعتش لبيتها موسيو ؟
مروان: لالا
فايزة: اه يمكن مزالت مع الحصونة .. نروح نشوفها ، حبسها
مروان: خلي عليك انا نشوفها ، راح وخلاها

كانت قاعدة مع المهرة اللي عجبتها مربعة رجليها فاللرض معاها وهاديك المهمرة تاني كانت راقدة فاللرض ، وهيا تحاجي وتعاود وتحكيلها مروان كيفاش جرجرها

إيلصا: شوفي اختي .. نسميك بيتي .. شوفي ا ميتشا .. هاداك اللي شراك والله راه كيما حكيتلك .. جرجرني وحد التجرجيرة تاع لكلاب ، تاكل من الزرودية وتقسملها تاكل معاها .. المهم حن الله ورانا متفاهمين زعما دوك .. الا ان ينوب الله وتزيد تخرجلنا حكاية من القصب .. نعرف زهري انا مبعر .. حكاتلي ماما .. نهار العقيقة ديالي أنا وخويا أديم شراو ثلث كباش 🐏 .. زوج لأديم وواحد ليا .. قالتلي هادوك الزوج تقولي الندا عاقلين وهوما قدمو راسهم للموس باش يتذبحو وتاعي لا إله إلا الله ، خبطت فخدها .. هاما خيتي فيه عشرين .. ناضتلو الدودة نطح عمي صهيب فيدو .. وزاد نطح عمي صرب مسكين .. راهي مزالتلو la trasse لدوك .. الزرمين قريب خرجولو .. وعفص على الكباش اللي كانو فاللرض مدبوحين .. المهيم شحفهم .. تما رفعو يديهم مني .. ادا هادا كبشي تاع العقيقة زعما باش نخرج صالحة ومصلحش .. حبيتي زهري يخرج صالح

دخل للاصطبل وهو يحوس عليها من بيت لبيت ، حتى بدا يسمع صوتها جاي من وحد البيوت تما ، بدا يقدم عرف راهي عند مايڤا (المهرة) هو سماها وشراها علاجالها ، حس بلي كانت راح تحبها ، تبسم وقدم ، حتى يلقاها مربعة رجليها فلرض وتهدر بيد ويد شادة بيها الزرودية وهاديك المهرة مدورة ليها وتشوف معاها كيشغل راهي تسمعلها ، الصدمة كانت قوية ، وجاه الضحك فنفس الوقت

مروان: إيلصا ! ، دارت عندو تشوف معاه
إيلصا: جيت .. شحال راهي الساعة
مروان: من وقتاش ونتي هنا
إيلصا: تغديت وجيت لهنا
مروان: 6 سوايع ونص ونتي قاعدة هنا !
إيلصا: كي نكون مع الحصونة ننسا روحي
مروان: ماشي غير تنساي .. تتأقلمي وچاع .. نوضي نوضي .. كون يدخل كاش بنادم لهنا يشوفك تتوانسي مع المهرة يحسبك مهبولة ، وقفت وهيا تنفض فعمرها
إيلصا: الهدرة مع الحيوان خير من العيباد ، دارت تشوف مع المهرة .. باي بيتي .. غدوة راح نزيد نجي نكملك الزبايل اللي درتهم فصغري ، مشات قبلو وهو تابعها
مروان: اسمها إيڤا ، حبست ودارت ليه
إيلصا: وانا سميتها ميتشا ، عاودت دارت وكملت تمشي
مروان: سميها كيما تحبي .. أصلا شريتها علاجالك ، بقات تمشي وهيا متبسمة وهو تابعها ، غير وصلو قابلتهم فايزة
فايزة: موسيو مروان العشاء واجد ، خزر فإيلصا
إيلصا: اطلعي اغسلي وبدلي وارواحي نتعشاو ، حركت راسها بايه وطلعت ...