للسماء قمر و لقلبي أنت

الجزء 54

#للسماء_قمر_ولقلبي_أنت 💙
بقلم : stories and novels
الجزء : 54
أصبحنا وأصبح الملك لله ☀
فاقو البنات كيف العادة ودارو روتينهم الصباحي ...وسمر فالصباح كتكون خااااسرة ...خصوصا حيت مقطوعة ...دخلو القسم وكانت حصة الاجتماعيات ... والأستاذة مكتحملش سمر ...وديما حاطة عليها .. سمر كيف دخلت بقات حانية راسها على الكتاب وحداها غيثة متبعة فالشرح ... حتى غفلاتها الأستاذة ....
الأستاذة : سمر
سمر (قفزات) : نعام !
الأستاذة (ربعات يديها) : يالاه جاوبي
سمر : مسمعتش السؤال
الأستاذة (غوبشات) : كيفاش مسمعتيش !!!
سمر (حدرات راسها مافيها ميتجاوب معاها)
الأستاذة (قربات حداها) : ا لالة راني كنهضر معاااك
سمر : عفاك راه مافيا ميتراد معاك فالهضرة ... والله ...
الأستاذة : ويييلي ويييلي على قليلة العفة !!! خرجي علياااا ... كتجي معطلة ومكتابعيش فالقسم وزايداها بتخراج العينين .... براااااا
سمر (طلعات ليها الگناوية للراس وخنزرات فيها) : كيفاش خرجي مالي شنو درت لييك ؟؟؟ (حدرات راسها)لا مخارجااش
الأستاذة (ضربات فوق الطاولة) : خرجييي علياااا براااا ... ممربياااش
سمر(كتحاول متخرجش الوحش لي داخلها وعاودات هزات راسها فيها) : واش دابا نتي جاية معصبة وبنت ليك أنا فالبلان ؟؟؟ ا لالة ماخارجاش  ... قولي ليا اش درت ونخرج
الأستاذة : دابا ماباغش تخرجي ؟؟؟
سمر (بحدة) : لاا !!!
غيثة (كتغمز فيها بمعنى غير خرجي)
سمر (شافت فيها مخنزرة) : بلا متغمزيني تانتي ... طلقي مني الله يحفظك
الأستاذة : يا أنا يا نتي فهاد القسم
سمر (ربعات يديها وتكات على الكرسي) : أنا ماخارجاش والمخير فحميرك ركبيه
الأستاذة مشات كتجمع فكتوبها فصمت وناوية على خزيت ... و ولد الحاج كيحاول يقنع فيها غا باش تخرج ومتجبدش الصداع على راسها ... شوية هي تنقز ياقوت وفاض الكاس ...
ياقوت (كتلعب فشعرها وكطنز عليها) : صافي احبيبة تكالماي وخرجي ... راه بغينا نقراو
سمر (جاوباتها بحدة وكتغوت وكتشير بيديها) : وااا دخلي سوووق مممممممك .... ديهاااا فممممك
الأستاذة (كتحاول تشعل العافية دارت يديها فوق صدرها):هيييييييييييه كتسبي ليها فمها مزاااال ... مها راه ميتة ا قليلة العفة !!!!!!
ياقوت (بحالا قرصتيها وجعرات ) : مييييي ؟؟؟؟؟؟ (شدات دفتر غليض وشيراتو عليها جا لسمر فجبهتها)
سمر غمضات عينيها وعضات شفتها بعصبية وماجاوباتهاش مشات ديريكت كتجري لياقوت شداتها من شعرها وبقات كتنتف كتنتف بكل قوة وياقوت كتغوووووت والقسم ولا حالتو حالة بالغوات ... نجمة و وغيثة وكاع صحاب سمر كيحاولو يفكو فيها وهي كانت بحال شي لبؤة جااعرة قاسو ليها ولادها ... شافتهم تجمعو عليها وماواخداش راحتها وهي طلع فوق المقعد وشعر ياقوت بين يديها ... فهاد الأثناء الأستاذة تصدمات وصقلات فبلاصتها ... كانو شي بنات كيحركو فيها باش تهرب بقاو معاها تا عياو وجروها من يديها خرجوها ... وشي وحدين شافو الوضع غادي وكيتأزم وهوما يهربووو ماشافوش وراهوم ...ومشاو كيجرييو للإدارة باش يفكيو ديك الروينة لي نايضة ...أما فالقسم كيبانو الطوابل والكراسا كيتهزو والأدوات كيتشايرو والدفاتر ولاو جفاااف ...سمر كتضرب فياقوت وطرش فيها تا ولا حنوكها حمرييين ونجمة مقنتة كتبكي ...شوية ياقوت بان ليها بركار شداتو وخشاتو لسمر فرجليها ... وهادشي غير ما زاد جعر سمر غوتات على حر جهدها حتى تخلعو لوخرين وهبطات زدحات ليها وجهها مع المقعد وحيدات ليها البركار من يديها تا كانت غتخشيه ليها فعينيها وحيدو ليها ولد الحاج ... وهزها الخصيم بغفلة وهي كتركل وتنطر  ... وياقوت يالاه طلعات النفس وعطاوها البنات تشرب ... الدراري خرجو سمر كتغوت لبرا وتبعاتهوم غيثة بحال النگافة ... وعاد شرف المدير والحارس العام معاهوم تا البوليس ... داو ياقوت وسمر ومشاو ... أما الأستاذة دخلات للقسم كتبكي وترعد ... حتى جمعات حوايجها وخرجات مقدراتش تقري ... و خلاصة القول التلاميذ مقراوش داك الصباح كولو بسبب هادشي لي وقع ... الأجواء كانت مكهربة وكولشي كيتعاود اش وقع ... حتى وصلات العشية وكانو صحاب سمر مقنتين فقنت و نجمة كتبكي وضايرين بيها شي بنات من القسم وغيثة جالسة بوحدها حاطة يديها تحت حناكها وكتشوف قدامها ...حيت كانو داخلين مع الربعة ... شافوها الدراري ومشاو لعندها ...
