للسماء قمر و لقلبي أنت

الجزء 50

#للسماء_قمر_ولقلبي_أنت 💙
بقلم : stories and novels
الجزء : 50
عيييييييو هانا زيييييت 👀👀👀 المهم نبقاو مع القصة ومنتعطلوش أكتر لا عليكم لا على سلطانة ... ويالاه نمشيو ففترة أواخر الستينات ... وتحية لي معانا من هاد الجيل والأجيال القادمة ... نمشيو بالضبط فنهار الحفلة وملي كنقولو فصل الشتا فطاطا ...كنقولو المووووووت دالبرد ..فالمدرسة كانو دايرين حفلة على قد الحال ... طوابل فيهم حلويات بسيطة ومونادا ... والناس لابسين أحسن ما عندهم ... ولكن ميكونوش بحال سمر لي كانت ملكة المكان لا بجمالها لا بلباسها ... كانت لابسة مونطو تحت الركبة بالأبيض ومزير من الخصر ... وليگات ديال الجلد فالأسود وبيريه فوق الراس بالأسود وشعرها مطلوق وطالون فالأبيض ... ومكياج خفيف وعكر حمر ... جات جججججدد أنيقة لدرجة كولشي كيشوف فيها ... أما غيثة فكانت لابسة حايك باللون الأزرق ونقاب بالأسود تاهي جات فننننة ... خصوصا مع البرد حناكها وفمها ونيفها غيطرطقو بالحمورية ... نفس الشي مع سيف تاهو كيبان كيوت ... وشعرو الكثيف النازل على عينو المغوبشين ونيفو وحناكو وفمو حمريييين ... كان لابس تريكو دالصوف وسروال وصباط عاديين ...اما للالة حادة كانت لابسة حايك أسود عادي ... و م.فاطمة لابسة قاميجة بالأحمر وخاشياها فصايا گري منفوشة وتال الركبة وفيها صداف ... وفوق شعرها بيرية بيضة وشعرها دايرة ليه سنفجة مأنتكة ... وفيديها ليگات بيضين وهازة فيدها ليمن مونطو مزغب وفاليد التانية صاك وفرجليها طالون ... اوا يا سيادي الموشاهدييييين جلسو الناس فالكراسا ... وكانت بنت المدير هي لي كتقدم فالحفل والانشطة والأغاني والمسرحيات وحتى الرقص ...ولي منخارط فشي نادي كيبان هنا وعائلات الأوائل جالسين القدام ... طول الحفل وسيف وسمر كيتبادلو النظرات الثاقبة تقول شي واخد الورث لشي ... والمشكلة أن سمر لي غالطة ومع ذلك كتخنزر فيه بحالا قاتل ليها مها ...المهم جا وقت الهدايا لي غيتقدمو للأوائل ... كيعيطو بالواحد بالواحد ويصوروه بوحدو ويتصور مع شي أستاذ عاد مع ولي الأمر... ويعطيوه شهادة وكادوات (كتوبة) ... وصلات نوبة سمر ومشات وهي رافعة راسها للسما تقول غادة تاخد جائزة نوبل ... المهم مشات والناس كيصفقو ليها وكيصورو فيها ...وجات م.فاطمة تاهي تصور معاها ... سالاو البوزات وبان عليا نبان عليك .... وكاين لي كيطلب المصور يصورو ... وداكشي لي دارت سمر بقات كتصور بزاااف ... مرة بوحدها مرة مع مها مرة مع غيثة ... و واحد التصويرة لي كانو فيها كاملين ... والصورة لي كان فيها سيف شبه مبتسم حيت معندوش مع هاد الأجواء ... جا وقت اتقدمو الشهادات للأندية (نادي الرياضة ... نادي القراءة والإبداع ... نادي اللغات ... نادي الفن ... إلخ) وسمر منخارطة فنادي الفن لي فيه الشعر والخطاب والغنا والرقص وحتى العزف ...وحيت هي لي جات اللولة طلبوها باش تغني ليهم وغنات أغنية «Nanourisma» ... الأغنية عجبات الحضور بزاااف واخا مفاهمين والو المهم المشاركة ... ومن بعد ماسالاو الأنشطة فرقو الحلوة والموناضا ...وتفرتكات الجوقة ... ودعو البنات عائلاتهم و رجعو لبيوتاتهم ... لبسو بيجامات وتلاحو فالناموسية كيتعاودو على اش طرا فاليوم حتى تمو داخلين ياقوت و نجمة (توحشتوهوم؟) ماداوهاش فيهم تاهوما بدلو عليهوم ومشاو لناموسيتهم ...
