للسماء قمر و لقلبي أنت

الجزء 63

#للسماء_قمر_ولقلبي_أنت 💙
بقلم : stories and novels
الجزء : 63
بقا جود كيضور غير فجناب الفيلا وكيرشف فالقهوة ... وكيفكر ...حتى سالا الكاس ومشا داه للكوزينة وطبعا مع تخنزيرتو المعهودة لي لي كيشوفو بيها كيترحم على روحو وهو راه غير شوفتو العادية ولي وارتها من مو والهبة لي عندو تجعلك تحتارمو ... وطبعا لي وارتها من باه عاد الوسامة لي وارتها منهم بزوج  ...الخدامات كي شافوه طاح منهم النص وملي شافوه ماداهاش فيهوم تنفسو الصعداء ... مشا طلع للبيت ديالو ودخل بلا ميدق ولقا شيماء جالسة كتمشط فشعرها الفازك قدام المرايا ولابسة بيجامة عريضة وطويلة ... طلعها وهبطها وقال ليها صباح الخير ... متسناهاش تجاوبو ومشا تكا فالناموسية وغمض عينيه وكيماصي عينيه بقرون صباعو ... وهي كي شافتو بدات تفافا ... ضفرات شعرها دغيا وبقات كتشوف فيه ومترددة واش تخرج ولا لا ...حتى قررات تهبط ومشات حلات الباب
جود (فنفس الوضعية) : لفين ؟
شيماء : لتحت ... (بقات ساكتة شحااال) ونتا مغتهبطش ؟
جود : لا
شيماء مجاوباتوش وهبطات للكوزينة طلبات من الخدم يوجدو ليها الفطور فبلاطو ورجعات للبيت ... وعلى إثر صوت الباب حل عينيه وشاف فيها ... ناض خدا منها البلاطو وحطو فوق الطبلة وجلس
جود(كيهضر وساد عينيه وحاط قرون صباعو فجناب نيفو) : مالك عدبتي راسك ... جلسي جلسي
شيماء (جلسات بلا متجاوب)
بقاو كيفطرو فصمت ...ومرة مرة جود كيشوف فيها كيفاش كتصرف ...ويحقق فوجهها مزيان وشعرها وحوايجها حتى كسر الصمت ...
جود (بلا ميشوف فيها) : مخاصك والو ؟ ... (شاف فيها) زعما حوايج ولا شي حاجة
شيماء : ها ... لا لا
جود : الا خاصك قوليها ليا ... والا مقلتيهاش غنخسر معاك
شيماء : واخا
جود (سكت شوية) : علاش كتلبسي هكا ... زعما مكاين حد فالدار ... خودي راحتك متبقايش مدفونة فيهم
شيماء (شافت فحوايجها وشافت فيه) : علاش ... معجبوكش ؟
جود : لا لا لا ... ماشي هكاك ... غير شفتك مواخداش راحتك ... ولكن الا كنتي مرتاحة ديري لي عجبك ... كولي كولي ...(وقف) والا كملتي عيطي لشي وحدة تهبط هادشي و وياك تهبطيه نتي راه تقيل عليك (مشا بثا جالس فالبالكون
شيماء : واخا
☀☀☀ فالتحت ☀☀☀
تجمعو بقية العائلة فالطبلة دالفطور لي كانت عامرة من القنت تال القنت بأشهى الأطباق لي ممكن تخطر ليك على البال... وخلود و ولادها آخر من التاحقو بيهم وخلود صبحات عليهم بابتسامتها وأناقتها المعهودة ... ولكن الجو كان مشحون ومكهرب ... كولشي ضاهر عليه الحزن ... فوسط صمت بحال صمت القبور
سمر (بملامح حزينة) : سلطانة .. سيري عيطي لشيماء وجود يجيو يفطرو عفاك
خلود : بلاش ... راه مغيهبطوش
سمر : وعلاش مغيهبطوش
خلود (ميلات ليها راسها باش تفهم)
سمر : صافي واخا ... (شافت فسيف) حبيبي قول بسم الله
سيف : احم ...بسم الله (بداو كيفطرو)
خلود : جوديا ... تبغي تمشي معايا بغيت نمشي نشري شي حاجة قبل ميحلو الحدود
موسيو العلوي : علاه غيحلوهوم ؟
خلود : كنظن وي ... محدهوم رخفو القضية سوو قريب يحلوهم
سمر : ومالك زربانة جلسي حتى يحلوهوم وسيري تقداي لي خصك
خلود : لا من الأحسن نمشي من دابا باش نكون موجودة ... ونمشي دغيا ما بقا عندي مندير هنا (شافت فجوديا) اش قلتي تمشي ؟
جوديا : نون حبيبة سمحيلي مافياش عيانة شوية
خلود : واخا ماشي مشكل ... تبغي تمشي ا سلطانة
سلطانة : واخا
سيف : ولكن متمشيوش بوحدكم ... قولوها للشيفور ورضو بالكم
خلود : نو كون هاني
سمر (وقفات) : بالصحة والراحة
سيف : جلسي مكليتي والو
سمر (بامتناع) : لا كليت ... عييت شوية هاني الفوق
سيف(شد ليها فيديها) : واخا ردي البال
سمر (بتاسمات ابتسامة صفراء ورتبات ليه على كتفو وطلعات للفوق)
جوديا : يالاه ا سلطانة الا كملتي نوضي بدلي حوايجك ... يالاه يكفانا الوقت
سلطانة : صافي واخا
#يتبع ...