للسماء قمر و لقلبي أنت

الجزء 11

#للسماء_قمر_ولقلبي_أنت 💙
بقلم : stories_and_novels
الجزء 11 :
~ أتظن بأن الحياة فراشات ملونة ، وشموع معطرة ، وأزهار وردية ، وموسيقى رومانسية مصاحبة ، لكننا في 1969 صوت الموسيقى ، صوت الرشاشات والدبابات التي تدوي في أرجاء العالم ، فراشاتك صواريخ ... وأزهارك قنابل عنقودية ... وشموعك لهيب انفجارات .... فاستيقظ !!!!! ~
جمال النور لي كيضرب فالبحر ، و كبر الشاطئ، كيضفي رونق على المدينة المخفية ورا الكثبان الرملية. أگادير، سجادة من الرمال الناعمة لي كتديك لجنة سوس، لي كتميز بالمناخ المثالي لعشاق السياحة ولهواة الرياضة والمغامرة ... وبالظبط فأحد أرقى الاحياء فالمدينة ... الهدوء والطمأنية خصوصا فالليل ... الطوموبيلات الفريع مستفين بنظام قدام أكبر فيلا فالحي ... فيلا عائلة المعروفي ... من أغنى العائلات فالمنطقة ... كيف لا ورب البيت من أنجح رجال الأعمال ... ولي عيد ميلادو اليوم ... اليوم لي كيتزاد فيه رقم فعمرنا ... وبالصدفة بنتو الوحيدة حتى هي تولدات فنفس اليوم ... و مدام فاطمة المعروفي مغتقصرش من جهدها فهاد اليوم المميز بالنسبة لراجلها وحبيبها وصاحبها وخوها وكولشي بالنسبة ليها ... وبنتها حياتها وسبب عيشها فهاد الدنيا .
الجردة كانت مزينة باتقان...فواحد القنت كانت طبلة طويييييلة مفرشة بالأسود وعامرة بأشهى المقبلات والحلويات والعصائر والبيسين فيه عبارة " Happy birthday to you my lovers " بالنفاخات باللون الذهبي ومطلوقة أغنية « la vie en rose » ..كانت زينة الجردة بسيطة ولكن راقية ... وكتنغل بالناس ... رجال الأعمال صحاب السي المعروفي وعيالاتهم و ولادهم ... صحابات مدام فاطمة و طبعا أصدقاء بنتهم من المدرسة ... كولشي مأنتك ومزيز وغير التيتيز على خوه ... والخدم كيفرقو فالعصائر .فداخل الفيلا كينين الناس لي جالسين ومكيحملوش أجواء الحفلات والخدم شي غادي وشي جاي ... فالطابق الثاني وبالضبط فبيت بنت المعروفي متكون من بالكون فيه جليسة زوينة وحمام كبير فيه كل المستحضرات الراقية ... عاد دريسينغ خاص بالحوايج والصبابط والصيكان ... فوسط البيت كاين سرير كبير باللون الأبيض فوقو مكتوبة عبارة كبيرة بالذهبي « ارقصي ... فالبكاء عادة قديمة » وفجنبو صورة لaudrey Hepburn وشي ديكورات ... وفوق السرير جالسة فوقو بنت آية فالجمال برقي بفستان أزرق غامق جاي مع لون عينيها لي مزينهم ايلاينر مخدوم باتقان ومسكارا لي عطات كثافة لرموشها وجمالية لوجهها الضاير والبريئ ... وبرونز خفيف على حنيكاتها وخلات النمش المتطاير حبة حبة على نيفها لي مزين ببيرسينغ وفوق حناكها باين... عاد عكر نيود گلوص عطا شكل جذاب لشفايفها المنفوخين .... وكانت دايرة كوتشوفال لشعرها الأشقر وهازا طلاء الأظافر كتصبغ ضفارها الطوال
«نديم الكناني» اسم الصديقة المقربة لبنت المعروفي كتعرفها من الصغر وكتقرا معاها فنفس المدرسة ونفس القسم وقد قد فالعمر ... اونفاص ليها كانت بنت مقابلة مع المراية لابسة كسوة بيضاء بلا كتاف وقصيرة حد الفخاض عطات للونها الأسمر البرازيلي رونق خااص وجاذبية ... كانت كدير آخر لمساتها لمكياجها ولي هي عكر احمر ماط لشفايفها الكبار ...
نديم : واش مزال ماباغا تكملي راه بزاف ... العروسة العروووسة نهار عرسها وماتجلس قد هكا
... : (سدات العكر وبتاسمات تا بانو سنانها البويض ومستفين كي الروز ) اوا لي حسدني ادير بحالي ... بصحتي ياك عيد ميلادي هذا !!
فجأة تحل الباب ودخلات مدام فاطمة لابسة قفطان مدرمة وقالت : سمر يالاه هبطي