للسماء قمر و لقلبي أنت

الجزء 39

#للسماء_قمر_ولقلبي_أنت 💙
بقلم : stories and novels
الجزء : 39
يوم الخميس:
"تكلما"فصبيحة يوم الخميس كيمشي العريس للسوق باش اتقدا كيحط منها فالبلاصة فين كتكون العروسة،والباقي كيعطيه كادو لأم العروسة من بعد ما كيبوس رأسها،و كيعبر هاد الفعل على عفة العروس،و في آخر النهار كيدار طقس تكلما كتبدل فيه العروسة حوايج ليلة اعرس بلباس تقليدي إزار والحلي أمازيغي وكتعاونها شي مرا من الدوار،و كيبقى الاحتفال ثلاثة أيام متوالية .
وأثناء هذا الطقس كتغنى مجموعة من الأهازيج هي عبارة عن حوار بين أهل العريس والعروس تتضمن بعض النصائح:
أبسمي الله أرحمان الرحيم نزور كيس إكرامن أولأ العلوم
نزور سدي بو صالح نتسفروين إدا أوفكونم إزري سوقا
يويت وضو خكاد نوامان
أهل العريس :
أويد أويد أماس نتسليت إبزكان لكرنين إيليم
أهل العروس :
أرشيخ تدمرين نواغي أدسكارخ إبزكان أولا أخلال
وبشكل جماعي يرددن :
أنبري تدلوت نتانوضين أنبري تجماعت نكي نتركى
أنبري تكوني نمي نتاكات
وكتبات العروسة فهاد البلاصة "أي مكان دخلتها"تال يوم السبت.
يوم السبت:
"أس ن كران" فهاد اليوم كتخرج العروسة من مكان تواجدها لابسة أزهى اللباس والحلي من وفضة ودهب و مليوح عليها إزار زايد ،ومن الضروري تلبس إزارين:اللول كيكون لونو بيض والثاني حسب الاختيار،وفي أغلب الأحيان كيكون أزرق اللون و الإزار الذي قلت بلي مليوح عليها كيدار فيه اللوز والتمر كيتفرق على الدراري الصغار ملي كتجي لدار والديها،ولكن فهاد اليوم مكتدخلش لدار واليديها وكتبقى فقط واقفة غير قدام الباب،وكيعطيوها وجبة "بركوكس" كيديرو شوية منها فوق ظهر يدها،و الغرض من هذا هو اختبار قدرتها على الصبر و تحمل أعباء الحياة الزوجية،وملي كترجع كيجمعو ليها الدراري الصغار و العيالات المرافقات لها كمشة من العشب كتعطيه لقطيع دارها الزوجية، فهاد اليوم كتسالي مناسبة العرس بالنسبة للأسبوع الأول في انتظار طقوس الأسبوع الثاني لي فيها يوم وضع الحناء،و بالتحديد يوم الأربعاء،بالإضافة إلى اليوم لي كطيب العروسة وجبة الكسكس لأهل العريس،،و بهذا كتولي سيدة منزلها"
يوم الجمعة:
"ترزيفت" هاد اليوم كامتداد لمناسبة العرس فالأسبوع الثاني لأول مرة غتزور العروسة أهلها،و كما قلت كتلبس أزهى الملابس و الحلي و كتغطي رأسها بثوب أسود اللون منقوش ببزاف داللوان،كترافقها عيالات الدوار بأهازيجهن و فن أحواش خاص بالعيالات و كتبات فيه يوم كامل من بداية النهار تا كيسالي،وتجتمع أكثر من عروس وحدة في هاد المناسبة و قبل مكترجع كيوجدو لها عشاء لراجلها ترجع به ليه و لي كيثير الانتباه أن أغلب أقاربها وصحاب راجلها كيعرضو عليها بشكل متناوب و تصاوب الشهيوات .
وضروري من شوية الشغب خصوصا وايطو كانت حاضرة فهاد العرس وغيثة وسمر بقاو كيغنيو أغنية خربوشة وهي كتقلى فالسم ....
🎶واخايتي لك آ ليام
وا  ليام آ ليام، أيام القهرة والظلام
وا  فينك آ عويسة، فين الشان والمرشان؟
شحال غيرتي من عباد؟
شحال صفيتي من سياد؟
بلا  شفقة وبلا تخمام

حرگتي  الغلة وسبيتي الكسيبة
وصگتي النسا كيف النعام
يتمتي  الصبيان بالعراااام
وايلييي

كي الشيخ، كي العبد، كي المقدم
گاع منك طالبين التسلام
وافينك  آ عويسة فين الشان والمرشان؟
وايليييييي

تعديتي وخصرتي الخواطر
ظنيتي القيادة للدوام
والجيد متبقالو شان
والرعواني زيدتيه الگدام
سير آ عيسة بن عمر
يا وكال الجيفة، ياقتال خوتو يا محلل الحرام
وايليييي

وا لاباس ولاباس ولاباس
هاك الدق بلا قرطاس 🎶

سالا العرس أخيرا وكولشي رجع فرحان وكيتعاودو اش طرا فهاد الأيام كاملة ...
رجعو البنات لديورهوم وهاد المرة باتو عند للالة حادة حيت عيانين ... لقاوها ناضية حيت بقا فيها سيف مع مكيعجبوهش البلايص لي فيهوم الزحام وكترة الصداع ... دخلو مسحو مكياجهم وتلاحو نعسو مافاقو تال الغد ليه مع الوحدة طبعا البنات أما العيالات كالعادة مع الفجر ... فاقو غسلو ومشاو للكوزينة لقاو الغدا مردود وهوما كيجمعو فالكوزينة غير شافوهوم وللالة حادة ناضت وقفات
للالة حادة (كطنز): تبارك الله والصلاة على النبي ... صباح الخير ا العريسات زيدو مزال راه باقي الحال
غيثة (كتفوه) : راه رجع علينا العيا دالعرس
للالة حادة : عولنا عليكم بكري ... زيدو تفطرو زيدو ... ولا تغداو ولا منعرف
جلسو البنات يفطرو ... ومن بعد مشاو يصبنو الزرابي طبعا غير غيثة وهاد المرة حتى رقية أما سمر بقات غير جالسة حداهم ...
سمر (كتشوف نيشان ومقردة فوق واحد الشجرة) : زويين عندكوم التقاليد دالعرس
غيثة (عاطياها بالضهر كتصبن) : عجبووك ؟ هي ملي غتزوجي غديري بحالهوم ؟
سمر : ويلي الله ينجيني نتزوج من هنا مالي تسطيت ... أنا والله وماكان شي بوكوص ولاباااس عليه لا ديتو
غيثة : دابا نشوفو فين غيوصلك هاد الطمع ديالك
سمر : للفوووووق
سالاه البنات ومشاو للدار تغداو وطلعو للسطح كيلعبو الحبل وكاري ... يتبع
هاد التقاليد والعادات عمرني شفتهم ولا حضرت ليهم ... عمرني مشيت حتى لطاطا ... هادشي غير من ورا البحث والتسوال ... الا كانت شي حاجة ماشي صحيحة كتبوها فالكومنت والا نسيت شي حاجة تا هي كتبوها ...وحتى الا عندكم عادات مختلفة تاهوما كتبوهوم مع ذكر المنطقة ...يالاه تفاعلو اخربوشات 🍁