للسماء قمر و لقلبي أنت

الجزء 75

#للسماء_قمر_ولقلبي_أنت 💙
بقلم : stories and novels
الجزء : 75
سمر (جابت ليها العجب وهي تنوض قربات ليها شوية وهي عاطياها بالضهر) : بسكش
دارت عندها ديك البنت مخلوعة رحعات بخطوة للوراء وقلبها كيضرب ... كانت بنت ناصعة البياض وشهبة لدرجة حروفها مكيبانوش بالشهوبية وفيها النمش ...عينيها خضرين ومرمشين ونيفها منگاد وفمها منفوخ وحجبانها مقادين ورقييقة وقصيرة... باينة ممهلياش فراسها .. ولكن آية فالجمال ما شاء الله لدرجة سمر بقات مبلوكية فاش شافتها ...هنا فالقبيلة كل وحدة تنسيك فلوخرا غير من غيثة يبان البرهان كتسطي بالزين ولكن هاد وريقة الحناء غير عليهم كاملات لدرجة باها مكانش كيخليها تخرج بسبب زينها ...
سمر (باقيا مبهوضة فالجمال ديالها): مقصدش نخلعك ... سمحي ليا ... (شافتها باقي مخلوعة وكترعد غير بوحدها) شنو سميتك ؟؟
البنت (صرطات ريقها وشادة فطرف حوايجها) : ور .. و ... وريقة الحناء
سمر (طلعات حاجب ونزلات لاخور ) : واو !! وريقة الحناء ؟ زوينة سميتك !!
وريقة الحناء (ضحكات حتى بانو ليه سنانها المستفين)
سمر : عمرني شفتك هنايا !! واش نتي من هنا نيت ؟
وريقة الحناء : اه أنا من هنا ... غير مكنتش كنخرج
سمر : ااااه ... وكيف كنتي كتبقاي غا فالدار ؟؟ باز ليك !!
وريقة الحناء : ولفت ... ونتي شنو سميتك ؟
سمر : سمر
وريقة الحنة : ااااه ... نتي هي المدينية لي سيرتك على كل لسان
سمر(باستغراب) : سيرتي على كل لسان ؟؟
وريقة الحنة : اه ديما كنسمع خواتاتي كيهضرو عليك
سمر(باستهزاء) : ههههه وراه كولشي كيهضر عليا ومحاملنيش هنايا عادي ولفت ... (سكتات شوية) شكوناهوما خواتاتك ؟
وريقة الحناء : هاينة و يامنة ... عرفتيهم ؟
سمر (غوبشات وميقات فيها) : امممممم عرفتهم ... هادوك هوما خواتاتك ؟؟ كاعما كتشبهي ليهم
وريقة الحناء (بملامح حزينة) : حيت حنا خوت غير من با ... أنا مي الله يرحمها ... وملي ماتت با تزوج بخالتي هنية لي هي مت هاينة ويامنة من راجل ااخور ... وفاش مات با الله يرحمو بقيت معاهم
سمر : همممم قولي هكااك ... اجي بعدا نجلسو
• مشاو جلسو تحت ديك الشجرة •
سمر : اوا وهاد هنية كتعاملك مزيان ؟؟
وريقة الحناء(كتشوف قدامها بحزن) : الله يهديها وصافي ... النعمة بين يديها وماحاسة بيها حاسباني عدوتها ماشي ربيبتها ولسانها ديما سابق للعيب و واخا هكاك مكنحاديهاش
سمر(غوبشات) : بنت الهم ... أما خواتاتك ؟؟
وريقة الحناء : كيما كيوقولو الحنش متيولد غير ما طول منو ... ولكن معندي مندير كيبقاو خواتاتي واخا مفرقانا البزولة ولكن بانا راه واحد
سمر(بانفعال وكتشالي بيديها) : واش نتي منيتك !! بقاي عليها الله يهديها اييييوا معندي مندير ليها نينينيني ... اتي تگعدي وحراشي وخرجي عينيك فيهم بتلاتة لي دوا يرعف ... ديك الضرافة والصواب الزايد ميصلاحش مع بنادم ... تعاملي مزيان مع كولشي ولكن شي قمقوم يسخن عليه راسو ويفوت الحدود خرجي فيه عينيك مبغاش يحشم شرشمي بوه مبغاش يحشم ضربي مو تا يبانو ليه النجوم فالصباح
وريقة الحناء (كتشوف فيها مصدومة) : اويلي لا منصيبش ...راه مرات با هاديك
سمر (بانفعال) : تمشي **** نهار تاكلك فحقك وتجري عليك الزنقة ويتحشا ليك تا لقاع ديك الساع قولي اوووه مرات با حشومة ... هي برااسها كون لقات الفرصة باش تحيدك من طريقها والله لحنات فيك
وريقة الحناء (حشمات وتزنگات) : لا لا حشووومة ... ماشي من عوايدنا هادشي ... حنا تربينا نحنيو الراس ونحتارمو لي كبر منا ومنقولوش لا
سمر (ميقات فيها) : ممممممم اش هاد عيشة الذل ... حااالتكم عليا ... فكرتني غا فسندريلا مهم نتي مغتعرفيهاش ...(شافت فيها) غير هي فاللخر غتزوج بأمير ونتي غتشدي فالبولة تسعين ... الفقصة الفقصة
وريقة الحناء : مي ديما كانت كتقول ليا ... مول النية كيغلب
سمر (بغات تفاب الموضوع حيت الا زادت شوية غتنتفها): كنتي جاية هنا باش تصبني ياك ؟؟؟ اوا نوضي يالاه تسالي دغيا ... ولا غتخاصم عليك مرات باك سيري
وريقة الحناء (وقفات بالخف) : ويييلي شدينا الجماعة ونسيت الصابون(يالاه كانت غادة وهي ضور عندها) ونتي صبنتي حوايجك؟؟
سمر (باستهزاء) : من نيتك ؟ بنت ليك انا ديال هادشي ؟ 😏 سيري سيري راه غيضلام الحال وتعطلي وتاكلي قتلة دالعصا وتبقاي تبكي سيري
وريقة الحناء (مشات طايرة)
سمر (وقفات): نمشي نشوف دوك القوم تاهوما قبل منحماق ...(قربات حدا وريقة الحناء) هييييهوووو هانا مشييييت
وريقة الحناء (شيرات ليها بيديها مع ابتسامة)
مشات سمر وبقات كدندن فالطريق تا قربات للدار وهي تلاقا مع سيف ...
#يتبع ...