ဂူဖောက်သူတို့ဒဏ္ဍာရီ 盗墓笔记 (mm trans) Vol 4 & 5 & 6

Vol 5🐉55🐉 နီးလာပြီ

ဂူဖောက်သူတို့ဒဏ္ဍာရီ 盗墓笔记 (volume 5)
Author -南派三叔 (nan pai san shu)
translater - Hninthawethadar

Chapter (55)
နီးလာပြီ

လမ်းတစ်လျှောက်တွင် အခွံမပါသော အမဲသားရောင် အင်းဆက်ပိုးမွှားများသည် သူတို့အား အနှောင့်အယှက် ပေးချင်သည့် သဲလွန်စမရှိဘဲ ပျောက်ကွယ်သွားရာ တစ်ယောက်ပြီး တစ်ယောက် ရေထဲသို့ ခုန်ဆင်းလာခဲ့ကြသည်။

ဖက်တီးက ငုံ့ပြီး ရေထဲကအကောင်တွေကို ဖမ်းချင်ပေမယ့် ဝူရှဲ့ဆီက အတားခံလိုက်ရသည်။ ရေထဲမှာ ရှိတဲ့ အခြေအနေကို သူတို့ သိပ်မမြင်ရသလို နှောင့်ယှက်မိရင် ဒုက္ခရောက်နိုင်လားလည်း မသိချေ။ နောက်ပြီး ဒီပိုးကောင်တွေကို သူတို့တစ်ခါမှ မတွေ့ဖူးတာကြောင့် ရှားပါးမျိုးစိတ်လည်း ဖြစ်နေနိုင်ရာ သတ်မိရင် နှမြောစရာ ကောင်းလှသည်။

ဖက်တီး : "ဒီထူထပ်​​နေတဲ့ အကောင်တွေကို ကြည့်စမ်း.... ရှစ်ထောင်မကဘူး ရေထဲမှာ ရှစ်​သောင်းလောက်​တောင် ရှိမယ်ထင်တယ်... နည်းနည်းပါးပါး ဖမ်းပြီး ပြန်ယူသွားရင်လည်း ကိစ္စမရှိလောက်ပါဘူး... မဟုတ်ရင် ဒီခရီးစဉ်က အလကား ဖြစ်သွားမှာပေါ့"

ဝူရှဲ့: "ဒီအကောင်တွေက ရွံ့ရှာစရာကောင်းမယ့်ပုံပဲ... မင်းက သယ်သွားပြီး ဘာလုပ်မလို့လဲ ပေါက်ကရတွေ လျှောက်တွေးမနေနဲ့ အဲဒီကိုပဲ မြန်မြန်သွားရအောင်"

ဤနေရာက ပိုးကောင်များစွာဖြင့် ဘယ်သူမှ မနေချင်ကြသောကြောင့် မြန်မြန်ပဲ ထွက်သွားကြသည်။ မြေအောက် ရေလှောင်ကန်ရဲ့ အဆုံးကို ရှာတွေ့ရန် ဤရေလမ်းအတိုင်း ပိုမိုနက်ရှိုင်းအောင် ဆက်သွားရမှာပဲ ဖြစ်ပါသည်။ ပြီးတော့ ချောက်ကြီးကြီးတွေ မရှိတာကြောင့် သူတို့ အေးအေးဆေးဆေး ရှေ့ကို ဆက်သွားနိုင်၏။

ရှေ့ကို ဆက်လျှောက်သွားရင်း ရေက ပိုအေးလာသလို ရေထဲမှာ အအေးဓာတ်တွေ ပျံ့နှံ့သွားသလို ခံစားလာရသည်။ ရေလမ်းကြောင်းရဲ့ နှစ်ဖက်စလုံးမှာ မရေမတွက်နိုင်တဲ့ အသားရောင်ပိုးကောင်တွေ အများစုဟာ ရေလိုင်းရဲ့ အပေါ်နဲ့ အောက် ကျောက်နံရံတွေပေါ်မှာ ထူထပ်စွာ ပြည့်ကျပ်နေတာကြောင့် ဝူရှဲ့ကြည့်ရင်း အော်ဂလီဆန်သွားတော့သည်။ ရေထဲမှာလည်း တခါတရံ ခြေထောက်ပေါ် တစ်ခုခု လာထိမိတယ်လို့ ခံစားရသေးသည်။