للسماء قمر و لقلبي أنت

الجزء 62

#للسماء_قمر_ولقلبي_أنت 💙
بقلم : stories and novels
الجزء : 62
** عند سلطانة & جوديا **
من بعد ما خرجو من غرفة سمر وسيف ...جرات جوديا بنتها سلطانة جبهة بيتها وهي تنتر منها ...
سلطانة : غير خليني ... غنمشي بوحدي(تمت غادة وهي توقفها)
جوديا : بلاتي بغيت نهضر معاك !!
سلطانة (بقات كتشوف فيها وربعات يديها) : كنسمعك
جوديا : ماشي هنا !! اجي ندخلو للبيت
سلطانة(ببرود) : واخا
• دخلو للبيت ومشاو جلسو فوق الناموسية •
جوديا (بقات حانية راسها وكتلعب بصباعها بتوتر)
سلطانة (تنهدات) : واش جينا باش نبقاو ساكتين ؟؟ فففف (وقفات) الا كنتي غتبقاي هكا من الأحسن خليني نعس عيييت فيا النعاس
جوديا (شدات ليها فيديها) : لا لا صافي هاني غنهضر
سلطانة (جلسات) : واخا
جوديا : بنتي ... سمحي ليا .. مبقيتش قادرة نصبر هكا نتي بعيدة عليا ...(بنظرة تودد) عفااك
سلطانة (باستغراب) : نسمح ليك ؟؟ واش فنظرك دابا فاش طلبتي السماحة كتسناي مني نوض ونعنقك وبحالا ماطرا والو ؟؟ اون بلوس ماشي أنا لي قررت نبعد (كتشير ليها) نتوما لي جبرتوني باش نبعد عليكوم ... ديما الخصام والغوات وعمركم كنتو مفاهمين وكتهضرو بالعقل بحال الناس ... اوكي فهمنا بلي مطلقين ولكن عالأقل حتارموني ... حتارمو ديك الحاجة لي جامعاكوم ... (بسخرية) هادشي الا مكنتوش نادمين
جوديا (حطات يديها على كتفها) : اش كتقولي ابنتي ... كيفاش نقدر نندم عليك ... (عينيها غرغرو) وحاجة أخرى انا مكنتاضر منك والو اسلطانة ... أنا جيت تال عندك غير باش نقولك بلي أنا حداك ... قدما عشتي فهاد الدنيا غنكون ديما معاك ... عارفاك معصبة مني ولكن ... عمرني نتخلى عليك ... ومغنمشي لحتى بلاصة بلا بيك ... حيت الأمهات مكيتخلاوش على ولادهم (بداو دموعها كيطيحو شلال) ميقدروش ... وأنا عارفة وجودي بجنبك غينفعك بزااف ... بزااف (حنات راسها) ونتي محتاجاه ... أنا عارفة ...أنا لي غنقدر نحس باش كتحسي ... حيت تقريبا عشت نفس الوضع
سلطانة (سرطات ريقها) : عفااك ... براكا متكوني دراما كوين ... هادشي لي كيوقع قدام عيني وأنا باقا صغيرة ... راه صعيب عليا ... نفسيتي تدمرات واش عارفة هاد الكلام ؟؟
جوديا : عارفة ... تيقي بيا عارفة مزيان هادشي ... ولكن منقدرش نعيش بلا منشوفك ولا نسمع صوتك ا سلطانة ... ميمكنش ليك تحرميني من هادشي ... (تنهدات) أنا كنفكر فيك فكل لحظة ... ماشي غير ملي مشيتي عليا ... ملي تولداي وأنا كنفكر فيك ... تخلعت عليك ... فاش كتفكري واش كديري واش بغيتي (مسحات دموعها و وقفات) ولي بغيت نقول ليك سمحي ليا ا سلطانة ولكن عمرني غنخليك واخا تطلبيها مني (تمات خارجة)
سلطانة (وقفاتها) : ماما ... واخا تنعسي حدايا ؟
جوديا (ضحكات وسط دموعها و مشات طارت عليها بتعنيقة وتبوس فيها ... وجلسو يتباكاو
جوديا (دارت يديها على حنكها) : عارفة بنتي قلبها كبير اهئ اهئ
سلطانة : ولكن ... (شافت فيها) كيما سمحت ليك ... تصالحي مع مامي
جوديا (جمعات الضحكة وبعدات نظراتها) : هداك الموضوع بعيد عليك
سلطانة : راني عارفة كولشي !! لقيت الكتاب
