للسماء قمر و لقلبي أنت

الجزء 26

#للسماء_قمر_ولقلبي_أنت 💙
بقلم : stories and novels
الجزء 26 :
فإحدى البيوت المجاورة... كانت دار ميسورة كبيرة نوعا ما ... متكونة من جوج طبقات وسطح ... كانت بنت صغيرة فعمر 14 كتفتن بالزين بيضاء البشرة وقصيرة ... عينيها كبار مشفرين وعسليين ... نيف مقاد وفم أحمر ومنفوخ ... حجبان عراض ومقادين وشعر قهوي طويل ... كانت لابسة بيجامة طويلة وضايرة ضفرة وطالعة فوق السداري وكطل فالشرجم ...سميتها «رقية»
رقية (بفرح): مي شتي الجيران الجداد لي جااو ؟ 😄
بجنبها كانت مرا فالأرض ناشرا خيرها تبارك الله .... جالسة كتنقي فالعدس ولابسة بيجامة طويلة ودايرة زيف حياتي وحروفها زوينين وحاديين وسميتها «للالة حادة»
للالة حادة : جيران جداد ؟؟ شكون هادو ؟؟
رقية (فرحاانة كتهضر وتشوف فدارهم) : واقيلا نصارا حيت ملابسينش بحالنا ...
للالة حادة (بفضول): اش لابسين ؟؟
رقية (ضارت عندها): عرفتي اماما واحد البنت لابسة غير شورط ويلييي وتريكو سماطي صافي (كتعبر يديها) أما لوخرا لابسة كسوة قصيرة ومادايرين كاع الحايك بحالنا
للالة حادة (بغرابة): العجب ... مبقا مايعجب الله يستر ...
*تسمع صوت الباب تحل *
للالة حادة (حيدات داكشي لي فيديها ) : شي حد جا ... يا خوك يا ختك (نوضي شوفي)
مشات رقية ولقات رجل طويل القامة متوسط العضلات أبيض البشرة ... لحية خفيفة وحروفو قهويين مايلين للون العسل وعينيه عسليين حجبانو معقودين شعرو عسلي وكثيف...شاب وسيم بزااف عشريني عندو هبة من عند الله وقليل الكلام لدرجة بغض المرات كيبقا يهضر غا بعينيه ولا بالإشارات مافيه ميهضر كاع ناس البادية كيحتارموه أولاهم عائلتو...وحدودي كيبغي يبقا أغلب الأوقات بوحدو ...كان لابس بوط الميكة وتيشورت وسروال دالسيرفيت
رقية (جايا كتجري): خووووياااا
سيف الدين (بابتسامة خفيفة وبصوت رجولي ) : بشوية عليك عنداك طيحي
رقية (سلمات عليه) : تعطلتي اليوووم 😄
سيف الدين (حيد البوط وحطهم جنب وعنق رقية بيديه وطلعو فالدروج كيعنكش فشعرها): كنت فالخدمة ... فين الوليدة ؟؟
رقية : الفوق ... عرفتي شنو جاو جيران جداااد
سيف الدين (بدون اهتمام) : مزيان
طلعو للفوق وسلم على مو مشا غسل يديه بينما تسخن ليه الغدا ... ماهي الا دقائق حتى دخلات شابة عشرينية لابسة الحايك بالأسود ومكيبان فيها والو ... حتى حيداتو وبانت شابة بيضاء البشرة عينين كبار مشفرين وعسليين نيف مقاد وفم منفوخ وحمر وطاي ياااالاهوييييي تباارك الله خير ربي مدفگ المعالم الأنثوية فبلاصتها جبال و تضاريس...عاطية للعين ومتوسطة الطول وكانت هازة قفة ... كي دخلات حيدات الحايك والنقاب وبان شعرها الرطب العسلي وكتنش بيه ... حطات القفة فالكوزينة وطلعات الفوق
غيثة (كتسوط بالنقاب وتلاحت فوق الناموسية) : هووووووف على صهد كاين السلااامة يا ربي
سيف الدين (كانت مخشية فيه رقية وكيشوفو فيها مخنزر ): وعليكم السلام
غيثة (شافت فيهم) : عفيوني الله يرحم ليكم الوالدين هوووووف سخفت ... السوق بايطرطق الزحام الزحام ... والصهد الصهد مييييمتي (سرحات رجليها) رجلي تنفخو اووووف طابو طابو ... رقية نوضي جيبي ليا الما عفاك راه شحفت
للالة حادة (جايا هازة الطاجين) : يا جمعي كراوعك ... ونوضي جيبي الخبز ... عولنا عليك بكري تقداي (حطات الطاجين وضارت عندها) يا نوضي الله يقل حيااك نوضي ونتي وليتي گد البگرة خزيييت تفووو الناس يولدو البنات وانا والدة الخلااا
غيثة (كتغنغن) : وا مي راه عييت سخفت خليني غا نرتاح شوي
للالة حادة (خرجات فيها عينيها) : يا نوضيي !!
سيف الدين (وقف مخنزر) : صافي صافي غير خليها انا نجيبو (مشا للكوزينة كينة التحت)
للالة حادة : يا كيتك يا خلاك مخليا خوك يتسخر عليك 😒😒
غيثة : عفاك ا مي رخفي عليا شوية .... راه بستة وستين كشيفة باش خرجت من داك النحس ففففف (كتبرد بالنقاب) راه عيييت والله
للالة حادة (كبات ليها الما من الخابية دالطين) : شدي عتقي .... كيكان السوق
غيثة (جغماتو دقة وحدة) : اححح الله الحمد لله .... عامر عامر عامر بايطرطق ...ايييه مگلت ليك ... جات اليوم للسوق واحد هكا كدير (كتعبر بيديها) علاه فاللول ماصحابنا غيييير نصرانية الصغر والزين كتبان لاباااس عليها اوا حتى هضرات بالدارجة ... السوق كامل كان حاضيها أما الرجال بغاو ياكلوها ... زيديني الما
للالة حادة : تي بشوية كانو جاريين عليك ؟ شربي وقيسي راك عارفة مكاين ما... اوا سمعي راه جاو شي جيران جداادين لحدانا غير هنا ... انا ماشتهوم ختك لي شافتهوم
(شافت فرقية) ياك ا رقية ؟
رقية : اه ... كانو جوج مالابسينش بحالنا
سيف الدين (كان طالع وسمعهم) : واش مشيتي تقداي ولا تحضي الناس (حط الخبز فالطبلة وجلس) يالا بسم الله
قطعو الخبز ... وبداو يتغداو فصمت ... وكل واحد ناض لشغلو للالة حادة طلعات للسطح تنقي الزرع معاها رقية أما غيثة كتعمر اتاي وتعجن الخبز وطيبو فالفران دالعواد كيكون حدا كل دار ....