للسماء قمر و لقلبي أنت

الجزء 87

#للسماء_قمر_ولقلبي_أنت 💙
بقلم : stories and novels
الجزء : 87
🌌 أذن المغرب ومشات سمر للدار المهجورة وبقات كتسنى فسيف ... دازت خمسة دقايق وتم جاي هاز فانوس فيديه ولقا سمر جالسة وسط الظلام وكتلعب بواحد العود ...
سيف : سمر ؟؟(حط الفانوس فالأرض) مالك جالسة وسط الظلام هكا ؟
سمر(بابتسامة) : اااه جيتي ... اجي جلس جلس
سيف(جلس حداها) : ياكما تعطلت عليك ؟
سمر : لا لا ... أنا نيت يالاه وصلت
سيف : اوا ... فاش بغيتيني ... ياك لباس
سمر (لاحت العود فالأرض): بغيتك فواحد البلان نااضي ...(سكتات شوية) ولكن قبل منقول ليك هو الأول غتواعدني باش تسمع حتال اللخر وغتواعدني باش تعاوني
سيف(باستغراب) : خلعيتيني بهاد الهضرة ... ياك شي باس مكاين ؟؟ ياكما قاتلة شي حد ؟؟
سمر : لهاد الدرجة كنبان ليكوم خايبة ؟؟؟
سيف : اوا نتوقع منك أي حاجة
سمر : وا قول دابا واش غتعاوني ولا لا ؟؟
سيف : واخا ا لالة ... قولي اش كاين
سمر : بغيتك تعاون واحد الكوبل باش يهربو من هنا ويمشيو لآكادير
سيف(بسخرية) : هههههه نعام ؟؟
سمر (بجدية): كيما سمعتي ... الا بقاو هنا غيقتلوهوم ناس هنايا
سيف : بلاتي بلاتي ... وعلاش غيقتلوهوم وعلاش غيهربو اصلا ؟
سمر : حيت بغاو بعضياتهم ... و البنت صدقات حاملة
سيف(ناض من بلاصتو) : كيفااااااش !!!!
سمر(تقابلات معاه) : بشوية اصاحبي دابا يسمعك شي حد ...
سيف(بانفعال) : واش بعقلك ؟؟؟ واش عارفة راسك اش كتخرجي من فمك ؟؟؟ باغا تعاوني وحدين دايرين الحرااام !!!
سمر (زادت تاهي كتغوت): اااه عارفة عاارفة وحتى نتا خاصك تعرف بلي هاد الناس خاصنا نعاونوهم ونشدو بيديهوم ماشي العكس !!! لي عطا الله عطاااه دابا وداكشي وقاااع معندك ما تلوم دابا ...واش مفكرتيش بلي راه غيموتو تلاتة دالناااس تلاتة جالأرواح تاحد معندو الحق يحاسبهم !!! والا مبقاوش فيك فكر غير فداك البيبي الصغييييور لي معندو حتى شي ذنب... بصراحة تصدمت من la réaction (ردة فعل) ديالك ... ولكن نسيت بلي راك كابر هنا و واحد منهم(كتضربو بصبعها لصدرو) ... ولي المخير فيهم كيديرهم من التحت للتحت ...المخير فيهم كيكدب وينافق ويهضر فالناس ويسب وياكل حق الناس ويشفر و زيييييد وزييييييد وملي يجي قدام الناس يبدا يفتي ويعطي فالنصائح !!!!(تنهدات بعمق) اووووف 😤 ... المهم الا مبغيتيش تعاوني ضبر راسك غير s'il te plait (عفاك) هاد الموضوع يبقا هنا واخا (تمات خارجة معصبة وهو يهضر حبسها)
سيف(مخنزر) : شكون هوما هاد الناس ؟؟
سمر (ضارت عندو والضحكة فشفايفها): غتعاونهوووم ؟؟؟
سيف(باقي منفخ) : غنشوف ... شكون بعدا هادو ؟؟ من حقي نعرف شكون غنعاون ولا لا ؟
سمر(قربات حداه فرحانة) : ايييه ... ولكن ... بصراحة معرفتش سمية الدري مسولتوش ولكن عارفة غير سمية البنت ... المهم راه قلت ليهم ملي نلقا الحل غنتلاقا بيهم باش نقادو الامور ...
سيف : هممممم ... واخا خاصك تهضري معاهم و يوجدو راسهم دغيا معندناش الوقت لي نضيعوه ... الناس ديال القبيلة صعاب بزاف والا مشاو حتى ساقو الخبار ما هم فخير ... وكيما قلتي الدري الصغير معندو حتى ذنب فهادشي
سمر(عنقاتو بلا متحس) : ياااااااي ... كنت عاارفاااك غتبغي تعاوني ... (رجعات لبلاصتها كتشوف فيه وعينيها فيهم واحد البريق من الفرحة) كنت عارفاك ماشي بحالهم قلبك بيض
سيف(معرف باش تبلا) : احم ... المهم ... شغاديري دابا ؟
سمر : غنمشي نقلب على الدري نقولها ليه ... اه بعدا راه ديجا وصيتو باش يجمع شي فلوس ويضبر على راسو باش يلقا كيف يديباني راسو تماك وعطيتو l'adresse ديال صحابي غيعاونهم
سيف : اوا ملي كولشي واجد اش كنتسناو ... يالاه نمشيو عندو دابا نيت ... عارفة فين كيكون ؟
سمر : لا ... ولكن نقلبو عليه 
سيف : بلاتي ... باش منضيعو الوقت بزاف نتي سيري عند ديك البنت هو الأول باش توجد راسها ... ومن بعد نقلبو عليه
سمر : ميمكنش !! كي شتي هي عندها جوج خواتاتها لفعاات سامات مكيحملونيش ...وديجا دابزت معاهم دونك ميمكنش نمشي عندها للدار
سيف : ففففففف مشكيلة هادي !!!
سمر(سكتات شوية كتفكر) : ااااااه ... علاش لي منصيفطوش غيثة ... هي بعدا عزيزة عليهم وتقضي لينا الغرض
سيف(بقا كيفكر شحاال) : زعما ؟؟ ولكن الواليدة مخصش يكون فخبارها والو ... (موجه ليها أصبع الإتهام) وياااااك تصيق الخبار حيت كولشي غيتضرب لينا فالزيرو
سمر : لا لا كون هاني ... عرفتي شنو سير نتا لداركم وقولها لغيثة باش غدا تمشي تقولها ليها ياك وأنا نمشي دابا نقلب على خونا ... مشات ؟
سيف : لا لا منخليكش تقلبي عليه بوحدك والليل دابا ... لا لا
سمر : كتسطى عليا لا ؟؟ أنا راه سمر سمر !!!مرا وقااادة و لي دوا يرعف ... قاليك منخليكش بوحدك
سيف : هههههه ... واخا واخا !! مگلت والو
سمر : هكاك ... المهم ايمتى غيخصهم يمشيو ؟؟
سيف : بعد غدا مع الفجر ... مزيانة ؟
سمر :  oui oui parfait  !!!
#يتبع ...