جوديا (تفاجآت): كيفاش ؟؟
سلطانة : اه لقيت الكتاب ...و واخا مزال معرفت كولشي بالتفاصيل ولكن (شدات ليها فيديها) أنا متأكدة مامي ماشي ممزياناش ... خاصك تسمعي ليها وتفهميها ومغتكدبش عليك ... هي واخا كتبان قاصحة وقوية من برا ولكن راها حنينة وضريفة
جوديا : ففففففف ...اش كتخربقي !نتي باقة صغيرة مغتفهميش هادشي
سلطانة : واش جربتي تسمعيها ؟؟؟
جوديا (مجوباتهاش)
سلطانة : اوا شتي ...سمحي ليا اماما ولكن راه هاد الزربة هي لي خارجة عليك
جوديا (بقات ساكتة حيت لقات كلامها صح) : يكون خير
سلطانة : غتصالحيها ؟؟
جوديا : راه قلنا ليك يكون خير ... (وقفات) يالله تنعسي ولا مبقاش فيك ... زيدي (مشات تكات فالناموسية)
سلطانة (شاداها الضحكة) : وااخا ... هاحنا غنعسو ... والصباح طال ولا قصار غيجي (مشات تخشات فماماها وطفاو الضو ونعسو 🌌)
... أجمل جزء فاليوم هو الصبح قبل شروق الشمس ...بصفاء سماه ... ونقاء هواه ... وصوت العصافير لي مكتهداش ...والندى لي كيطيح حبة حبة ... وريحة القهوة المعطرة مالية المكان 💙 ... صباحكم ورد وعسل 🌸🍯 ... على صوت زقزقة العصافير فاق جود من نومه العميق مغوبش ولقا راسو  ناعس فمكان غريب على لي موالف ... بدا كيضور راسو ويستوعب فين هو وشكون هو واش كيدير هنا ... بقا لبضع ثواني عاد استوعب اش وقع شاف فشيماء لقاها نااعسة كيوت شفايفها وخدودها حمرين ... تكسل وتجبد مزيان وهزها حطها فوق الناموسية وغطاها ومشا غسل وجهو وبقا كيشوف راسو فالمرايا شحااال ... عينيه حمرين وشوفاتو كي الصقر والما نازل ليه على وجهو بلا ميحرك حتى جفن ... بقا لمدة قصيرة ومشا خرج للبالكون بقا واقف كي الجبل ... دماغو خدام مكيوقفش عن التفكير ... لي شافو ميقولش هدا هو لي كان كيبكي البارح ... كيبان عاادي ... بحالا ماخصو تا خير ...وصلاتو ريحة القهوة المعطرة ونزل للكوزينة لقا الخدامان كيوشوشو عليه حنحن وشافوه طاح ليهوم الما فالركابي ...
جود (محافظ على نظراتو الباردة) : قهوة
*مشات وحدة منهم عطاتها ليه وهي كترعد *
جود (طلعهم وهبطهم ) : نقصو من التبرگيگ وديوها فخدمتكم شوية (مشا خرج)
صفية (لي عطاتو القهوة) : ويلي ويلي مشينا فيها (فشلو عليها ركابيها وجلسات فكرسي) غيجري علينا مافيهااش
سعاد (كتندب) : اهياا ناري خدمتي مشاااات اهيا ناري (كضرب ففمها) هاك ا فميييي هاك افميييي
••• نرجعو لجود ونخليو الخدامات يندبو •••
من بعد ما خرج من الكوزينة مشا خرج للجنان كيستنشق الهوا النقي ويستاغل الفرصة باش يستمتع بهاد الجو ... بقا واقع وساهي ومرة مرة كيرشف من القهوة حتى بانت ليه خلود جاية كتجري وداك الخير كيتهز معاها كانت لابسة سيرفيت لاصقة ودايرة لشعرها ذيل حصان وهازة فيديها قرعة دالما ... كتبان سيكسي .... طلعها جود وهبطها ورجع كيشوف نيشان ... وهي شافتو ودارت ابتسامة عريضة كلها إشراقة وأمل ...
خلود (كتنهج) : صبااااااح الخيييييير
جود (شاف فيها وأومأ ليها براسو) : منعستيش ؟
خلود : لا مجانيش وقلت نهبط نجري شوية
جود (رجع كيشوف نيشان وكيرشف ن القهوة) : ممممم
خلود : يالاه نخليك ... يومك مبروك
#يتبع ...