للسماء قمر و لقلبي أنت

الجزء 84

#للسماء_قمر_ولقلبي_أنت 💙
بقلم : stories and novels
الجزء : 84
مشات سمر كتجري للسطح فرحااانة ... لقات غيثة كطل وساهية كيضرب فيها البرد والهوا زوين ... مشات عنقاتها من اللور حتى قفزاتها ...
غيثة : انااري قفزتيني حرام عليك !!
سمر : فيمن كنتي ساهية همممم ... فالتيتيز ديالك ؟؟
غيثة(حشمات وتزنگات) : اويلي سكتي ههههه ...(بغات تبدل الموضوع) قولي ليا مالك تعطلتي فين كنتي ؟؟
سمر(وقفات حداها) : ماشي مهم ...المهم اجي نعاود ليييك (عاودات ليها كولشي من طق طق للسلام عليكم ) حتى يخرجو التصاور ونوريك كوولشي
غيثة : صافي واخا
سمر(ضارت كيضربها البرد لوجهها وكتغني) : Bade saba bar
Gol gozar kon
Gol gozar kon
Gol gozar kon
Az hale gol ma
Ra khabar kon
Ra khabar kon
Ra khabar kon
Ey nazanin , ey ma jabin
Ba modai kamtar neshin
Ba modai kamtar neshin
Bichare ashegh , nale ta key
غيثة(مستمتعة فصوتها) : صوتك غزاال ...وحنيييين واخا مفهمت والو ههههههه
سمر (بابتسامة): المهم الإحساس يوصل ...(سكتات شوية) ااه بعدا بغيت نسولك
غيثة : سولي
سمر(كتهضر بحماس) : اليوم فاش خرجت تلاقيت بواحد الساطة اش غنقوليك ... زرت فالبلدان تاعييت عمرني شفت بحالها
غيثة (بطنز): علاه مالها ؟ ياكما شي جنية هههههه
سمر : اتي لاا ... وا قوقة ا الساطة ... عمرني شفت شي وحدة بداك الزين وأنا و تزعطت ا صاحبتي
غيثة : ههههه كتهضري معقول ؟؟ شكون هادي ؟ من الدوار نيت ؟؟
سمر : وييييه ا الساطة ... بلاتي نعقل شنو قالت لي سميتها
غيثة : نتي ديتي وجبتي معاها فالهضرة ؟؟؟
سمر : ويييه ... بلاتي بلاتي نتفكر ... اممممم ... اااه وريقة الحنا
غيثة : ااااااااااه صافي عرفتها !! بنت سي علي ... خت هاينة ويامنة
سمر : وييييي ... هاديك
غيثة : اييه مالها
سمر : اليوم شفتها جيهة الواد حيدات الحايك وبدات دوز على كرشها وكتضحك غا بوحدها وفاش عيطت ليها تخلعات وبدات تفتف غا بوحدها
غيثة : عادي شنو المشكل ؟؟؟(سكتات شوية وشافت فيها بتشكيك) بلا متفكري فشي حاجة مكايناش !! بنت سي علي الله يعمرها دار مكتحرك الدجاجة على بيضها كتمشى جنب الحيط ... خبز ربي فطبگو
سمر (بتمياق): مممممممممم اراي يديك ... نقطع بزولتي الا مكانت دايرة شي موصيبة تسوليني أنا !! كنعرف داك النوع لي ديما ساكت ومبين البراءة والحشمة ديما كيكونو جالسين على شي موصيبة الله يستر ... حمدو الله عليا لي دايرة بحال الما مبينة كولشي خارجة ليها طايطاي هههههههههههه
غيثة : اختي بلا متدي ذنوبها
سمر : مغنمشي تنعرف اش وااقع ... أيام الله باقي طويلة وهي لي غتبين لينا كولشي
غيثة : عنداك ا الصكعة حضي جنابك لديري شي موصيبة
سمر : متخافييش ...(سكتات شوية) اجي بعدا شنو هو الكادو ديالي ؟؟
غيثة(بالطنز) : معاجباكش انا ؟؟؟ ماراضياش بيا ولا ؟؟
