💎اللبؤة و الوحش💎( مكتملة )

part90

🌔بارت 90 👑
💧انسطالات لوطو فباركينغ ووقفات لتواني كدور عينيها فلارجاء كيبانولا لماطريكالو ديال طموبيلات غير لفريع رمات سوارت لوطو لبوديكارد و اخرين جاو كيفكوها من صحافة عاد دخلات مع باب لقاعة دورات عينيها بانلا كلشي منظم ومتول وبزااف ديال طبلات صغار بناب ابيض ودايرة بسينتة حمرا وكل وحدة واقفين فيها 3 دناس باين من لباسهم انهم كينتمو لطبقة لبروجوازية موسيقى هادئة مالية لمكان وسيرفورات بلباس موحد نسا جيب كحلة وشوميز بيضة ورجال سراول فلحكل وشوميز بيضة كيدورو على لحضور وكيفرقو فلمشروبات غير شافتهم تفكرات ليلة لي سكرات فيها هي هزار بزز باش حبسات ضحكة توجهات لواحد طابل خاوية مقابلة مع لباب حطات عليها بوشيط ديالها وزولات لفيرور وعطاتو لمرا لمتخصصة بتعليقهم عاد بدات كدور عينيها بملل خصا غير فوقاش تفرتك هاد جقلة كتحس بنظرات ناس كتقب فيها وفجمالها حتا جا سوغو واكيرا رحبو بيها وهما خايفين لا تفلتلهم شي هضرة على نيار قدامها حتا مشاو عاد طلعو نفس وطبعا رسيل لاحظت توترهم ولكن ماعطاتش لموضوع أهمية كبيرة قالت يمكن من سطريس هزات كاس دلمونضة كترشف منو وفين ماتشوف شي راجل كيحنزز فيها كتخنزر فيه حتا كيدور وجهو عيونها قد ما كتفتن وهي ضاحكة قد ما كتخلع وهي مخنزرة نزلات عينيها كتلاها فتيلي وكتهضر مع ميرال وبيلسان ويالله طلعات عينيها باش ترشف من كاسها وهي تفتح عينيها بصدمة ولكاس طاح من يديها حتا كلشي دار كيشوف لجيهتها اما هي غير واقفة مبلوكية كتشوف فنيار واقف بشحمو ولحمو مافيه حتا خدشة بنفس وسامتو وعيونو زمردية لحادة نفس تخنزيرتو لمعهودة وكاريزماتو لي كطيح نص فبنادم ماحسات غير بدموعها نازلين كيتسرسبو على خدها عاد فاقت من صدمتها وزادت كتمشى بخطوات فحال سكرانا ماتابتينش لان جسمها كلو كيرجف كلشي تخلط عليها لفرحة صدمة شوق كلشي تجمع عليها💧
🔥 اما نيار واقف كيشوف فالاجواء حتا كيبالو كلشي كيشوف انفاص معاه طلع حاجبو باستغراب ودار بلعرض لبطيء وفيكسا عيونو فلحورية لي جايا لجيهتو كتبكي حس بقلبو كيضرب بعنف ونيفو كيستنشق نفس لعطر لي كيجيه فدار ولكن هاد لمرة بلادوز كبيرة بقا كيحقق فعيونها لكريستالية لي بدموع ولا غامقين هما نفس لعيون لي كيحلم بيهم وكيشوفهم قدامو نزل عينو لشعرها الاشقر طويل زاد جمع حجبانو هو نفسو لي شاف فلحلم عاد طلع نظرو فرسيل كيشوف فيها بنظرة عميقة قلبو كيقولو هادي هي حب حياتك وعقلو كيقولو ماكتعرفهاش ضغط على عينو بقوة كيهدأ من ضو لي كيضربلو فراسو ولكن كيحس بهادشي غير ماكيزيد طلع يديه بزوح ضاغط على راسو كيحاول يوقف من حدة هاد الألم صور مبعترة كضربلو فعقلو فحال لبرق عروق جبهتو تنفخو
اما رسيل غير شافتو فهاد لحالة قلبها تهز من بلاصتو ماحسات براسا حتا مشات كتجري لجيهتو وغير وصلات لعندو عنقاتو بكل قوتها مزيرة عليه بيديها بزوج ومتقلا عليه وناس كلشي كيصور فيهم وصحافة كدالك طبعا وكلشي عارف قصة اللبوؤة و الوحش اما نيار ضهشراتو ماعرف راسو باش تبلى وبدون شعور حاوطها بدراعو مغمض عينو كيستنشق فعبقها وقلبو كيحرقو من دموعها حتا بداو كيوضاحولو صور وداكرتو كترجع جميع الاحدات لي عاشها من طفولتو وكيفاش طلاقا رسيل وكيفاش سكنات قلبو وستحودات على جل تفكيرو حتا الاخر لحظة بيناتهم من عتارفلها بحبو وهو كينزف من قلبو مامتيقش كيفاش شهراين وهو بعيد عليها شهراين يعلم الله شنو قاسات ودوزات فغيابو واش اداوها اتر تفكير فهاد الاحتمال زاد زيرها لعندو خانقها فحضنو حتا هزها من لارض وهي كتشهق وحاشية وجها فعنقو مامتيقاش بلي بعد شهراين ديال لعداب لقات حبيبها لي مزال مافرحات معاه حتا كان مشا وخلاها معلقا فكل مرة كترجع لقصر فاقدة لامل وكتبات مفزكة مخدتها بدموعها وكتقول صافي نيار ماعنلقاهش وهاهو دابا جا برجليه وقالها ها أنا حقا ربي كبيرر بقاو عشرة دقايق وهما على نفس وضعيتهم معنقين ومغمضين عينيهم حتا فصلو لعناق ببطء ماساخيينش بحضن بعضهم شاف مباشرة فعيونها لي كتلمع ودموع نازلين شلال من عيونها ونيفها حمر كتنخصص فحال دراري صغار مامتيقش كيفاش قدر ينسا اهم حاجة فحياتو هز يديه ببطء وحاوط وجها ومسح خدها بحنية ونطق بلكلمة لي خلا قلبها يزيد من دقاتو وشحاال توحشات لبحة صوتو رجولية🎡
نيار:توحشتك
رسيل:هئ هئ كنبغيك
💧رجعات تلاحت عليه معنقاه ونيار مامتيقش بلي قالتلو كنبغيك ضغط على شفايفو بفرحة وجرها لصدرو ونطق بصوت خافت وعدسات لكاميرات كتصور فيهم💧
نيار:كنبغيك وكنموت عليك