للسماء قمر و لقلبي أنت

الجزء 140

#للسماء_قمر_ولقلبي_أنت 💙
بقلم : stories and novels
الجزء : 140
هبطو الأبطال ديالنا ولقاو سيف جالس كيتسنا فيهم رحب بيهم وفرح بوجودهم ... جلسو كيتغداو مجموعين ...والشهيوات غيطيحو من الطبلة ... بقا. كيتعرفو على مراد لي نساجم معاهم دغيا ... بحالا كيعرفوه شحال هادي ... لحظات قليلة فاقو يزيد وزياد وجابتهم الخدامة ... سلمو عليهم وفرحو بزاااف .. وجلسو كيتغداو معاهم ...
سيف(كياكل ويهضر) : قوليا ا مراد ... شنو كدير دبا ؟
مراد : عندي العام الثاني ماستر فالبيولوجي
سمر(بفرح) : همممم مزياان ... برافو عليك ... الله يوفقك ياربي
مراد(بابتسامة) : امين ربي يخليك
سيف : وساكن فأكادير نيت ؟ ... (هز كفو ليمن بابتسامة جانبية) سمح ليا الا كترت عليط ولكن .. غير باش نطمأنو على بنتنا ...
سمر(بابتسامة) : ومنها نيت نتعرفو عليك أكثر ..  وعلاش لا نوليو كتر من الصحاب ... نوليو عائلة ... ياك ا سيف ؟
سيف : تماما
مراد : من حقكم ...(سكت شوية وبدا كيهضر وكيشوف ليهم فعينيهم) المهم أنا ساكن فأكادير وي ... بوحدي ... على قبل القراية ... و واليديا ... زعما دار واليديا فأيت ملول
سمر(بحماس) : كاري ؟
سلطانة(ضارت عندها) : ويلي مامي ... حشومة
مراد(بابتسامة خجل) : لا لا غير خليها ههه ماعليش... ااا ... المهم ... لا حنا قبل منتحولو كنا ساكنين فالدار فين ساكن فيها أنا دبا ...على قبل القراية ... و واليديا وخواتاتي بقاو فأيت ملول
سيف : مزيان ... الله يخليهم ليك
مراد : أمين شكرا
سمر(دايرة يديها تحت ذقنها) : قلتي خواتاتك ساكنين مع واليديك ياك ؟ يعني نتا لي ولد عند واليديك ياك ؟
مراد : exactly ... أنا ولد وسط 9 البنات 😅😅
سمر وسيف : تباارك الله
سمر(بحماس) : ماشاء لله ... هي غتكون مفشش ههههه ؟ شنو سمياتهم ؟
مراد : بحال هكاك 😅 ...(بخجل) اممم ههه ... نبداو بختي الكبيرة سميتها فاطمة الزهراء مزوجة وساكنة فاسبانيا عاد ختي جهاد ... حتى هي مزوجة وساكنة فأكادير وكنتلاقاو مرة مرة ... فايت شافتها سلطانة ... تابعاها ياسمينة عندها une crèche فمراكش ... وخديجة مزوجة فدبي ... أم كلثوم أستاذة دالفرونسي ... جليلة كتقرا الديكور الداخلي فالرباط ... عاد هبة الله عندها la licence فآداب إنجليزي ودبا جالسة كدير mma ... عاد إيناس photographer (مصورة) .. وسارة هي لي قد سلطانة ... هادشي لي كاين 😅
سمر : تبارك الله ماشاء لله الله يخليكم لبعضياتكم ياربي
مراد : أمين أمين
سلطانة : اوا باركة من الاستنطاق وخليو الولد ياكل ويلي
مراد : ماعليش ههه ...
زياد : مااامييي ... سوفي سعرو طوييييل بحال با جدي
سمر(شداتو من نيفو بلطف) : هههههه شتي ... اوا كول باش تكبر ويولي شعرك بحال سيف وبحال مراد ... ياك ؟
يزيد : وأنا ا ميمة ؟؟
سمر : حتى نتا الخنفوس ديالي ... (شدات ليه نيفو بلطف) وياك كنقولك متبقاش تقولي ميمة ... أنا مامي ... اوكي ؟
يزيد : اوكي
مراد (بهدوء): واش خوتك ا سلطانة ؟
سلطانة : لا هادو ولاد خالي ... (سكتات شوية) ملي تكمل نضربو دويرة واخا ؟
مراد : واخا لي بغيتي ...(وقف) هي دبا نيت
سلطانة : وجلس بعدا حتى تكمل ماكليتي والو ...
مراد(دار يدو فوق كرشو) : لا باركة عليا الحمد لله شبعت
سمر : هي معجبكش
مراد(بابتسامة) : لا لا بالعكس تبارك الله عليكم الله يعطيكم الصحة ... غير شبعت صافي
سيف : خليو السيد على خاطرو ... ماتقجروش عليه
سمر : اوا بصحتك ... بلا متخرجو دبا راه الشمس مطنطنة سيرو رتاحو دبا وحتى الليل عاد خرجوا
مراد(دار يدو على كتف سيف) : صافي واخا
سلطانة : واخا هانا طالعة
#يتبع ...