للسماء قمر و لقلبي أنت

الجزء 77

#للسماء_قمر_ولقلبي_أنت 💙
بقلم : stories and novels
الجزء : 77
سيف(طلق منها) : صافي بردي ... دخلي دخلي ونتي غا شاعلة
سمر(خنزرات فيه وكتعبر بيديها) : شتك كتآمر فيا ... مالنا ياك لباس ؟
سيف(هز يديه بزوج) : مااا قلت ليك واالو اختي ... مهضرت انا گاع
سمر : اوا هكاك !! (طلقات شعرها وعاودات جمعاتو) اووووف كتكون فرحان كيجي شي قمقوم يهجرو ليك ...(خنزرات فيه) الله يعميها لشي قرد
سيف : عاد كنتي ضريفة ... واش غنبقاو شد ليا نقطع ليك هنا
سمر (مجاوباتوش ومشات هزات الورد فيديها شماتو) : شنو هادا ؟؟ همممم ريحتو زوينة
سيف (تنهد عاد جاوبها) : هداك الورد يابس
سمر (باستغراب) : ورد يابس ؟؟ لاش كيدار ؟
سيف (جا حداها) : كنشوف الواليدة كتخلطو مع الحنا وكديرو للبنات
سمر(بابتسامة) : اااااه وي ... سي فغي كنت شفتها واحد المرة دارتها لأم الغيث ...
⚡️ ⚡️⚡️⚡️ فدار لالة حادة ⚡️⚡️⚡️⚡️
كانت الدار كتطلع وتنزل بالاستعدادات ... الكوزينة خارجة منها روائح مختلفة وكتشهي ... أما بيت الجلاس كولو مرون ... غيثة كانت فالكوزينة كتعاون م.فاطمة ورقية كتغسل الماعن ... أما لالة حادة جالسة فبيت الجلاس جالسة وسط النفاخات والديكورات كتنفخ فالنفاخات ...
لالة حادة (بقات كتنفخ فواحد النفاخة حتى تفركعات ليها على وجهها) : الخلااااا والجلااا خزيييييييت
*خرجو البنات من الكوزينة وشافوها بديك الوضعية ماتو عليها بالضحك *
م.فاطمة : هههههههههه اش كديري ا لالة حادة هههههه
لالة حادة(مزات يديها باستسلام) : اوا هادا الله ... عييت منفخ سخفوني وتاوحدة مبغات تصدق
غيثة : ههههههه صافي ا مي غير خلي داكشي حنا غنتكلفو بيه
لالة حادة : اوا صافي حسن نيت ... أنا ما ديالي هادشي ...(وقفات ساست جلايلها) العجب هادا أنا كنعرف عيد الصغير عيد الكبير وعيد الميلود ... هاد العجب لي قلتي داباا اول مرة نسمعو
م.فاطمة : هدا عيد الميلاد كنحتافلو بالواحد ملي كيوصل نهار عيد ميلادو يعني نهار تزاد وكل عام كنديرو حفلة فيها الحلوى والماكلة ونشطو بيناتنا ونفرحو وكنعطيوه كادوات ونتمناو ليه طول العمر
لالة حادة : العجب آخر الزمان هدا ... ولايني شنو هو هدا لي گلتي فاللخر ؟؟ اش كتجيبو ؟
م.فاطمة : اااه كادوات ... يعني هدية على حسب كل واحد واش بغا
لالة حادة : هييييه ولايني حنا مجبنا ليها والو
م.فاطمة(بابتسامة) : ههههههه الله يعطيك الخير ا لالة حادة ... (كتشوف فيهم بحب) باركة غير ها الوقفة لي وقفتو معايا ومن الصباح ونتوما كطيحو وتنوضو معايا ... ومخليين لينا الدار ... شقيتكم معايا والو
غيثة (بابتسامة): اويلي ا خالتي متگوليش هكا ... سمر راه بحال ختنا لي ماولداتهاش لينا ميمتنا
م.فاطمة : لهلا يخطيكم شكراا 😊
لالة حادة : نسييينا راسنا بالهضرة ومزال مدرنا والو
م.فاطمة : ايييه عندك الحق ... المهم راه تقريبا الماكلة راه كولشي واجد ... بقا لينا غير نقادو هنايا ... بنتي رقية نتي تكلفي نفخي النفاخات صافي ؟ وحنا نباليو بهنايا ... واخا ؟
بداو البنات بتجهيز المكان ... شطبوه وسيقوه وفرشو زربية كبيرة ... من بعدا بداو كيحطو فالمأكولات ... حلويات دواز اتاي لي صاوباتهم م.فاطمة وطبسيل فيه شيبس و وسطو لاصوص ...ولبيني وماضلين وكاب كيك (طبعا هادشي شراتو) عاد الحلويات الكبار ... حلوى عادية ديال الشكلاط وحلوى بيضا بالليمون وحلوى بلاكريم كبيرة وسطها شمعة ومزوقة ومكتوب فيها <joyeux anniversaire ma belle samar > والمملحات والفاكية وسندويتشات بالتوست ...والمسمن لي صايبات غيثة معاه براد داتاي ... والطباسل والكيسان والفراشت والمعالق ديال الميكة شراتهم من المدينة حيت هنا مزال معندهم هادشي ...م.فاطمة تكلفات بالزواق حيت عندها الذوق ... المهم كملو التجهيزات ...عجبهوم داكشي واخا بالنسبة لم.فاطمة داكشي جد متواااضع حيت موالفين بما كتر ...ولكن بالنسبة للالة حادة وبناتها هادشي جديد عليهم ... من بعد مشاو بالاو بالكوزينة جمعوها وطرفوها فجو كولو مرح وضحك ... وفجأة سمعو الدقان فالباب
وتبدل فيهم اللون ...
غيثة : اويلي تكون زعما جات ؟؟؟
م.فاطمة : لا لا راني وصيت سيف زعما
لالة حادة : اوا متعرفي راه كيضلو مناگرين
م.فاطمة : واخا ... غير سيرو دابا نتوما وجدو راسكم انا نمشي نشوف
#يتبع ...