نجمة (كتعوج وتلعب فشعرها) : يااقوووت ...شتي داك الزين لي كان فالحفلة
ياقوت : اشمن واحد ؟ داك الطويل البيض ؟؟؟
نجمة : اييييييه (تنهدات) اجي ماشي خو شي وحدة معانا لا ؟
غيثة (عرفاتها كتحشي ليها الهضرة) : ايييه خويا شكاين ؟؟
نجمة : اووووه هادي نتي هنا ؟؟ اش داك الزين عندك ومخبياه علينا
غيثة (تقادات فالجلسة وكتميق فيها) : شكون داها فيك يا المكحلة فالضلاام
سمر : بلاتي بلاتي ... واش كيهضرو على داك القرد دخووك ؟ وا هههههههههههههه حياني الله تا شفت الحمير كيتزعطو فالقرود
ياقوت : جمعي ففمك
نجمة : غييير خليها ... مسكينة عارفة راسها مغيديهاش فيها .. (كتميق فيها) ممممممم ونتي دايرة كي الخنفوسة
سمر (وقفات جاعرة) : أنا لالاااك وبالزين فايتااك والا كنتي مرا اجي هبطي نوريييك
غيثة : الزين فالكحال يهبل كون ما ضلام الليل ما تشوف لا ضو القمرة ولا نجومها ... صافي غير جلسي ا سمر خليهوم ... راه الكلب لي كينبح مكيعضش وخويا بزاف عليك ... ميديها فيك لا نتي لا شياطتك ...
نجمة (غتمووت بالفقصة مرضاتش) : اوا مشي
سمر (مشات تاهي لبلاصتها) : أم الغيث ... امتى غيخرجو التصاور ؟
أم الغيث : ممممم معرفتش صراحة ... ولكن وقتما خرجو غيجيبوهوم لينا ومن هنا لتماك راه غنرجعو للدار
سمر : علاش ؟؟
ام الغيث : كيفاش علاش ... متوحشتيش مك
سمر : سييي ...اووووف بغيت غير امتى نساليو هاد القراية ونخدم ونجمع الفلوس وندير لباااس ... نشري فيلا كبييرة وطوموبيلات ونسافر فينما بغيت وقتما بغيت
ياقوت (بسخرية) : الطماع عمرو يشبع ولا يقنع ولي تعطيه الوجه يطمع فالبطانة
سمر (خنزرات فيها) : اشوووفي اديك الخامجة والله ومادخلتي سوق راسك تا نفرع ليك كمارتك ... سمعتي وا جمعي راسك راه باقا مدرتش راسي فيك ...(وجهات ليها أصبع الإتهام) اوا الله يعميها ليك
غيثة : صافي اغيثة متديهاش فيها ... لي حسدك ادير بحالك
ياقوت (كتميق) : ادير بحالهااا ؟؟ علاه بالسلامة مالها بنات قصور ولا عبرات بحور ؟؟
سمر (ضحكااات وكتصفق بيديها وقالت بتكبر) : علاه مافراسك الزيين ... أنا بنت الأصل والمفصل ... بنت القاع والباع ... أنا يا لالة مخليت فين مشيت ونتوما مفتو تا العتبة ديال طاطا ...داكووغ ؟؟
نجمة : باراكا من الكدووب
سمر : ماعندي لاش نكدب ... عنداك غير من هنا للقدام تجيو تبحلسو عليا ... تريكة كيدايرة اييييخ سيرو غا نقيو حالتكم عاد جيو هضرو مع لالاكوم سمر
غيثة : يالاه شربو العصير وغسلو معاكوم الكيسان هههههههههه