للسماء قمر و لقلبي أنت

الجزء 32

#للسماء_قمر_ولقلبي_أنت💙
بقلم : stories and novels
الجزء : 32
سمر (بقات واقفة مصدومة مرضاااتش ... عضات فمها بعصبية وضحكات بعصبية ... وضارت عند غيثة ) : مال هادا تاني واش كيتوحم عليا ؟؟
غيثة : اوووف صافي مديش عليه .. شبان ليك نخرجو ؟
سمر (كدوز على شعرها بعصبية) : فين غنخرجو ؟ واش هنا فيه فين نخرجو بففففف
غيثة : غير يالاه معايا ... نمشيو للواد عندي نيت شي حوايج نصبنهوم ... عفااااااك (غرضها هو تنسيها اما هي ما هامها لا حوايج لا تصبين)
سمر (شافت فيها شي شوفات) : من نيتك ؟؟؟
غيثة : اه من نيتي... وا زيدي براكا من التبعكيك
جراتها بزز منها هبطاتها.. وصلو للتحت ولقات مها لابسة الحايك ديالها و واقفة حداها م.فاطمة كانو باينين يالاه خارجين
غيثة : مي ؟؟ فين غاديين ؟
للالة حادة (كتقاد فالنقاب) : غنمشي نعرف للالة فاضنة على الجيران
غيثة : ااااه ...انا نيت غنمشي للواد نصبن وغتمشي معايا سمر ... فين رقية ؟
للالة حادة : مزيااان الله يرضي علييك ... راها ناعسة فالبيت ... يالاه هاحنا مشينا ... (مشاو خرجو)
غيثة (ضارت عند سمر): هانا نمشي نلبس ونجي
مشات غيثة تلبس الحايك وفنفس الوقت تجمع كاع الحوايج لي غتصبنهم فسطل و واحد اخور خاوي باش دير فيه الحوايج النقيين و فراكة والصابون حجرة ... مشاو لجيهة الواد لي كانت مضرگة ... سمر جلسات حدا غيثة فوق واحد الحجرة وغيثة حيدات الحايك وگفضات راسها باش تصبن على راحتها ونيت هاد البلاصة مكيوصلوهاش الرجال ...بقاو كيجمعو عادي ...حتى تمو جايين شي بنات اخرين ... شافتهم غير سمر بحكم هي لي مكانت كدير والو ههههه
سمر (كتشووف بعيد فدوك البنات) : أم الغيث ...شكون هادوك لي جايين ؟
غيثة (شافت فين كتشوف) : ااااه ... هادوك ... (رجعات شافت فيها) هاديك لي الوسط ايطو بنت القايد عيسى ودوك لي فجنابها خديمها
سمر (بتعجب): بنت القايد ؟؟؟ بنت القايد وكتصبن ؟؟
غيثة (ضحكات حتى تهزو حناكها البيضين وكيبريو مع الشمس) : ههههههههه من نيتك ؟ راه خديمها لي كيصبنو وهي كتجي تشمس ... (شافت فيها) بحالك
سمر (بتاسمات بفخر) : ههههه اوا هادشي خليتو ليكم
فهاد الأثناء جاو خديم ايطو كولهوم لابسين الحايك فرشو ليها جليسة جنب الواد مع مخيدات والديسير والتمر جلسات هي بجعرفة كانت لابسة حايك مميز باللون الأسود ومطروز فالحاشيات بدوائر بيضاء ونقاب باللون الأسود .....شي وحدينات من الخديم مشاو يصبنو وبقاو جوج واقفين عند راسها كينشو عليها البرد و وحدة شادة جدع النخلة مضرگة عليها الشمس ...وهي جالسة بحال شي ملكة ... تقادات فالجلسة ونزلات النقاب وبان وجهها لي كان باللون الأسمر وجمالها عربي 100% العينين مجبدين وكحلين والشفار كتار وكحلين ...
