للسماء قمر و لقلبي أنت

الجزء 136

#للسماء_قمر_ولقلبي_أنت 💙
بقلم : stories and novels
الجزء : 136
وصلات للمدرسة ودخلات للبيت ولقات غيثة كتحفض ...
غيثة (شافتها كتضحك وهي تصدم وخلات كاع لي فيديها ومشات لعندها) : هي شي يهودي سلم ... ملي سمر تبسمات وضحكات ... شنو ورا هاد البسمة ؟
سمر(هزات حاجب ونزلات لاخور وهزات كتافها) : كون بقيتي معايا غتعرفي
غيثة(خنزرات فيها) : عاودي بلا بهلان
سمر(سدات الباب ومشات جلسات فبلاصتهل وغيثة فالناموسية لي مقابلة معاها وهضرات بحماس) : سميتو آدم .. قدي فالعمر ... ومن تركيا
غيثة(هزات حواجبها) : همممممم اوا ؟
سمر(كاهضر وتعبر بيديها) : ضريف وحلو ولسانو عسل ...مصواب ومأدب ... أول مرة شي واحد يعاملني هكاك ... بحال شي أميرة ... بحال شي ملكة ولا سلطانة
غيثة(دارت يديها فجنابها) : هايهايهايهاي ... كملي
سمر : شنو غنكمل ؟ ...(بابتسامة خبث) غدا غنمشي نشوفو تاني
غيثة : شتك مدكرتيش حس الفلوس ... وشحال ناوية تبركي معاه ؟
سمر (ضحكات حتى تسدو عينيها): هههههههههههه .... لاااا لااا فهمتيني غلط ... واش يصحابلك عجبني وبغيت نتصاحب معاه ؟؟ لا لا غير des amis (أصدقاء) وصافي
غيثة(بنظرة تشكيك) : شوفي وكان
سمر : لا لا متخافيش ... أصلا باقي برهوش باقي كيقرا ...(غمزاتها) وبيني وبينك أنا بان لي البلان فخوه
غيثة(خرجات عينيها بصدمة) : خووووه ؟؟؟؟ علاه نتي لحگتي تشوفي حتى خووووه
سمر(ضرباتها ليديها بشوية) : الاااا ... هو عاود ليا عليه وغير من هضرتو بااااينة فيه خانز فلوس وكاريزماتيك وزوين ... هو بعدا طبيب وساكن بوحدو وكيجي للصيف لأكادير
غيثة : هكاااك ... اوا ردي بالك هاودني منك ... بقاي تابعة الفلوس حتى تبقاي عالضس ... عارفاااك كطيري
سمر : الا متبعت الفلوس شنو غنتبع ؟ ... خاصني نضبر على راسي ... نتي غتاخدي الباك وتمشي لإيطاليا وتخليني بوحدي مع هاد الهجيج
غيثة : ممممم زعما بغيتي تگولي متقدريش تعيشي بلا بيا ههههه
سمر : هههههه أنا كنقلب نصوفي راسي ... طلع لي هادشي فالراس ... (تكات وكتلعب فشعرها) مكرهتش نعس ونفيق ونلقى راسي كنعوم فلابيسين وسط شي جردة كبييييرة وفيها الورد والشجر والخدم دايرين بيا والفيلا كبيييييرة وبيتي تاهو كبييييير والطوموبيلات والمجوهرااات والحوايج ... احححححح
غيثة : اسبحان الله ... فيقي من الگلبة قالتليك الخدم هاهااااياوات
سمر(ناضت وشيرات عليها بمخدة) : والله يا مك !!! خليني نحلم ...(تقادات فالجلسة وكتلعب بصباعها وملامح الجدية فوجهها) واصلا ... بصراحة ماناوياش نفتخ خو آدم ... ولا شي حد اخور راه غير كنضحك وصافي ...
غيثة(تصدمات فيها ومشات جلسات حداها وحطات يديها على كتفها) : سمر !!!
