ဂူဖောက်သူတို့ဒဏ္ဍာရီ 盗墓笔记 (mm trans) Vol 4 & 5 & 6

Vol 4🐉65🐉ရွှံ့မြွေတစ္ဆေမြို့တော် (၃)

ဂူဖောက်သူတို့ဒဏ္ဍာရီ 盗墓笔记 (volume 4)
Author -南派三叔 (nan pai san shu)
translater - Hninthawethadar
ရွှံ့မြွေတစ္ဆေမြို့တော် (ဒုတိယပိုင်း)

Chapter (65)
ရွှံ့မြွေတစ္ဆေမြို့တော် (၃)

ကျောက်တုံးက အတော်လေး ခြောက်သွေ့နေပြီဖြစ်လို့ ဝူရှဲ့လည်း အားနင်ရဲ့ ခန္ဓာကိုယ်ကို ထိုပေါ်ချလိုက်သည်။ သူတို့အားလုံးလည်း မောပန်းနွမ်းနယ်နေတာကြောင့် အနားယူဖို့ ထိုင်လိုက်ကြသည်။

အဝတ်အစားတွေကို ချွတ်ပြီး အခြောက်ခံဖို့ ကျောက်တုံးတွေပေါ်မှာ ဖြန့်နေကြစဥ် ဖက်တီးက မီးခိုးမဲ့မီးဖိုကို စဖွင့်ချင်ပေမယ့် သူ့ခရီးဆောင်အိတ်ကို ဖွင့်လိုက်တော့ မီးဖိုကတော့ မရှိတော့ပေ။ ကြည့်ရတာ မနေ့ညက ရုန်းရင်းဆန်ခတ် ဖြစ်နေတော့ ပြုတ်ကျသွားပုံပဲ။ မီးမလောင်နိုင်တဲ့အတွက် ဗူးပေါ်ပါတဲ့ ဂွမ်းစလေးကိုသာ သုံးလိုက်သည်။

ဤနေရာတွင် ရေများက ဆားငန်ရေများ ဖြစ်သည်။ ရေများက ဒီအနီးနားရှိ ဆားနွံကြီးများ၏ ရေစနစ်နှင့် ဆက်စပ်နေပုံရသည်။ ကံကောင်းထောက်မစွာပင် မိုးရေသည် ချောက်ထဲမှ ဆင်းလာပြီး တစ်ခါတည်း စီးဆင်းသွားတာကြောင့် အနံ့ဆိုးမရှိပေ။ ငန်းလွန်းလို့ ရေတောင် ခပ်သောက်လို့မရ။ ဝူရှဲ့သည် ပထမဆုံး ပိုးသတ်ဆေးပြား အနည်းငယ် ထည့်ကာ လက်ဖက်ရည် အနည်းငယ် ပြုလုပ်လိုက်သည်။  ပြီးနောက် ခန္ဓာကိုယ်ကို ဆေးကြောဖို့ ရေယူလိုက်သည်။

တစ်ညလုံး ရေစိမ်ထားရတာကြောင့် တစ်ကိုယ်လုံးက စိုစွတ်နေပြီ။ ဖိနပ်ကို ချွတ်လိုက်သည်နှင့်  အရေပြားများ ကျွတ်ထွက်သွားသလိုပင် ခံစားလိုက်ရသည်။ အပေါ်ပိုင်းက အင်္ကျီနဲ့ ခြေအိတ်တွေကို ချွတ်ပြီးနောက် မျှော့နဲ့တူတဲ့ အရာလေးတွေက သူ့ခြေထောက်ကသွေးတွေကို စုပ်နေတာ တွေ့လိုက်ရ၏။ ထိုအကောင်တွေကိုတော့ ဓားမြှောင်ပူပူနဲ့ပဲ မီးရှို့သတ်ပစ်လိုက်သည်။ မျက်လုံးရှေ့ ကောက်ယူ​ ကြည့်လိုက်တော့လည်း ဘယ်လိုပိုးကောင်လဲ ဆိုတာ မပြောနိုင်ချေ။

သို့သော် စိမ့်ရေသည် ဆားငန်ရေ ဖြစ်လို့ အင်းဆက်ကောင်ရေက အနည်းငယ်မျှသာ ရှိသင့်သည်။ အနည်းဆုံးတော့ ရေငန်မျှော့တွေ ရှိဖို့ မဖြစ်နိုင်ပါဘူး။ ဒါက စိမ့်တွင်းနက်နက်ထဲကို ရောက်ဖို့ သတင်းကောင်းပါပဲ။