سمر : بغيت ليييك غبااارة يا البقرة يا الحمارة وأنا من نيتي جالسة نتسنى (شنقات عليها)
غيثة(تفكات منها وكضحك) : زيدي زيدي تنعسي گالت ليك كاادو ههههههه
هبطو البنات كيتناگرو كيف العادة ... ولقاو كولشي نعس ... دخلو للبيت فين كتنعس غيثة ورقية كيتسلتو ... وهي تعطيها الكادو لي كان «القرآن الكريم» سمر تبلوكات ومفهمات والو وماعارتوش أهمية ... شكراتها وحطاتو ونعسو املأ فغد افضل ... 💐
بعد 3 أيام ... ☀
م.فاطمة : دوزي لعند مول الخضرة جيبي البصلة خيزو وبطاطا واللفت وماطيشة والدنجال والجلبانة كيلو كيلو ... ومتنسايش القزبور ومعدنوس والحامض
سمر (بالطنز) : ايييه زيدي مزال ... هادشي قليل بزاف
م.فاطمة : ايييه متنسايش دوزي لعند سيف جيبي العطرية ... الملحة والبزار والكامون وسكينجبير والتحميرة والخرقوم
سمر(خنزرات) : هادشي لي زدتي دابا بصح ولا تفلية ؟
م.فاطمة : اويلي على تفلية ... سيري دغيا ورجعي الناس راه رضو غداهم وحنا مزال
سمر(ربعات يديها) : ههههههههههه ... من نيتك ؟؟ كي غندير نعقل على هادشي كامل ؟؟ دروسي ومكنعقل عليهم وكنزطط غا من راسي هههههههه زوييينة هادشي تاني
م.فاطمة(مدات ليها گفة) : شدي شدي باراكة من الهضرة وطلقي راسك
سمر : أنا غنجيب لي عقلت عليه وضبري راسك ...(خرجات) هانا مشيت
م.فاطمة(دارت يجيها فوق راسها) : لا حول ولا قوة إلا بالله !!!
مشات سمر باش تقدا فالسوق وتقريبا ربع ساعة ديال الطريق بين دارهم والسوق ...شافت راسها غتعطل وقررات تدوز من طريق مختصرة ولي هي طريق خاوية بحال الغابة وكلها قيفار وحجر وشجر و واد ناشف ديك البلاصة غالبا مكيوصلها حد ... دخلات ليها وبقات غادة وكتحاول تفكر گاع داكشي لي قالت ليها مها حتى شافت بزاف ديال الطيور طارو فالسما جايين من مور واحد الشجرة ولي عادة كيكونو دليل بتواجد شي حد تماك ... طاح ليها العجب حيت مكيكون حد هنا ... بقات تقرب من الشجرة بشويية ... وكلما كتزيد تقرب كلما كتسمع صوت ضحكات خافتة ... زاد الفضول ديالها وزادت فسرعة الخطوات وهي تشوف لي ماكان طايح ليها على البال ...
فنظركم اشنو شافت سمر ؟؟ 🇲🇦
#يتبع ...
🖋 الكاتبة 🖋
بغيت غير نقول ليكم سمحو ليا الا كنت كنتعطل عليكم ولكن ماشي لخاطري ...الأحداث جاو على غفلة و وحدة تابعة لوخرا ... ماتت واحد السيدة من عائلتنا ولي أترات فيا بزاااف (كنتمنى لي كيقرا هادشي يترحم عليها 💔) ومن موراها مرضت بكورونا دااازت عليا الصراحة 😅 ... عاد الامتحانات والقراية ... و واحد الحاجة فالصراحة هو تفاعلكم جهة القصة حيت فالصراحة فاش كنكتب وكنلوح ومكنلقا حتى شي ردة فعل كنعگز وكنقول مالني على حالتي ... كنتمنى منكم طاغيو لي كتعرفوا وتفاعلو وتناقشوا أحداث القصة حيت إن شاء الله بقاي جايين أحداث زويينين ... وكنتمنى تعطيوني رأيكم حيت كيهمني بزاف وشكرا ...