အစမ်းပလေးကြည့်ခြင်း ပြီးဆုံး | ဘာသာပြန်

အပိုင်း (၂၄)

[Unicode]

သူ တားရင်တားပါစေ ဂရုမစိုက်ဘဲ ထယ်ရင်းက ဆေးမခြောက်သေးတဲ့ ကင်းဗတ်စတွေနဲ့ ဘေးမှာ ချိတ်ထားတဲ့ အကြမ်းစာရွက်တွေ, memo တွေကို လိုက်ကြည့်နေသည်။ အခုပဲ ရုံးသွားရတော့မယ်ဆိုတဲ့ လူက တစ်ချပ်ချင်းစီ သေသေချာချာ လိုက်ကြည့်နေသည်.... ။ ပန်းချီကားချပ်တွေက တကယ်ကို အဝတ်မပါတဲ့ ဟယ်အာနဲ့တူသည်။

"ထယ်ရင်းရှီ... ဟိုလေ..."

တွန့်ဆုတ်တွန့်ဆုတ်နဲ့ ထယ်ရင်းဘေး သွားရပ်လိုက်မိတော့.. ထယ်ရင်းက ဆေးတွေ ဗရပွဖြစ်နေတဲ့ စားပွဲကို တစ်လှည့်၊ နံရံအတွင်းဘက်မှာ ထားထားတဲ့  ကင်းဗတ်စင်ကြီးကို တစ်လှည့် မော့ကြည့်သည်။

'ကင်းဗတ်စင်'ဆိုတာ ရိုးရိုးရှင်းပြရမယ်ဆိုရင်တော့ ကင်းဗတ်စတွေ စီထားတဲ့ စာအုပ်စင်လို သဘောမျိုးဖြစ်သည်။ ဒီ အပန်းဖြေအိမ်ကို ဟယ်အာ့ရဲ့ အလုပ်ခန်းလုပ်မယ်လို့ ပြောလိုက်တုန်းက interior designer က လက်ဆောင်အနေနဲ့ လုပ်သွားပေးခဲ့တာဖြစ်သည်။ အကန့်တွေက အကွာအဝေးကျယ်တဲ့အပြင် ကင်းဗတ်စတွေ စီထည့်ထားရန် သင့်တော်သည်။ အထူးသဖြင်​့ သစ်သားနဲ့လုပ်ထားတဲ့ ပန်းချီကားဘောင်တွေက ထောင်ထားရတယ်ဆိုတာကို ကြိုသိပြီး လက်ဆောင်ပေးသွားခဲ့တာကို ကျေးဇူးတင်တဲ့အနေနဲ့ သုံးဖြစ်နေတာဖြစ်သည်။

ဟယ်အာကတော့ သစ်သားဘောင်တွေအစား စတီးဘောင်တွေကို ပိုသုံးဖြစ်တာမို့ သိပ်တော့ အသုံးမဝင်ပေမယ့် ... ကင်းဗတ်စင် ပုံစံကို သဘောကျတာမို့ အလုပ်ခန်းထဲ ထည့်ထားတာဖြစ်သည်။

ကင်းဗတ်စင်မှာ အထပ်လိုက် ထောင်ထားတဲ့ ပန်းချီကားချပ်တွေကို ကြည့်ပြီး ထယ်ရင်း မျက်ခုံးတွေ တွန့်ကွေးသွားသည်။ ဘာများ ပြဿနာရှိလို့လဲလို့ ဟယ်အာလဲ ကင်းဗတ်စင်ကြီးကို ကြည့်လိုက်ပေမယ့် ထူးဆန်းနေတာ တစ်ခုမှမရှိပေ။

ဟယ်အာ ပိုင်တဲ့ ကင်းဗတ်စင်ဆိုတာ စာအုပ်တွေကို နေရာလွတ်မရှိ စီထားတဲ့ စာအုပ်စင်ကြီးနဲ့တူသည်။ စာအုပ်ထောင့်တွေမြင်နေရမယ့်အစား ကင်းဗတ်ထောင့်စွန်းနဲ့ အစွန်းမှာ ထိုးထားတဲ့ ဟယ်အာ့လက်မှတ်ကို မြင်နေရတာလေးပဲ ကွာသွားတာဖြစ်သည်။