အစမ်းပလေးကြည့်ခြင်း ပြီးဆုံး | ဘာသာပြန်

အပိုင်း (၉၅)

— ဟိုလေ...  ရူးသွားတာလားဟင်?

Laptop စပီကာကနေ ထွက်လာတဲ့ စကားသံဖြစ်သည်။ ထောင့်မှန်စတုဂံပုံစံ မော်နီတာထဲမှာ အကွက်ရှစ်ခု ပိုင်းထားတဲ့ ဝန်ထမ်း ၈ယောက် ပါဝင်ပြီး meeting လုပ်နေကြတာဖြစ်ပြီး အဲ့ထဲက ၇ယောက်က ထယ်ရင်း အရိပ်အခြည်ကိုပဲ ကြည့်နေကြသည်။

— ရွဲ့တာမဟုတ်ဘူး တကယ် စိတ်ရင်းနဲ့ စိုးရိမ်လို့ ပြောတာပါ။ ကိုယ်စားလှယ်ကြီး တကယ် နေကောင်းတယ်မလား?

ပွစိပွစိ ပြောနေတဲ့သူကတော့ မျက်နှာပြင်ရဲ့ ညာဘက်အောက်ထောင့်မှာ မြင်ရတဲ့ develop team ခေါင်းဆောင် ဂင်မင်ဆူဖြစ်သည်။ သက်ပြင်းချတာအထိ အပိုလုပ်ပြနေတဲ့ သူ့ရဲ့ ရည်ရွယ်ချက်ကို ကောင်းကောင်း နားလည်သည်။ ထယ်ရင်း ဆိုးလ်ကို ပြန်သွားတာကြောင့် develop team အဖွဲ့ဝင်အားလုံး မျှော်လင့်တောင့်တခဲ့ကြတဲ့ နယူးယောက်က အစည်းအဝေးအချိန်ဇယားက အနည်းဆုံး သုံးရက် နောက်ရွှေ့သွားရတာဆိုတော့.... အတော်လေး မကျေမနပ်ဖြစ်နေကြောင်း ပြတာပေါ့။

"အဓိပ္ပာယ်မရှိတာတွေ မပြောနဲ့.. အလုပ် ဘယ်လိုဖြစ်သွားပြီလဲ?"

— အလုပ်သာ အဆင်ပြေနေရင် ကျွန်တော် အဓိပ္ပာယ်မရှိတာတွေ ပြောနေပါ့မလား?

အဖွဲ့ခေါင်းဆောင်ဂင်က အဓိပ္ပာယ်မရှိတဲ့ စကားတစ်ခွန်း ထပ်ဖြည့်ပြောသည်။ ဇွန်လတစ်လလုံး ညဆိုင်းတွေ ဆက်တိုက်လုပ်ပြီး အပြီးသတ်ခဲ့တဲ့ ပရောဂျက် ရှိပေမယ့် အချိန်ဇယားရွှေ့သွားတာနဲ့အမျှ လုပ်ရကျိုးမနပ်သလို ခံစားနေရတာဖြစ်မညမ။ 'ဒီလိုဖြစ်မယ်မှန်း သိခဲ့ရင် အိပ်ရေးဝဝ အိပ်ပြီး ပြင်ဆင်ခဲ့မှာပေါ့' လို့ ပွစိပွစိ ပြောခံရတာလည်း မဆန်းပါ။

ထယ်ရင်း သူပြောတဲ့ စကားကို မကြားချင်ယောင်ဆောင်လိုက်သည်။

"အတွင်းရေးမှူးယွန်း"

အဲ့အစား email နဲ့ပို့လာတဲ့ အစီရင်ခံစာဖိုင်ကို ဖွင့်ရင်း အငယ်ဆုံးအတွင်းရေးမှူးကို ခေါ်လိုက်သည်။ မျက်နှာပြင်အောက်ခြေကနေ 'ဟုတ်ကဲ့' ဆိုပြီး မတ်မတ်ထိုင်လိုက်တဲ့ အငယ်ဆုံးလေးကို မြင်လိုက်ရသည်။

develop team ဝန်ထမ်းတွေကတော့ အကြမ်းဖျင်းကြည့်ရုံနဲ့ ညဝတ်အင်္ကျီနဲ့ ရှပ်အင်္ကျီတွေချည်း ဝတ်ထားကြပေမယ့် အငယ်ဆုံးလေးကတော့ တစ်ယောက်တည်း ဆံပင်စတိုင်ကအစ ရှပ်အင်္ကျီ၊ နက်ကတိုင်၊ ဂျာကင်အထိ ဝတ်ဆင်ထားပြီး သပ်သပ်ရပ်ရပ် ရှိနေသည်။ video meeting လုပ်ရတာ ငြီးငွေ့သွားလောက်တဲ့အထိ မကြာခဏ လုပ်တတ်တဲ့ ကုမ္ပဏီဆိုတာကို သူ မသိသေးပုံရသည်။