ولد الحاج : احم ... ختي غيثة !
غيثة (شافت فيهوم كاملين) : نعام ؟
زريقة : كاين شي خبار على سمر ؟؟
غيثة : بحالي بحالكوم ... من الصباح وأنا هنا !!
الخصيم (كيشوف جيهة الإدارة) : راهياك جات !
غيثة ناضت قافزة ومشات كتجري لعندها وتبعوها الدراري ... مكانتش سمر بوحدها ... كان معاها تا سيف وياقوت .. ونجمة تا هي جات عنقات ياقوت
غيثة (طارت عليها عنقاتها) : تخلعت علييييييييييك ...
*عنقوها تا الدراري وسيف كيطلع ويهبط فيهم *
المنونخ : تخلعنا عليك
غيثة : فين كنتووو (شافت فخوها) خويا اش كدير هنا ؟؟
سيف (مخنزر) : مشيت نفك حريرة هاد خيتي لي مكتقاداش !!
سمر (شافت فيه بحدة) : تا حد مطلبك !!!
سيف : مزال زايدة فيه ... زيدي تحركي قدامي
غيثة : فين غاديين
سمر : نشوفو هادو تاهوما اش غيديرو معانا ... يالاه تا نخرج ونعاود ليك
بقاو الدراري وغيثة و نجمة كيتسناو قدام الادارة ... حتى خرجو ... ياقوت مشات مع نجمة وبقاو غير هوما
غيثة : اش دارو ليكم ؟
سمر : والو ... سنينا التزام ومع الربعة غنطلبو منكم السماحة !! صافي
سيف : كون ما الأستاذة سمحات ليهم كون خيخو فالحباسات ... 
سمر : شكرا حيت كتفكرني شكرا !! ودابا ياك ساليتي شغلك اوا شكرا ... الله يعاونك ... اففففف ملقاو علامن يعيطو
سيف : شنو ... بغيتيهم يعيطو على مك تسخف ليك هنا ولا شنو ؟؟؟
المنونخ : سمر شكون هدا ؟؟؟
سمر : خو غيثة
المنونخ : وملي غير الخودري دغيثة ...(حط يديه على كتفو) اش دخلك فالدرية ديالي ؟؟؟(غمزو)
سيف (شاف فيديه ورجع شاف فعينيه) : شتك زعمتي ؟ حيد مكافشك ودخل سوق راسك واخا !!!!
الخصيم (خنزر فيه) : هانية الدعوة ؟؟؟
سمر (شدات يد المنونخ) : صافي عفاك !!
سيف (بقا كيخنزر فيه وهو يشوف فيهوم كاااملين وجر سمر من ذراعها وقرب لودنيها) : باقي نشوفك مع هاد الماركة غيكون حسابي معاك واحد اخر ...(يالاه بغات تجاوبو وهو يزير على يديها) ششش منسمعش حسك !! سيري تكمشي فالبيت ومضوريش هنا كي الزوفري غتسناي تا توصل الوقت وديريكت للقسم ونسمع عليك شي حاجة اخرى تاني بالررررب تتشوفي وجهي التاني !! وهاني علمتك (طلق منها ومشا فحالو ... وسمر غرغرو عينيها ومشات للبيت ولحسن الحظ ملقاتش ياقوت ونجمة ... تبعاتها غيثة والدراري يقاو تماك مفاهمين والو ...
سمر (جلسات فبلاصتها ودموعها كيطيحو بحال الشلال وهي كتمسح فيهم) : اش يصحاب ليه راسوو الحماار لاخور !!! تفووو كلب يخ يخ اهئ اهئ اهئ الله يلگيها ليه كحلة زحلة تفووووو
غيثة (جات حداها) : مالكي لاش كتبكي ؟؟؟
سمر : بعدي مني عفاااك !!!!!
غيثة (تنهدات) : واخا واخا ... مغنسولكش واخا !! يالاه رتاحي شوية راه مابقا والو على الربعة ... واخا ؟ أنا هنا غير حداك (مشات لبلاصتها)
سمر (مجاوباتهاش وجرات مانطة عليها وضورات وجهها وبقات كتبكي في صمت )
...سمر من النوع لي مكيبكييش بزاف والا بكا عرفو وصلات بيه للعظم و واخا هكاك مكيبكيش قدام الناس ...وفهاد اللحظة حسات بالحگرة والشمتة من الطريقة باش هضر معاها سيف واخا هي فالعادة مكتسوق لحد !!! بقات غيثة كتراجع حداها وسمر داها النعاس حتى وصلات الربعة ... فيقاتها غيثة ومشاو للقسم طلبو السماحة من التلاميذ والأساتذة وجلسو كيقراو عادي ...
#يتبع ...