للسماء قمر و لقلبي أنت

الجزء 31

#للسماء_قمر_ولقلبي_أنت 💙
بقلم : stories and novels
الجزء : 31
سمر (ميقات فيها ) : مممممم دابا داك وجه الركبة قاري شلة ... زيدي زيدي اصلا عبرت عليه هو لي خاوي ليا سطلي الكلب لاخور
غيثة (غتمووت من الخلعة): ويييلي غدايدي اهيااا سيدي بوعبيد الشرقي اااهيا الملك ... غناكلها فعضاامي ...غتخلا عشتي وأنا باقي مشفت متشوفت...نتي معرفتيش خويا الا مشا حتى تعصب مشيييت فيها
سمر : متخاافيش ا صاحبتي معندو ميدير ليك انا معاك ... اون بلوس حنا جايين عندكوم اليوم ضونك غينسا
غيثة (تهدنات شوية ) : ففففف ... واخا زيدي زيدي الله يخرج هادشي على خير وصافي
كل وحدة مشات لدارهم ... سمر دخلات كيف العادة كتنگر حيت عصبها سيف و م.فاطمة غير كتصبر فيها ... أما غيثة مشات لدارهم تعاون مها فالطياب حيت عارضين على سمر ومها بعدما تصالحو هههه طبعا غير العيالات أما سمر للالة حادة مزال كاينة حساسية بيناتهم ...مشات ديريكت للكوزينة مبغاتش تصادف مع سيف حيت عارفاه غيسمعها خل ودنيها ... جا وقت الغدا والبنات قادو الماكلة على حقها وطريقها ...وسمر وماماها جاو .. ورحبات بيهم للالة حادة ودخلاتهم للبيت الكبير جلسو كاملين كيتغداو ...أما سيف عزلو ليه بوحدو ... لأن من عادتهم الرجال مكيتخالطوش مع العيالات ...
سمر (كانت مقابلة معاها رقية لي كانت حادرة عينيها وولات ماطيشة ... وكتلعب بيديها بجوج بتوتر ...باينة فيها ممرتاحاش بقات كتشووف فيها وقالت لغيثة لي كانت بجنبها بهمس) : مالك ختك ؟
غيثة (عاد شافت فيها) : هي هكاك ... كتحشم بزاف ... دابا تولفكم
للالة حادة (موجهة الهضرة ليهم) : اش كتوشوشو ادوك الجوجات ؟
م.فاطمة (بابتسامة): باينة على شي موصيبة تاني ههههه
للالة حادة : أنا بعدا شهماتني هاد البنت اناري ... گلنا غتزوج غدير عقلها ساعا عاد مازايدة فيه بنت الكيدار لاخور خزيييت منكم تريكة شبهتي تريكة باك
غيثة (كاعما مسوقة كتخشي فوجهها): اذكروا أمواتكم بخير
للالة حادة (تجننات) : شوف البقرة لوخرا كتراد معايا فالهضرة (كضور فجنابها) فين صندالتي ... صندالتي اعيباد الله
م.فاطمة : صافي مطرا والو ... ههههه غيثة تبارك الله بعقلها غير من معزتها كتبغي ضحك ههههه
غيثة (تقادات فالجلسة وكتقلي السم لمها) : الله يحجبني ويحفضني
للالة حادة (مخنزرة): نوضي تهزي جمعي الطبلة وجيبي الديسير اللفعة لوخرا ... وشوفي خوك اش خاصو
غيثة (وقفات) : هاهي نايضة ... رقية اجي معايا
مشاو لابنات للكوزينة وغيثة قادات الديسير وعطاتو لرقية تديه لخوها حيت خافت منو هههه وهي جمعات الطبلة ودات ليهم الديسير ... بعدما كلاوه جمعات الطبلة وجابت ليهم فين اغسلو يديهم وطلعو البنات بتلاتة للسطح والعيالات بزوج بقاو متكيين على قولة المثل تغدا وتمدا ، تعشا وتمشا ...
~~~~~~في السطح~~~~~~
كانو البنات بتلاتة جالسين فكراسا فالسطح ... وكيجمعو ... طبعا غير غيثة وسمر أما رقية غير حادرة راسها وساكتة ...
