အစမ်းပလေးကြည့်ခြင်း ပြီးဆုံး | ဘာသာပြန်

အပိုင်း (၃)

[Unicode]

'ဂန်ဟယ်အာ'ကို ဂရိစ်နတ်ဘုရားတွေထဲက တစ်ပါးပါးနဲ့ နှိုင်းယှဉ်ကြည့်မယ်ဆိုရင် Midas များ ဖြစ်နိုင်မလားလို့ တွေးမိသည်။ ..အင်း... မဟုတ်သေးဘူး။ နှိုင်းရမှာတောင် Midas က သူ့ထက် ပိုတော်သေးသည်။ Midas ကတော့ သူ့လက်နဲ့ မထိမိအောင် သတိထားနေရင် အသက်ရှင်ရတာ ဘာပြဿနာမှ မရှိဘဲလေ။ ဟယ်အာကတော့ ဖြစ်တည်မှုကိုက အလုံးစုံ ပျက်စီးဖို့ရာ ဖြစ်လာတာမို့ပဲ။

ဘဝမှာ အပေါင်း အနုတ် သုည သုံးခုထဲက တစ်ခုခုဖြစ်ဖြစ် တစ်လှည့်စီ ပြောင်းလို့ရအောင် မိသားစုကံသာ ကောင်းနေခဲ့ရင်..။ မြေပဲစိုက်တဲ့နေရာမှာတော့ မြေပဲ၊ ပဲနီလေး စိုက်ရင်တော့ ပဲနီလေးပဲ ရမယ်ဆိုတဲ့အတိုင်း သူ့ မိသားစုဟာလည်း စရိုက်ကအစ သူနဲ့ထပ်တူပင်။

လွန်ခဲ့တဲ့ ၃၂နှစ်တုန်းက အမေ့ရဲ့ သေဆုံးမှုက မီဒီယာတွေဆီ ပြန့်သွားခဲ့ပေမယ့် သေကြောင်းကြံမှုအနေနဲ့တော့မဟုတ်ပေ။ မီးဖွားတုန်း သွေးထွက်လွန်ပြီး ကံမကောင်းစွာနဲ့ ဆုံးပါးသွားရတယ်လို့သာ အကြောင်းကြားထားခြင်းဖြစ်သည်။ ရက်လည်နေ့တောင် မီဒီယာတွေ လာမှာစိုးတာကြောင့် လိမ်ထားရတာနဲ့ အမေ့ အသုဘအခမ်းအနားကိုတောင် တိတ်တဆိတ် လုပ်လိုက်ရသည်။

ကိုယ့်ကိုကိုယ် အပြစ်တင်စိတ်တွေကြောင့်များလားပဲ ဟယ်အာသည် ငယ်ငယ်လေးကတည်းက သူများကို ပြဿနာမပေးချင်ခဲ့ပေ။ နံရံကိုကိုင်ပြီးမှ လမ်းလျှောက်နိုင်သေးတဲ့ အရွယ်လေးပဲ ရောက်သေးတာတောင်မှ ကော်ရစ်တာအထိ ရအောင် လျှောက်လာပြီး အဲ့နားက ဝန်ထမ်းတွေ အမြင်ကို စောင့်ခဲ့တာလို့ ပြောပြကြသည်။ သူတို့တွေ ဟယ်အာ့ကို မြင်ပြီး ခေါင်းလေး လာပုတ်ပေးတဲ့အထိ၊ လာ ချီမ,ပေးတဲ့အထိ။

ဟယ်အာ ပုံပြင်လေးတွေ ဖတ်ရတာကို ကြိုက်တဲ့အရွယ်မှာတော့ မမကြီး ညတိုင်းညတိုင်း အမေ့အကြောင်းကို တိုးတိုးတိုးတိုး ပြောပြတတ်သည်။ အဲ့ဒီ့အချိန်တုန်းကတော့ ပြောပြခဲ့တဲ့ မမကြီးရော ငြိမ်ငြိမ်လေး ထိုင်နားထောင်ခဲ့တဲ့ သူရော နှစ်ယောက်လုံး ဒါက ဘယ်လောက်တောင်ဆိုးရွားလိုက်တဲ့အဖြစ်ဆိုတာကို မသိခဲ့ကြပေမယ့်.. အရွယ်ရောက်လာပြီးနောက်တော့ ကွာခြားသွားခဲ့လေပြီ။