للسماء قمر و لقلبي أنت

الجزء 132

#للسماء_قمر_ولقلبي_أنت 💙
بقلم : stories and novels
الجزء : 132
الكاتبة 🪶🕯️:
الحياة تقلبات من بعد ما سيف دخل للحبس ...لالة حادة غير كتبكي وكتعاير وتسب فمدام فاطمة وسمر ...أما هاد الزوج مبقاوش كيخرجو من الدار وحتى الا بغاو يقضيو غراضهم كيخرحو فالصباح بكري ولا الليل ... عياو من كلام الناس لي فينما شافوهم كينعتو عليهم ... وطبعا رضو اللومة كولها لسمر واخا معارفينش الحقيقة ...أما غيثة مسكينة ما حيلتها لسمر لي توحشاتها ومتقدرش تشوفها ولا تهضر معاها ... وماحيلتها لمها لي حولات الدار لعزو وعاد مزادت فالنگير ...أما سمر فولات منعزلة أكثر وأكثر كتهضر بالعبار ... تقريبا كتقول غير جوج كلمات فالنهار وغير بزز ... وديما عاقدة خوباشتها ... دوزو العطلة الصيفية غير فالدار بين ربعة دالحيوط وصحابها كيجيو عندها تقريبا يوميا باش يرفهو عليها ولكن بلا جدوى... وجا وقت الدخول المدرسي ... وآخر سنة ليهم فالمرحلة الثانوية ...تلاقاو الكليكة ديالنا عادي ضاحكين ناشطين كيف ديما الا سمر لي كولشي لاحظ بلي تبدلات بزاف و ولات منعزلة بزاف وكتهضر وتضحك بالعبار ...اليوم كانو داخلين عند الاجتماعيات ... وسمر كترسم فدفتارها المعتاد ولي ديما هازاه معاها ... دفتر غلافو حمر و وراقو بيضين ...فاللول كانت بدات كترسم بنات كيبكيو ولا عينيهم مغرغرين ولا كيغوتو ... ولا عريانين وخايفين ... مهم رسومات كئيبة وكولها بالكحل والبيض ... ولكن هاد الأيام ولات كترسم ناس مقتولين وبدماياتهم وناس معلقين ولا محيدين ليهم عينيهم ولا مقطوعين ليهم اللسان ولا الرجل ولا اليد ولا الودن... أو بالأحرى أي حد كتعرفو أو عرفاتو كتكتب سميتو وكتبدا تخيلو ترسم وتكتب السيناريو ديال أجمل طريقة لي تقدر تعذب بيها داك الشخص ولا تقتلو ...بطبيعة الحال هي مكتفكرش تآذيهم بصح مستحيل ... غير فكرة أنها هي فكرات فداك السيناريو لي فالاغلب الأحيان كيكون فريد من نوعو على كيف كتقتلهم ولا كيف كتعذبهم ... غير فديك اللحظة كتخليها تحس براسها قوية وبحالا هي لي متحكمة فحياتهم وبلي تقدر ترد حياتهم جحيم فأي لحظة ... مكيعجبهاش تفكر فحوايج أو طرق بساط بحال مثلا تخنقهم وهوما ناعسين ... بالعكس بالنسبة ليها داكشي بايخ ... والحوايج لي كدير وكيعجبوها هي تكتب داكشي بالتدقيق ، وكتحاول تلقا لكل واحد شي خطة ولا طريقة لي تكون مخصصة ليه ولا ليها ، ولي غادة تعذبو وهو بوحدو ... خصوصا الا فكرات ولقات شي سيناريو لي يقدر يخليهم يتعذبو نفسيا ومن بعد يموتو بوحدهم ... زعما بطريقة غير مباشرة ... ولحد الآن كاع لي كتعرف من مها حتال الناس لي فالمدرسة كل واحد كاتبة عليه شي سيناريو ديال أجمل/أبشع طريقة لي يقدر يموت بيها ولا يتعذب فيها ...
الأستاذ دالاجتماعيات(ضرب يدو مع الطبلة وموجه الهضرة لسمر ومعصب) : ا لاالة ... الا بغيتي تسهاي تال داركم وسهاي ...(حمر فيها ودار يدو فالطابلية ومشا)
سمر(كانت ساهية وكتضحك وقفزها) : ااا ...اوه ...(باقي مصدومة) كنعتاذر
غيثة(بهمس) : فين كنتي اصاحبتي ... من الصباح وأنا نغز فيك
سمر(شافت فيها) : غير سهيت
غيثة : هادشي كولو غير سهو ...(سكتات شوية وهي تشوف الدفتر) شنو فداك الدفتر عطيني نشوف (مدات يديها باش تاخدو وهي تحط عليه يديها بالزربة)
سمر(بحدة) : لا !!!
د.الاجتماعيات(كيشوف فيهم) : ششششش ... سكوووت وسمعوني مزيان ... (بتاسم) كما معروف أن منطقة طاطا ... منطقة سياحية وكيجيو ليها عدد لابأس به من السياح ... نظرا للمعالم الأثرية والجو ديالها ... على أي لي مطلوب هو أنكم توجدو بحث أو عرض ... على هاد المنطقة والأسباب لي كيخليو السياح يختارو هاد المنطقة لقضاء العطلة الصيفية بالخصوص ... لكم كامل حرية الإختيار فطريقة إنجاز وعرض هاد البحث ...غادي تخدمو جوج جوج فكل مجموعة ...وأول عرض غيدوز نهار واحد فالشهر الجاي وكل سيمانة غدوز مجموعة ... ولكن قبل عطيوني أسماء التلاميذ فكل مجموعة باش نديرو قرعة ونعرفو ترتيب العروض ...
داكشي لي كاين كل مجموعة كتبات سميتها فورقة وعطاوهم للاستاذ ودارهم فزلافة كبيرة وبدا كيخلط ويعطي لشي واحد يهز وهكا كيعرفو شكون غيدوز الأول وشكون الآخر ... وسمر وغيثة جاو هوما الثالتين ...وياقوت نجمة هوما اللولين ...بقاو نص ساعة حتى كولشي عرف امتى غيدوز وصونات الاستراحة وخرجو ...
#يتبع ...