سمر : ففففف مولفتش العيشة هكا كنبقا غير جالسة اوووف
غيثة : واايلي انا يصحابلي عاجبك هنا
سمر : من نيتك ؟؟؟ لا لا معاجباني تا حاجة هنايا الا فاش كنطلع للسطح بالليل ونبقا نشوف النجوم والدار المهجورة أما الباقي لاااا
غيثة : اوا الله يصاوب وصافي صراحة العيشة هنا صعيييبة ... ماشي بحال المدينة هي بعدا شوية
سمر : اااه فكرتيني بعدا ... قالت ليا ماما الليسي فالمدينة
غيثة : اه بصح نيت ... انا نيت غيخصني نمشي العام الجاي ان شاء الله وحتى رقية
سمر (باسغراب) : علاه سيادتكم اش غديري فالليسي ياكما غتمشي تقابلي ختك ههههههه
غيثة : الااا ... غنمشي نقرا ... راني مضوبلة
سمر : همممممم ... (شافت فرقية) ونتي ارقية فاش غتقراي
رقية (حادرة راسها ومزيرة على راسها ومكتجاوبش)
سمر(كتشير بيديها) : هييهووو راني كنهضر معاك
رقية (باقي على نفس الحالة)
سمر : هههههه واش زيزونة اويلي ؟
غيثة : غير خليها مزال مزعمات عليك
سمر (جاتها عجب) : شنو سميتك ؟ (ماجاوباتهاش) واش زيزونة مكتهضريش اويلي (مجاوباتهاش) بلاش لهلا تجاوبي (شافت فغيثة) هاد ختك راه معقدة
غيثة : لا لا غير كتحشم وصافي
فهاد الأثناء رقية بقااا فيها الحال علاين تبكي ... وكيف كتعرفو أصعب حاجة ممكن تقولها لشي واحد كيحشم هي هاد الكلام «زيزون ... معقد ... هضر ...ولا تحطو فشي موقف محرج قدام الناس ...الخ» وفحالة بحال رقية منها عداااد ...نرجعو لرقية لي غتحس براسها غطرطق ... محسات براسها حتى ناضت من حداهم بسرعة خلاتهم مفاهمين والو... ومشات كتجري هبطات للتحت ودخلات لواحد البيت فين كينعسو هي وختها وتلاحت فوق السداري وبقات كتبكي كتبكي وتشهق ... وكلام سمر كيتعاود فودنيها ... عمرات بلاصتها بالدموع والخناين دايزين و ولات حمراااا ... فالوقت لي كانت فيه رقية كتبكي سيف كان دايز من حدا البيت وسمع صوت البكا ومترددش باش يدخل ... ولقا صغيرتو وختو المفششة وبنتو رقية تهز قلبو فاش شافها بداك المنضر طار لعندها كيحرك فيها ويسول فيها وهي غير كتشهق ... بقا معاها لمدة لابأس بيها حتى قالت ليه شنو وقع ... عينيه ولاو كيف الجمر والقردة طلعات للسطح تشمس خصوصا فاش عرف القضية فيها سمر ..بدون سابق إنذار مشا ديريكت للسطح و وقف عليهم كي الباطل كينهج ... وهوما كانو عاطينها للضحك والتكركير ... غير شافوه صقلو ....
سيف (موجه أصبع الإتهام لسمر) : واش نتي ماباغاش تحشمي .... هاا واش ماباغاش دخلي سوق راسك ؟؟؟
سمر (غوبشات و تقابلات معاه) : اسبحاااان الله ا الشريف ياك يالاس ؟ شكاين ؟؟
غيثة تاهي وقفات وكتشوف فيهم غيقتلو بعضياتهم ...
سيف (كيعبر بيديه بعصبية) : التبرهيش ديالك طلع ليا فوق راااسي ..ضحكنا معاك شوية ونتي باغا تهجريه لينا اش يصحاب ليك رااسك !!!!ما بانت ليك غا رقية ختيييي !!! صافي تقاداو ليك قلتي اجي نمشي لرقية ... اش دارت ليك تا رجعتيها هكااااااك (بالغوات) دوووووووي ...
سمر (وجهها قاصح) : متغوتش عليا هادي اللولة .. ثانيا أنا مدرت والو لديك ختك !!!!!!! هي لي على سبة تمااام ؟؟
سيف (سااط وغمض عينيه بعصبية حيت مزال كتقابح معاه ) : وااش متتردعيش ... شوفي مغنصدعش راسي معاك واخا ... غتجمعي راسك تبارك الله مغتجمعيش غنعاود ليك التربية وغتشوفي وجهي الثاني ومغيعجبك حال !!! (شاف فغيثة) وقولي لصاحبتك تعاود ليك اش غندير الا تعصبت (رجع شاف فسمر طلعها وهبطها بقرف ومشا مخلاهاش تجاوبو)