للسماء قمر و لقلبي أنت

الجزء 86

#للسماء_قمر_ولقلبي_أنت 💙
بقلم : stories and novels
الجزء : 86
مشات سمر بلا متخليه يجاوب وخلاتو ضارو راسو بالفضول ... مشات مع وريقة الحناء تا قربات لدارهم وهوما يتفارقو ... غير دخلات وريقة الحناء لدارهم وهوما يتلقاو ليها عند الباب ...
لالة هنية (دايرة يديها على جنابها ومطلعة حاجب ومنزلة لاخور) : هايهايهايهاي ... زيدي سيحي مزال ... مزااال الحال
هاينة (بسخرية ) : مي !! شتها داقت حلاوة الزنقة وماتلات بغات تدخل مزال
يامنة : ويييييه ...ولات خيطي بيطي مدير حساب حد ... تدخل وقتما بغات وتخرج وقتما بغات !!
وريقة الحناء (حنات راسها مكتجاوبش)
لالة هنية(بالغوات) : تي فين كنتي هاد الوقت كااملة ... دوي !!!
وريقة الحناء(كتفتف) : لا غير ... تلاقيت مع واحد صاحبتي ومحسيناش براسنا بقينا نجمعو
هاينة(بسخرية) : هاااااهاااااي ... توما سمعتوو ...حتى وريقة الحناء ولات دير الصحابااات ...
يامنة : وشكوون هاد الصااحبة بالسلاامة ؟؟؟ نتي ا لالة سيري جمعي مع صحاباتك وخلينا مسيكينات نضربو تمارة على گلبنا ... نتي لي جات معاك
وريقة الحناء (كتهضر بشوية وخايفة): سمر ... بنت لالة فاطمة
لالة هنية : هاااكاواااااااا ... وتي اش داااك لديك المارجة الموسخة ... البناات المأصلات يتصاحبو مع بنات الناااس ماشي مع المطوطااات بحال ديك سمر ولا منعرف شنو سميتها ضل تسيح فالزناقي مع العزارا وسيرتها على كل لساان... اشوفي اااه والله ونلگاك واگفة معاهااا ولا تهضري معاهااا يا حتى نعلگك فالعتبة دالباااب سمعتي !!! ودابا على هاد الفعاايل النايحة دياالك غتعودي تفيقي گبل الفجر ... شطبي وخملي وجمعي الدار وعجني الخبز ونصبي الغدا ... عاد خرجي البهايم وملي تروحي فالعشية نكسي ليهم عاد دخليهم ... ودوزي للرحا غتلگايها كتسناك سمعتي ... ونصبي معاك العشا
يامنة (عجبها الحال): نيت راه غلاضت تگول كنعلفوها للعيد الكبير
لالة هنية : بالسيييف وهي عاطيااها غير للسريط والمريط وشي مايشيط ... والنعاااس
هاينة : ولاهيييلا وحنا مسكينا نشقاو على گلبنا !!
لالة هنية : هااااه ... وحاجة خرى اليوم غتباتي بلا ماكلة باش تعلمي تعودي ديعي بلا شواار ...(شداتها من دراعها ودفعاتها ولوخرا غير كتبكي فصمت) يالاه دردبي !!! (مشات سدات عليها فبيتها كتبكي)
هاينة (بابتسامة شر): عبرتي عليها ا مّي !! نيت راها زاغت
يامنة : عندك الحق ... خرجو رجليها للشواري
لالة هنية : بنات الناس كيبقاو محصنات فديورهم ...(عنقات بناتها) بحالكم ابنياتي الله يرضي عليكم هكا نبغيكم ... متبتات وحادگات ...
~ عند سمر ... ~
وصلات سمر حدا باب دارهم وهي عارفة بلي مها غتصبنها مزيااااان ... وجدات راسها نفسيا وتنفساات بعمق... حلات الباب بشويييية وبدات تتسلل ... غير ضارت وهي تلقاها واقفة مربعة يديها وحاجب طالع ولاخور نازل ...سمر غير شافتها ودارت إبتسامة ديال بزز عارفاها مزبلاها ...
م.فاطمة (هدوء ما قبل العاصفة) : على السلامة !! (يالاه بغات تهضر وهي تقاطعها سمر)
سمر : بلاتي بلاتي ... عرفتك اش غتقولي ... يا الحمارة يا الخانزة يا الويلة ... مشيتي وخليتيني كنغل ودمي كيغلي ... ما قلتي ماما مسكينة تكون كتسناني ولا ميتة بالجوع ولا جايين الضياف ... لا إله إلا الله ... والله لابقات فيك ... ااا فين كنتي يا بنت الحرام فعاايلك فين كنتي ..ينعل والديك ... قلبي ... قلبي كنتي غتسكتيه لياا يا ليهوودية يا بنت الحرام ... امتى غديري عقلك امتى ؟؟ مقابلة غير الدوران والزناقي ...لا إله إلا الله نتي مغيصلاح ليك غير الزواج ... داابا دابا نوض نزوجك باش منشوف كمارتك گااع  ونتهنااا
م.فاطمة (مخلات ليها متقول بقات غير كتخنزر)
سمر : راه طرا ليا واحد البلان داكشي علاش تعطلت ...(زربات عليها) وهاكي راه جبت ليك السخرة ... اوووف عييت
م.فاطمة : طلقي طلقي ... الناس تغداو وقربو يديرو كاسكروط وحنا غدانا مزال مطاب ... (غلبات عليها الضحكة وطرطقات بالضحك) هههههههههههه شي نهار طركقي ليا شي عرق  ههههههههه
سمر : مالي درتها بلعاني ... المهم راه خارجة مور المغرب بلا متسولي عليا ولا تخلعي ولا شي لعبة
م.فاطمة : فين تاني ؟؟؟ عند غيثة ؟؟
سمر : لاا لااا ... عندي مندير فبلاصة أخرى
م.فاطمة : واخا هاحنا غنشوفو بلاناتك فين غيوصلونا
#يتبع ...