للسماء قمر و لقلبي أنت

الجزء 105

#للسماء_قمر_ولقلبي_أنت 💙
بقلم : stories and novels
الجزء : 105
كترت الهضرة والقيل والقال وكل واحد واشنو كيقول وكل واحد وشنو كيألف من عندو ... من بعد ما كولشي مشا لبلاصتو ... دخلات حسناء لبيت فين كاينة سمر ...لقات سمر جالسة فبلاصتها وباقا فحالتها مصدومة ومستوهة ... وغيثة متكية على الحيط كتكبي فصمت ... أما اللفعات ديال ياقوت ونجمة باقي شادين النميمة مع البنات لوخرين ...
حسناء (مخنزرة) : سمر ... تبعيني للبيرو ... (شا فت فغيثة) ونتي عاونيها
مشات غيثة بلا متجاوبها شدات فسمر حتى وقفاتها وبدات تمشي فيها ... سبقاتهم حسناء مطلعة راسها للسما ونافخة صدرها ... حلات الباب ديال البيرو ديالها ومشات جلسات ولبسات النضاضر ديالها ... وماهي إلا دقائق حتى دخلو البنات ... غيثة جلسات سمر فالكرسي وهي جلسات فلاخور ...
حسناء (بحدة) : غتعاودي ليا كولشي ومتفلتي حتى حاجة
سمر (عاودات ليها كولشي بالتفاصيل وهي عياانة وكتنهج وتساخف ) :  ....غيبت ... وماعقلت على راسي ... حتى لقيت راسي هنا
حسناء (طلعات حواجبها من الصدمة ولكن مقالت والو)
سمر : والا متيق ... متقيتينيش ... شوفي (وراتها يديها لي فيهم طبايع ديال الكي زرگين)
غيثة(شهقات ودارت يديها من هول الصدمة) : هيييييي ... ويييل الشيطاااان 
حسناء (حيدات النظاظر وحطاتهم فوق البيرو) : لا حول ولا قوة إلا بالله ... هادشي كولو طلع من سفياان ؟؟
سمر (باستغراب) : اشنو زعما ؟؟؟ ... تيقتيني ؟
حسناء : علاش لمنتيقكش ابنتي ... كولشي متيقك وحتى فقضية المدير
سمر(خرجات فيها عينيها): اهاااااه ... وعلاش موقفتوش معايا ؟؟
حسناء : واش نتي هبيلة ؟ واش عندك شي عقل ؟؟ هاد أمة الله غتضحي وتوقف معاك ؟؟
سمر (دوزات على شعرها بعصبية وصاطت)
حسناء : هذا هو الواقع ابنتي ... المهم ما علينا نساي قضية المدير ... وفكري فقضيتك ... سمعيني مزيان اش غنقولك المدير مخصوش يعرف حس هادشي لي وقع ...(يالاه بغات تهضر وقاطعاتها) تسنااي نكمل ... المدير يدو طوييييلة وعاد بات سفيان راه خااانز فلوس ... وفكري معايا المدير محاملكش وبات سفيان من الطبيعي يجي من ولدو والا دارو ليد فاليد نتي لي غتمشي فيها ... والموضوع غيكبر ويوصل لعائلتك وللناس لي عزاز عليك
غيثة : ولكن ... علاش خويا سيف داوه البوليس ؟؟
حسناء(هزات كتافها) : يقدر يكون دار شي حاجة لسيفان شكون عارف ... حتال الصباح ونعرفو علاش
سمر : منقدرش نخلي سيف يتعدب فالحباسات وهو مداير واالو ... أنا غنمشي نشهد غدا
حسناء : لمصلااحتك ... سكتي حسن ليك ... (سكتات شوية) ونتي تعرفي
غيثة : ودابا ... سمر ... اش غديرو ليها ؟
حسناء : دابا مبقا والو ويسالي العام ...وفالأصل خاصك تعاقبي حيت بقيتي خارج المؤسسة ونتي فالداخلية ...أنا والسي عبد الرحيم والمدير كولنا غنمشيو فيها على هاد التراخي ...ولكن من الأحسن ليك ولينا ضربيها بسكتة باش نتي تكملي هاد خمسطاش ليوم لي بقات في سلام ... ومن جيهتي غنغطي عليك ...(طلعاتها وهبطاتها) واصلا ...مع حالتك موحال تدخلي للقسم ... غنعاونك باش تقراي فبيتك ودوزي الفروض لي بقاو فبيتك ... بشرط تسكتي ... اش قلتي ؟
سمر (عضات فشفايفها كتغدد): عييت بغيت نمشي نرتاح ... (مدات يديها لغيثة باش توقفها )
خرجو البنات وحسناء تكات على الكرسي وابتاسمات بسخرية وقالت « نعتابروك موافقة »
رجعو للبنات للبيت ودخلو للدوش ... غسلات غيثة لسمر وخرجاتها لبساتها وتكات فبلاصتها ... والتيشورت ديال سيف خباتو ودارتو تحت المخدة ... وغيثة تاهي مشات لبلاصتها كتخمم ... دخلو اللفعات وبقاو كيوشوشو حتى كولشي نعس ...
