للسماء قمر و لقلبي أنت

الجزء 92

#للسماء_قمر_ولقلبي_أنت 💙
بقلم : stories and novels
الجزء : 92
من بعد هاد الفاجعة لي طرات ... كولشي رجع لدارو بحالا مطرا والو وكملو حياتهم عادي مع شوية دالنميمة والتبرگيگ ... الا سمر لي بقات مصدومة وغير كتشوف قدامها ...بالسيف وهادي هي ثاني صدمة نفسية كتعيشها من بعد الصدمة الأولى ديال باها ...مرت أيام وأيام والناس دايرين قضية وريقة الحناء و حمودة علكة بين فام ناس الدوار ... بالأخص وريقة الحناء لي كلاوها بهضرتهم أما حمودة فكيبقى راجل والراجل مكيتعابش للأسف   🤷‍♀️
و سمر منطقات بكلمة وحدة من هداك النهار ... عيات معاها مها ... واالو .. كتجي عندها غيثة طل عليها حيت بقات مشوشة عليها  وحتى سيف كيسول عليها مرة مرة حيت بقااات فيه بزاف بزاف وهي وااالو كتبقى مفيكسية الشوفة ديالها فقنت واحد مخنزرة وصافي ... بقات على هاد الحالة حتى تقادات العطلة وغيرجعو للمدرسة ديالهم ... ويرجعو لحياتهم العادية ... امتحانات ... دروس ... أساتذة ...نجمة وياقوت ...والكليكة ديالنا وهكذا ... كدوزو الأيام ...
🔙🔙🔙الحاضر 🔙🔙🔙
سمر (بابتسامة حزن) : صافي ... كولشي واجد ؟
جود (هابط من الدروج بكل أناقة لابس قاميجة باللون الخزي لاصقة عليه ومحلولة من جيهة الصدر وجامع كمامها مع اكسسوارات فيديه وسروال بيض وسمطة كحلة بالإضافة لنضاضر دالشمس حاطهم فوق شعرو لي مرجعو للور وبلا منساو ريحتو لي كتشم من بعييد ... هاز فيديه جوج فاليزات و وراه شيماء لي لابسة قبية واسعة  باللون الرمادي مع سروالها لي فنفس اللون وفوقهم مونطو طويييل حتال الأرض باللون البني فاتح معاهم سبرديلة بيضة وشعرها خلاتو مطلوق...قرب عند مو وباه لي كانو واقفين حدا الدروج ... حط لي فاليز وتقابل معاهم بنظراتو المعتادة) : اه كولشي واجد ... (شاف فالماگانة ديالو) شوية وغنمشيو ...
سمر(دلات شفايفها) : حشوومة عليكم غتخويو عليا الدار دقة وحدة ... au moins (عالأقل) ماتمشيوش مجموعين
جود (حط يديه على كتافها): وا الواليدة ... راه مغنمشيوش نستاقرو ...غمضي عينك وحليها وغتلقاينا حداك
خلود(جاية هابطة مع الدروج بكل أناقة لابسة كسوة لاصقة حد الفخاض كاروات فوقها مونطو دالجلد باللون البني فنفس طول الكسوة وفوقو سمطة عريضة بالكحل وبوط بالكحل طويييل تال الفخاض بالطالون وشعرها مطلوق على راحتو ومبوكلي من التحت كتمشى ويبضرب فضهرها ودايرة مكياج خطيير بينها فنة ودايرة ريحة كدوخ) : قربات الوقت ياك ؟؟
سمر(شافت فيها بحزن) : اوووه حتى نتي ... بقاي نتي عفاك
سيف : سمر ... السيدة راه عندها خدمتها
خلود(قربات حداها) : ههههه كنواعدك غادي نبقى نطل عليكم مرة مرة ...وراه زيد ويزيد معاك ضونك مغتقنطيش هههه وجوديا وسلطانة غيكونو قراب ليكم
سمر : اييه عرفت ... ولكن حتى نتوما عندكم بلاصتكم ... المهم فين سلطانة و جوديا مابانوليش
خلود : غيكونو غير فالجردة
جود : يالاه ...مشينا ؟ (شاف فشيماء وشد ليها فيديها)  خلينا السيد كيتسنا (موسيو العلوي)
خرجو العائلة الجميلة للجردة وكانو حتى سلطانة ومها وباها واقفين .. دارو لي فاليز فطوموبيل ...
سمر : اشنو دابا خاصنا نتاودعو ياك ؟؟ افف مكنحملش هاد اللحظات ...
خلود : ههههههههه مدام ادريسي ماك وليتي دراما كوين ؟؟ اجي اجي (عنقاتها وباستها ) بسلامة وتهلاي فالدراري (تقابلات معاها) وراه غنبقا نجي مرة مرة واخا ؟؟
سمر : حتى أنا غنتسناك ... وبقاي تسولي فينا ماشي توصلي لبلجيكا وتنساينا
خلود : ههههههه متخافيش
سمر(مشات عند جود وعنقاتو) : جوووود تهلا لي فراسك بزااف بزااف وفشيمااء متخسرش ليها خاطرها راها sensible (حساسة) بزااف ..(تقابلات معاه) وسلم ليا على عمتك غيثة وجاد وريحانة ... واخا ؟
جود : واخا .. مبلغ
سمر(مشات عند شيماء وعنقاتها) : شيماء ..بسلامة .. تهلاي فراسك وبلا منوصيك ياك ؟؟
شيماء(كتافات بابتسامة)
توادعو العائلة مابيناتهم وجاو حتى يزيد وزياد ودعوهم ... وركبو فالطوموبيل ومشااو ... وكل واحد رجع لبلادو خلود  وموسيو العلوي ... وشيماء وجود ...
سيف(شاف فسمر حس بيها ماشي تالهيه) : سمر ... مالك ؟ بيك شي حاجة ؟
سمر(شافت فيه كتحاول تخبي حزنها وعلى وجهها ابتسامة مزيفة) : أنا بخير ...
سيف(بشك) : متأكدة ؟
سمر(حاولات طمأنو غير بعينيها و واخا هكاك متيقهاش)
جوديا : ماما ... يالاه ندخلو راه طلق البرد
سيف : يالاه
#يتبع ...