سمر (بملامح حزينة): أنا واعدت راسي غنديها فقرايتي حتى نكملها وبمونسيون ... ونخدم خدمة واعرة ونخرج ماما من هاد العيشة ...أنا واعدت راسي و واعدت خوك ... باش نتبدل ونولي انسانة أخرى ... انسانة مزيانة مقابلة غير قرايتها ومستقبلها وصافي ..ّ (غرغرو عينيها) عيييت من التسلگييط والدراري والبلية ... عييييت
غيثة (بقات كنشوووف فيها وهي تبتاسم ابتسامة رضا حتى عينيها كيبريو): هكا نبغيييك ... فرحتيني اصحيبتي (عنقاتها جنب) مغنخليكش بوحدك
سمر(بغات تقلب الموضوع حيت مبغاتش تبكي) : هههه. متخافيش فاش غندير لباس بدراعي غنجي لعندك
غيثة : مرحبااااا وألف مرحباااا ... مالي غنساين فيك حتى ديري لباس ؟؟ الا لقيت كيفاش ان شاء الله نجيبك تسكني معايا
سمر : اوا عنداك عقلي على هضرتك ... عنداك غير توصلي تم تنساينا ومترضايش بينا مزااال
غيثة : ههههه هي كنتي كدريها ؟
سمر (سهات قدامها): واييييه شحال تبعصصت على بنادم وتكبرت عليه وشحال عايرت وسبيت وعيبت فبنادم ... اييييه وشحال فتخت من واحد وشحال تصاحبت ... بشاااااخ
غيثة : هي گولي دوزتيها على بنادم ... الله يسمح ليك
سمر(جبداتها) : ويييه دوزتهاااا
غيثة : نوضي تگعدي خليني نكمل حفاضتي ... اجي بعدا شنو درتي فالبروجي ؟
سمر :كماااالتو تصاحبني بحالك ... (هزات الدفتر فاش خدمو ولاحتو عليها )شدي ... اجي بعدا واش بعقلك شمن حفاضة دبا !!! سيري تال غدا وكملي
غيثة(سكتات شوية) : عرفتي شنو ... عندك الصح نيت عييت ... طفي الضو معااك ونعسي حتى نتي (جمعات بلاصتها ونعسات)
سمر : واخا ...
مشات بدلات حوايجها ولبسات بيجامة وطفات الضو وتخشات ففراشها بقات كتشوف فالسقف ... شوية وهي دير يديها تحت المخدة وهي تبلوكا ... عاودات دارت يديها كتقلب وهي تعقد سبعة فربعة ... ناضت بزرلة وهي تلوح المخدة وملقات والو ... بقات كتقلب بحال شي هبيلة ... وتسوس فالفراش وتقلب تحت السداري وفلات البيت كامل ... سنعاتها غيثة وهي ضور عندها
غيثة : مالك شنو تالف ليك ؟
سمر(تالفة كتقلب) : دفتاري دفتاري ... ماشفتيهش ؟؟
غيثة : شمن دفتر ؟ ....(مجاوباتهاش وهي تكمل هضرتها) اااه داك لي ديما معاك ؟ راه ديتيه معاك واش مجبتيهش ؟ شوفي ياكما حطيتيه فوق شي بلاصة
سمر(باقا كتقلب) : لا لا لا لا لا ... (حبسات وبقات كتفكر وهي ضرب يديها مع جبهتها بعصبية) لاااااا لاااااا ...
غيثة(جلسات) : مالك ؟؟
سمر (كتهضر تحت سنانها بعصبية): نسييييتوووووو عند آدم !!!!
غيثة (ببرود): نسيتيه ؟ الا نسيتيه تال غدا وسيري جيبيه ياك غتلاگاو بجوج ... مالك دايرة حالة ا صاحبتي على دفتر ... الگنازة كبيرة والميت فأر !!! (بغات تضحك معاها) ولا ياكما مخبية فيه شي سر همممممم
سمر (مداتهاش فيها وهي تمشي تخشات ففراشها بعصبية وضورات راسها) ...