أصبحنا وأصبح الملك لله ☀
وصلات السبعة ناضو البنات لبسو وخرجو فطرو ودخلو يقراو الا سمر لي بقات ناعسة ... حتى وصلات العشرة وضرباتها الفيقة مخلوعة حيت كان الصداع والغوات ... ناضت حكات عينيها وهزات شال كبير دارتو فوق كتافها وبقات تعكز على الحيط مشات غسلات وجهها وجمعات شعرها كوتشوفال نازلة وبقاو شي زغيبات مطلوقين ومشات بزز وكتوجع للشرجم كطل ولقات الجوقة والصداع والهضرة تخلعات ... مشات تاني حدا الباب ومن حسن حظها لقات ولد الحاج دايز وهي توقفو ...
سمر (بلهفة) : كرييم !!!
ولد الحاج(شافها ومشا عندها) : ااه سمر ..(حط يدو على كتفها) مالك نايضة ؟ خاصك شي حاجة ؟؟
سمر : شنو واقع ؟؟؟ سمعت الصداع وتخلعت
ولد الحاج : وا غا سكتي ...الريگاطة لي نايضة التحت موحال واش نقراو هاد النهار
سمر : علاه اش كاين ؟؟
ولد الحاج : عشيرنا المنونخ ... مات
سمر (شهقات بصدمة): هييييي ... c'est pas possible (ميمكنش) !!!
ولد الحاج : يمكن ... قالو بلي قتلو سيف الخوادري ديال غيثة
سمر (تصدمات وصرطات ريقها): وعلاش قتلو ؟
ولد الحاج : قالك شي بلان بيناتهم ... شي حاجة بحال هكا ... وا المشكلة ماشي هنا وا المشكلة بات المنونخ جاي مكشكش ودخل للادارة نوض الريگاطة وصبنهم مزياااان جلس كيعرعر عليهم تماك ... وجات الواليدة ديال سيف كتغوت وتندب فالساحة وتبكي وتا غيثة مسكينة غا كتبكي ... مسكينة بقات فيا ...(سكت شوية) اااه وتا الواليدة ديالك كاينة
سمر(بقلق) : واايلي... واش دارو دابا ؟
ولد الحاج : مزال حالهم كيما عاودت ليك ...(شاف فيها بتشكيك) اجي نتي بعدا ... نسولك ؟
سمر : وي ؟
ولد الحاج : عندك شي علاقة فهاد البلان لي طاري؟
سمر : علاش ؟
ولد الحاج :اوا معندي منخبي عليك ... المدرسة كتنوض وتجلس بالهضرة عليك ا الساطة
سمر (بفضول): عليا ؟؟؟ اش كيقولو ؟
ولد الحاج : وااا .. كيقولو نتي السبااب فهادشي ... وهوما دابزو عليك وشي كيقول المنونخ تاقبك ولاخور مرضاش ولا منعرف مهم شي هضرة بحال هكا
سمر(بسخرية) : جاب ليهوم الله فاش يتلهاي تاني ... (سكتات شوية وشافت فيه)واخا تعاوني نهبط ... ضروري
ولد الحاج : الساطة ... لي نقولك سدي وذنيك ومتسوقيش للبشري راه يقولو فيك لي ما فيك
سمر(تنهدات) : واخا غير يالاه (يالاه غادية وهو يوقفها)
ولد الحاج : ومجاوبتينيش
سمر : علاياش ؟
ولد الحاج : واش ليك يد فهادشي
سمر (صاطت): من بعد ونعاود ليك
ولد الحاج : هي كاين شي
سمر : ففففف و صافي قلت ليك من بعد ... يالاه
#يتبع ...