ايطو (كتشوف قدامها ) : غيثة... عاش من شاافك !! ولا ... لي لقا صحابو ينسا حبابو ؟؟؟ شتك بدلتينا بان ليك الجديد همممم ماشي مشكل ... ولكن كيما كنقولو معامن شتك معامن شبهتك (ضحكات ضحكة جانبية)
سمر (وقفات دارت يديها فجنابها) : نعام نعام نعام ؟؟؟ بحالا كتحشي ليا الهضرة لا ؟ويااربي نكون مكنسمعش مزيان
ايطو (مزال كتشوف قدامها) : المحبة الزربانة مفرقة في نهار
سمر : جيني گود ولا تجيني معگود
غيثة : سمر من زين الناس ... متعرف تخون ولا تحسد ...عندها غير الحق والمعقول
ايطو (بابتسامة استهزاء) : العودة عمرها ما تولد البعير والحوت عمرو ما ياكل الشعير ... والرخيص عمرو ما يستعرف بالخير واخا تگلسو على الحرير
سمر (طلعات ليها القردة للسطح) : دابا هاد حزقة لاروب علاياش كتقلب ؟؟؟ والله يا مها تنتفها !!!! (مشات نيشان تقابلات معاها وتبعاتها غيثة لدير شي كارثة) من الاخر اش باغا
ايطو (كطلع وتهبط فيها) : حتارمي مقامك ... أنا ايطو بنت القااايد عيسى ...خفضي صوتك وحيدي من قدامي... يالااه
سمر (بالغوات) : ومن بعععععد !!!! كوني بنت القايد ولا السلطاان ومن بعد ؟؟؟؟؟ غتفوتي ساحتي ولا والله تنشطب بيك هاد الخربة لي عااجباك
ايطو (ناضت تقابلات معاها وبانت قصيييورة قدام سمر) : غتبلعي لسانك ولا نعيط للعبيد يعلقوك فالدخلة د الدوااار ... سيري غا تستري ونتي مقزبة كي الفجر راه زين النسا فالسترة
سمر (بدون سابق انذار دفعاتها للأرض وتلاحت عليها تتنتفها وتعض فيها خوات فيها كاااااع سمها لي جامعا من زماان متسوقات لا للخديم لي كيغوتو لا للغيثة لي كتغوت باش تحبس ) : شدي لمممممك هااكي هننننننننن (كتنتف فيها وتقمش ليها فوجهها وتقرص فخاضها) يا الكلبة الجااايفة يا البقرة المجعورة يا الكلبة المصعورة هااااااااااكي (شدات شعرها بيديها بزوج وكديها وتجيبها ولوخرا كتغوت لربي لي خلقها والخديم تا وحدة مزعمات تقرب ليها ) هااااا لي قالت مقزبة هااااا لي قالت رخيصة هااااا لي كطرطا من الصباااح هاااااا مقاامك ا الحشرة
غيثة (كتحاول تفكها) : اوييييلي سمر ... وقفي وقفي سماااار ... ولااااا غتقتليها بارااكا ويلي ويليييي
شافتها ممصوقاش ليها وهي تلاح عليها من الجيهة لوخرا كتعطيها هاك بالاك هاك بلاك حتى رضوها جرتيلا والخديم هربو يقولوها لباها ... اما هوما جمعو الحوايج بالزربة وفرتحوو حتى بعدو على المنطقة كينهجووو ويضحكو... لبسات غيثة الحايك والنقاب ديالها ورجعو لدارهم دغيا دغيا وهوما غيموتو من الضحك  ...لقاو الأمهات رجعو من عند الجيران ومصايبين كاسكروط ... مشاو للسطح باش ينشرو الحوايج
غيثة (كتعصر فالحوايج وتنشر) : ناااري ا الصگعة و يصيقو الخبار حتى يديونا بزوجنا
سمر (واقفة حداها مكدير والو كالعادة) : متخافي واااالو ... كنعرف هاد النوع فيهم غا الهضرة ... مغترضاش تقول ليهم راه دگوني ... يامات دابزت مع بزاف دالبنات وهاد النوع حااافضاه ... متخافيش
غيثة (كتنشر اخر تريكو ) : وايني واحد اللفعة منك ماكاين ...زيدي زيدي ...