للسماء قمر و لقلبي أنت

الجزء 36

#للسماء_قمر_ولقلبي_أنت 💙
بقلم : stories and novels
الجزء : 36
خرجو البنات بربعة قبل ماتكتب بيهم شي تقرير ...وجلسو فالساحة ... طبعا ماشي مجموعين ... تسناو حتى صونات ومشاو يطلبو السماحة من الأستاذة وباش تمسح الغياب ... وداكشي لي وقع ...والحصة لي من بعد كانت ديال السبور مشاو للفيستيير فاش كيبدلو وشافو كولشي لابسين حوايج السبور إلا هوما بزوج
سمر (ضارت عند غيثة) : اش كيديرو هادو ؟؟ ناري عنداك يقولينا شي حاجة
غيثة : لا لا معندو ميقول اصلا أول حصة
سمر : واخا ياللاه ...
مشاو خرجو ولقاوها أستاذة دالسبور لابسة تيشورت وسروال دالسبور وسبرديلة وشعرها مجموع ... ودايرة صفارة ويديها وراها ...
الأستاذة : جلسوو
جلسو البنات وجلسات تاهي قدامهم غير شافت غيثة وسمر وهي تغوبش
الأستاذة : بلاتي نتوما ... فين التونو ؟؟؟
سمر : أول حصة
الأستاذة : نتي جديدة ؟؟
سمر : اه
الأستاذة : منين جيتي
سمر : من اكادير
الأستاذة : همممم .. واخا حيت أول حصة غنسمح ليكم ..والحصة الجاية بلا متجيو الا مكنتوش لابسين ... يالاه جلسو
جلسو البنات وبدات الأستاذة كتشرح ليهم البروكرام لي غيمشيو عليه العام كامل وكي غتفرق القسم وكدا ...ولكن وهي كتشرح البنات كانو فعالم ثاني عالم التبركيك .. وكيوشوشو ...
سمر : دابا نتي كتعرفي المدرسة كولها ؟
غيثة : اييييه كنعرف كولشي وعائلتهم وسمياتهم ...(شيرات لوحدة جالسة حداهم ) شتي هادي ... سميتها سمية قرات معايا من الابتدائي ... مسكينة يتيمة وعايشة مع خوها وختها ... خوها باغي يزوجها بزز وختها وقفات ليه فطريقو وگالت ليه نونو وكحل عيونو سمية غتقرا
سمر : مسكيينة
غيثة : وعرفتي لطيفة ؟
سمر : لاا
غيثة : لي شعرها قصير اصاحبتي ... هاديك راه جايا من فاس ... تاهوما بحالكم جاهوم افلاس غير هوما نزلو فالمدينة ...و (قاطعاتهم الاستاذة كتغوت)
الأستاذة (مغوبشة) : ادووووك الشيخااااات ... من الصباح ونتوما دودودو ومبغيتو تحشمووو ...جايني بلا تونو وزايدينها بكترة الهضرررررة ... تهزوووو علياااا باقي گاع ماسخنتو بلاصتكم
غيثة : سمحي لينا ... آخر مرة
الأستاذة : ممممم دابا نشوفو
كملو البنات الحصص لي عندهم تال الطناش ... وكاين لي خرج وكاين لي بقا ... ولي بقا مشاو باش يتغداو دايرين كل واحد وطبسيلو ...مشاو البنات يجيبو طباسلهم وحطوهوم فبلايصهم ورجعو باش يجيبو الما ... وفاش رجعو لقاو الطباسل مخربقين حااالتهم ومكبوب فيهم الما
غيثة : لا بزاااااف ... الصبر تقاداااا
سمر (عضات على شفايفها بعصبية وصاطت ...دارت كتقلب عليهم بانو ليها وقصداتهم ديريكت ضربات نجمة بركلة لكرشها تا طاحت كتلوى فالأرض وياقوت صرفقاتها ودخلات فيها براس للنيف تا رعفات و وقفات كتشوف فيهم ...هاد المرة ضرباتهم بوحشية وخلات كولشي مصدوووم) الا كنتو براهش أنا كتر منكم تفوووووو گنس قصيف
غيثة (جات وراها) : صافي قضيتي الغراض ... زعامة الجرو كترة النبيح وركلة وحدة تلصقو مع الحيط وتحيدو من الطريق
سمر تعصبااات بزاااف وسمحات فالغدا وتمات خرجة وغيثة شافتها مشات وتبعاتها من اللور بحال شي نكافة حتى تساطحو مع الحارس العام
الحارس العام : اش كاين تما ادوك الزوجات ؟
غيثة : والو
الحارس العام : راه جا خوك ... تكلمو ليه يالاه
مشاو للبنات للساحة ولقاو سيف واقف كيتسناهوم وهاز ميكة فيديهوم... غيثة طارت عليه تعنقو أما سمر باقي معصبة مافيها مايهضر مشات ديريت جلسات ... ساقها سيف ومشاو عندها
سيف : وعليكم السلام
سمر : (مجاوباتوش غير كترعد بوحدها)
غيثة : غير خليها عليك راه ماشي على برجها
سيف(بغا يضحكها) : وا خربوشة
سمر(بحدة ومكتشوفش فيه) : فوت ساحتي هاد الساعة ... عفاك !!
سيف (بقلق) : علاه شنو واقع ؟؟
سمر (وقفات بعصبية ومكتشوفش فيهم) : غيثة أنا فالتيران (مشات بلا متخليهم يجاوبو)
غيثة : گالت ليا غيثة ...
سيف (كيشير ليها) : مال هادي ؟
غيثة : يعني مقلقة بزاف ... ففففف والو غير شي جوجات مبغاو يوقرونا
سيف (طلع حاجب ونزل لاخور) : كيبقاو ؟؟
غيثة (بعدم فهم) : هم ؟
سيف : مخليتو فيهم عضم صحيح ياك !! ... (وجه ليه اصبع الإتهام) وياااااك نسمع عليكم شي حاجة وياااك
غيثة : وصاافي ... راه قلت ليك مدرنا والو !!!
سيف : اوا الله يعميها ليك ... المهم هاكو ... صايباتهم الواليدة و خالتي فاطمة (مد ليها الميكة)
غيثة (شداتها) : يالاه نسوفوها ...
سيف : ففففف زيدي زيدي مشاكلكم مكتقاداش
مشاو لعندها ولقاوها مكونة وخاشية راسها بين ركابيها تحت واحد الشجرة ... طل سيف عليها من ورا الشجرة .. وغيثة جات جلسات مقابلة معاها فالأرض
سيف : خربوشة
غيثة : سمر ... شوفي ماماك اش جابت ليك ... هاكي راه نيت ممغدياش
سمر (باقي فنفس الوضعية): laisse moi tranquille (خليني فحالي)
غيثة : وا يالاه ميبقاش فيك الحال ... والا بغيتي نمشيو نخليو دارهم ... اش بانليك ؟ (مجاوباتهاش) وا دويييي
سيف (قرب لعندها): نيكر اتشسً اكيتشس جغديد (نوضي تاكلي تاكلي فيه جغديد)
سمر(شافت فيه بحدة) : FERME TA GUEULE (سد دلقووشك !!!!)
سيف : سفنس (بقرة)
سمر : conard (مطنغ)
سيف : سغيولس (بغلة)
سمر : chien (كلب)
سيف: اكزمير (نخلة)
بقاو كيتعايرو لمدة لابأس بها ... والمشكلة أن سمر مكتفهمش اش كان كيقول ليها ... وغيثة ميتة بالضحك عليهم حتى عصبها بالبيان وقلبوها مدابزة بالكواري لي كانو تماك ...