للسماء قمر و لقلبي أنت

الجزء 79

#للسماء_قمر_ولقلبي_أنت 💙
بقلم : stories and novels
الجزء : 79
م.فاطمة(ضارت عندهم مبتسمة) : كيف جييتكم ؟؟
لالة حادة : غزاااالة تبارك الله ... خسارة داك راجلك خلا هاد الزين ومشاا ... اييييه ا الدنياا احيااااااني وكان
م.فاطمة (تقرصات وبغات تبدل الموضوع): عجبك الماكياج ا غيثة ؟
غيثة(فهماتها ومشات معاها فالخط) : اااه بزااف ... عمرني سمعت ولا ريت هادشي لي درتي دابا ...
م.فاطمة : نديرو ليك ؟؟
غيثة(ضارت عند مها) : مي واخا نديرو ؟؟
لالة حادة : نتي دابا مزوجة ...ضبري راسي
غيثة (بابتسامة عريضة): صافي غا ديريه ليا اخالتي ... اصلا غنكون غا بين النسا ...
~~~~~ سمر & سيف ~~~~~
كان سيف مشغول مع الكليان ... بينما سمر كانت متكية على الخشبة ودايرة يديها تحت حناكها ساهية وكتلعب بالورد فوق الخشبة...
سيف (بابتسامة) : الله يعاون ا لالة ... (ضار عند سمر لقاها سااهية) سسسسس
سمر (شافت فيه بملل) : مممم ؟
سيف : مالك قنطتي ولا ؟؟
سمر(رجعات كتلعب بالورد) : الا قلت ليك لا غنكدب عليك
سيف(بابتسامة) : مكاين لاش تهضري أصلا وجهك كيقول كولشي ...(شاف فالسما) عرفتي شنو يالاه نمشيو للدار غيكون فيك الجوع ياك ؟
سمر(بلامبالاة): شوية وصافي ...(قادات الوقفة وساست يديها) يالاه نمشيو
سسف : واخا خرجي تسنايني قدام المحل أنا نسدو ونمشيو
*فعلا داكشي لي دارو وتمو راجعين للدار وسيف كل شوية وكيشوف فيها وكيتسال واش غيعجبها الكادو لي جاب ليها ولا لا ... *
سمر (شافتو كيشوف فيها وساهي) : اسبحان الله ا الشريف عمرك شفتي الزين ؟
سيف (بغا يشد فيها) : ههههههههه فيناهو هاد الزين ؟؟ مشفت تا زين
سمر (ميقات فيه) : اوا العما والمعمية وضفار الجنية وحدة تسوط و وحدة تلوط و وحدة تضرب (ضرباتو على غفلة فكرشو وهي تهرب) تحت البووط
سيف (بقا كيتوجع) : اااااااااااا والله ونشدك ا ديك عويدات گانگااا (جاتو فكرة بغا يخلعها وبقا فنفس الوضعية)
سمر (كضحاااك على حر جهدها ) : ههههههههههههه عبرت علييك ... نوض نوض ا العيان (شافتو مكيجاوبهاش وغير شاد كرشو ) وا باراكا من التبووحيط ا نوض اداك راس الفجلة نووض (بدات كتخلع) ... هيييه اداك البعر ... هيييييهووو ... اويلي مال هادا ؟؟ (مشات قربات ليه وكتحرك فيه وهو لاا مجيب) سيف ؟؟ سيف ؟؟؟ وا جااوب باراكا من لعب البراهش وا الحمااار (فيها البكية) واااا سيف ماالك ؟؟؟
سيف(غفلها وشدها من دراعها بابتسامة شر) : هااااااا .... شديتك دابا معنجك فين تهربي هههههههههه كون تشوفي راسك (كيعيب فيها وكيضحك) سيف سيف اوييلي نووض 😂😂😂
سمر (باقا مصدومة وبقات كتشوووف فيه بلا حراك ... تسناتو تا سالا وهي تجمعها معاه بتصرفيقة حارة تا طراساو ليها يديها فحنكو والدموع فعينيها حيت خلعهاا) : متبقااااش تلعب معايا هاااااكاااااااااا
مشات سمر وهي معصصصصصبة كتنهج بحال شي ثور ...وسيف موراها مصمر بلاصتو مفهم مسكين والو كتمشى بالزربة وسيف عاد توگض وهو يتبعها بحال شي نگافة وهي كاعما كانت كتسمع لشنو كيقول ...
سيف : وا بلاتي تسناي راه غا كنت كنضحك معاك ...مالك دغيا تقلقتي ... وا غا بشوية ونتي غطيري
سمر كاعما فهاد العالم ... محساتش بالطريق نهائيا حتى وصلات لدار لالة حادة وبقات كدق بجهد ...
سيف(لحق عليها) : هرسيييه هرسيييه حسن ... بلاتي نحلو ...(مبغاتش تجاوبو وهو يدفعها بشوية) واا كحزي نحل الباب راه معايا السوارت
سمر خنزرات فيه وربعات يديها تتسناه يحل الباب غير حلو وهي تدخل طاايرة متسناتوش ...
سيف : لا حول ولا قوة إلا بالله ... اش هاد البنت (سد الباب وتبعها) (بصوت مرتفع) راه أنا لي خاصني نقلق ماشي نتي ...النفخة عالخوا
أما هي دخلات وكان الصقيييل فالدار ... طاح ليها العجب حيت خلات مها والبنات ولالة حاجة فالدار ...بقات تتعيط بسمية مها وتاحد مكيجاوب ... قررات تطلع للفوق وهي كتعيط بسمية ماماها وغيثة ... وسيف تابعها وسااكت حيت فراسو البلان ... غير وصلات للفوق وضورات راسها لليمن وهي تسمع «SURPRISE !» مع تفركيع ديال النفاخات بصوت مجهد لدرجة خلعها كان غيسكت ليها القلب ورجعات باللور بقوة الخلعلة غير سيف لي شدها أما كانت غتكركب مع الدروج ...
#يتبع...