للسماء قمر و لقلبي أنت

الجزء 111

#للسماء_قمر_ولقلبي_أنت 💙
بقلم : stories and novels
الجزء : 111
جون شاف فجنابو ... مفهم والو ... بقا كيفكر تا عيا هو ينوض يتبعها ... لقاها داخلة كتعوم الداخل مشا عندها وشدها من ذراعها ولصقها مع صدرو
جوديا (خنزرات فيه): شنو كاين ؟؟ مالك ؟
جون : واخا تفكي هاد الغوباشة هو الأول ؟
جوديا (قلبات عينيه وهي تنهد): فففففف ... جون عفاك ... بغيت نبقى بوحدي
جون : اممممم ... طلبي أي حاجة إلا هادي
جوديا (سدات عءنيها وسكتات شوية): واخا ... واخا ...أنا بخير ... صافي ؟
جون : (بقا على نفس الوضعية مهضرش)
جوديا(بترجي) : عفاك !!
جون : واخا ... غادي غير نطلقك ولكن مغنخليكش بوحدك ... أنا غير حداك الا بغيتي تهضري ... واخا ؟
جوديا : ممم
جون(بتاسم) : كنبغيك
جوديا (رجعات ليه الابتسامة): حتى أنا
خلاها غلى خاطرها ولكن مابعدش بزاف باش يبقى مراقبها ... دازت شوية ديال الوقت وهي تلتاحق بيهم أروى تاهي كتعوم حداهم ...فالحقيقة بقات غير كتغطس وتخرج وترجع شعرها للور ودوز يديها عليه بحال كيف كيديرو فالفيديو كليبات ... جوديا شافت تا عيات تبرزطات وهي تخرج مشات لبسات كاش مايو وهزات تلفونها ودخلات للدار ... بقات كتمشي وتجي وتسوط وفاللخر دخلات للبيت فين حاطين حوايجهم سداتو ومشات جلسات فوق واحد الكرسي وعيطات لمها ...
سمر : هي شي يهودي مات ملي لالة جوديا تواضعات وتاصلات بيا
جوديا(كتهضر معصبة) : غنطرطق ا ماما ... غنقتلها غندبحها ... فففففف عتقيني مبقيتش قادة نصبر
سمر (بقلق): مالك ياك لباس ؟؟
جوديا(مغددة) : جبت لفعة معايا ...
سمر : تي بشوية عليك راه مفهمت والو ... تنفسي وعاودي ليا من اللول وغييير بشوية عليك ... vas y
جوديا(كتحاول تهدن راسها) : واخا ... واخا ... دابا حنا اليوم خرجنا أنا وجون وأروى ... صاحبتي .. على أساس باش نعرفهم على بعضياتهم
سمر(قاطعاتها) : واروى وجون تصاحبو ونتي شديتي فالبولة تسعين
جوديا: الاااا مزال ... غير هو بدات كدير شي حركات فشكل ... واللباس والتعواج والتحلوين والضحك ...(كتهضر وفيها البكية) كولشي كولشي ... وفاش واجهتها قالتلي هي طبعها هكاك وضارت فيا
سمر : الله ياربي الله على هبيلة عطيتيني ...اااا بنتي ااا بنتي فيقي شوية ومتبقايش غشيمة ... تلقايها فرحااانة ملي بينتي ليها راكي تقرصتي ... متقلليش من راسك قدامها ومتحسسيهاش أنها حسن منك ديما فتاخري براسك وطلعي نيفك للسما نتي راه بنت سيف الدين الادريسي وسمر المعروفي وعااد طبيبة تبارك الله ... هادشي باراكة عليها ويخليها تكمش فاش تكون حداك .. ولكن ماحدك خاوية ليها الساحة فراه غطلع فوق راسك وتسيرك بحال شي كلبة يا الكلبة ... حبسي عليا البكا ونوضي ضربيها بشي تعكيرة ولعبي خو لعبها راه هي لي ضيفة ماشي نتي ...تعوجي وتحلوني تا نتي مالك متعرفيش ؟؟ ياك خارجين تفوجو ؟؟ اوا فوجي مع راسك وضربي الدنيا بطالون ... وتا الا داك جون ديالك مشا معاها راه هوما لي خاسرين هو غيصدق شماتة وكلب مصدقش وحمدي الله أنك عرفتيه على حقيقتو قبل ميفوت الفوت ... ومتنسايش ألف واحد يتمنى شوفة منك خاصك غا تآمري ... وديك اللفعة فراه غتدي غير الشياطة ديالك حيت مولفة بالشياطة ديال عيباد الله
جوديا (ريحاتها بهضرتها وبتاسمات لا شعوريا): شكرا ا ماما ... شكرا ... مكنت عارفة شنو ندير تلفت ... ونيت راه حتى سلطانة مكتسرطش ليها
سمر : على ذكر سلطانة ... فين مخلياها وخارجة كتحوسي ؟؟
جوديا : وا ماما راها عندها 16 لعام ... كبيرة وعارفة اش كدير واش غنبقى مقابلاها غير هي !!
سمر : اويلي على الصكعة اويلي على الويلة ... مكين لي غيخرج على ديك البنت قدك !! سيري سيري الله يهديك (قطعات)
#يتبع ...